Jeremías 5 - Bible in Tzotzil de Chenalhó with Deuterocanon

Toj ep smulic li Jerusalén xchi'uc Judae

¹ “Xanic scotol xoraltic ta Jerusalén, batanic ta scotol cuxub o'ntonaletic ta yut lum; bat sa'ic, q'uelic lec me oy chataic junuc li boch'o tuc' c'usi tspase ti ja' tsa' c'usi melele, yu'un jech xu' ta jpasbe perdón li Jerusalene.

² Oy boch'otic chalic ta jamal ta jbi ti chiyich'icun ta muc' vu'un li Muc'ul Diosune, pero altic chalic”, xi li Diose.

³ Muc'ul Dios, li c'usi chasa'e, ja' ti oyuc boch'o melel c'usi chale. Laj avac'be nucul, pero mu'yuc c'ux laj ya'yic; laj avac'be tsots svocolic pero muc xbijubic o. Toj tsots la spas sbaic jech chac c'u cha'al ton; me jutuc muc sutes yo'ntonic o.

⁴ Li vu'une jech la jnop: “Ja' no'ox van boch'o mu'yuc sbijilic ti mu xa'ibeic smelol, ti mu sna'ic c'usi tsc'an li Muc'ul Diose, ti mu xc'ot ta yo'ntonic li mantaletic yu'une.

⁵ Ja' ta xibat quic ta stojol li boch'otic lec bijique. Ja' van cha'ibeic smelol c'usi tsc'an li Muc'ul Diose; ja' van chc'ot ta yo'ntonic smantal li Dios yu'unique”, xichi. Pero scotolic la sbajbeic smantal li Diose; muc sc'an xich'ic o ta muc'.

⁶ Ja' yu'un ta xloc' tal leonetic ta toyolaltic ja' ta xti'atic o; ta xloc' tal oq'uiletic ta xocol banamil, ja' ta x'ulesatic yu'un noxtoc. Te ta xmalaatic yu'un jti'val bolometic ta slumalic. Boch'ouc no'ox ta xloc' batel te ta xmilatic o, yu'un i'epaj li stoyobbailique; mu xa albaj c'u yepal li xchopolilique.

⁷ Ja' yu'un jech chal li Muc'ul Diose: “¿C'u x'elan xu' ta jts'icbot yepal li amul le'e? Li anich'nabique la scomtsanicun; c'alal oy c'usi chalic ta jamale, ja' la st'abbeic sbi li c'usi muc diosuque. Laj cac'be ep sve'elic, pero ja' no'ox imulivajic; muc vu'cun laj yich'icun ta muc', ja' no'ox ibatic ta snail muliletic.

⁸ Jech chac c'u cha'al ca'etic ti lec mac'linbilic ti sts'ijts'un no'ox tsc'an chcuchumaje, ja' jech sts'ijlajetic no'ox ta stojol yajnil xchi'ilic ec.

⁹ ¿Me mu'yuc ta xcac'be stoj smulic ti jech tspasique? ¿Me mu'yuc ta xcac'be stoj li jun banamil ti jech tspase?

¹⁰ Ac'o tal ochentaatuc yu'un li yajcontrae; ac'o yich' soquesel li ts'usubtic yu'unique, ac'o me mu j'ech'eluc chlaj sc'oplal o. Ac'o slilinic loq'uel li sc'obc'obtac ts'usubtique, yu'un mu xa ja'uc cu'un.

¹¹ Yu'un ta scotol yo'ntonic la sva'lupatinicun o li smomnich'nab Israel xchi'uc smomnich'nab Judae, xichi vu'un li Muc'ul Diosune”, xi.

Laj yich' alel ti chtal stojol mulil ta stojol li israeletique

¹² Li Israel xchi'uc Judae mu'yuc xa ta yo'ntonic li Muc'ul Diose, jech laj yalic: “Li Diose mu'yuc c'usi tspas. Mu'yuc c'usi chopol chtal ta jtojoltic; mu'yuc chquiltic pleito, mu'yuc chca'itic vi'nal”, xiic.

¹³ Li j'alc'opetique ja' jechic jech chac c'u cha'al ic', yu'un mu'yuc chc'opoj Muc'ul Dios ta stojolic.

¹⁴ Ja' yu'un jech chal li Muc'ul Dios ti tspas ta mantal scotol te ta vinajele: “Ta sventa ti jech chc'opojic ta jtojole, ta xcac'bot ta ave li jc'ope; ja' jech chc'ot jech chac c'u cha'al c'oc'. Li achi'iltaque ja' jech chc'otic jech chac c'u cha'al si'; ja' ta xchic'atic o yu'un li c'oq'ue”, xi.

¹⁵ Jech chal noxtoc li Muc'ul Diose: “Israel, a'yo ava'ay, ta xcac' taluc ta atojol namal cristianoetic. Ja' jun tsatsal lum, vo'one ono'ox te oyic; ja' jun lum ti mu xava'ibeic o sc'opique.

¹⁶ Li yabtejebique chac' batanic o ta ch'en; ja' mero jmilvanejetic scotolic.

¹⁷ Ja' chtal sve'ic li c'usitic chloc' avu'unique; ja' chtal slajesic li ave'elique. Ta sti'ic noxtoc li aquerem atsebique, xchi'uc ta sti'ic scotol li achijic avacaxique. Ta slajesic scotol li ts'usubtic xchi'uc li higotic avu'unique. Ta yabtejebic ta sjinesic scotol li alumalic ti lec setbilic ta tsatsal coralton, ti ja' apatoj avo'ntonic yu'une”, xi.

¹⁸ Jech chal noxtoc li Muc'ul Diose: “Ac'o me jech chc'ot ta pasel, pero mu scotoluc j'ech'el ta xcules.

¹⁹ C'alal me jech chlic yalique: ‘¿c'u yu'un jech la spasbutic scotol li Dios cu'untique?’, me xiique, jech xavalbe: ‘jech chac c'u c'alal laj acomtsanic li Muc'ul Dios ti latunic yu'un yantic diosetic li' ta alumalique, ja' no'ox jech chac' ac'o bat tunanic yu'un yanlum cristianoetic ta yan banamil noxtoc’, uto.

Taq'uiel ta sventa israeletic

²⁰ “Jech xavalbe ya'yic li smomnich'nab Jacobe; jech xavac'be sna'ic ta scotol li Judae:

²¹ ‘A'yo ava'yic bol cristianoetic ti mu c'usi x'och ta avo'ntonique. Ac'o me oy asatic pero mu xavilic; ac'o me oy achiquinic pero mu xava'yic.

²² Jech chcal vu'un li Muc'ul Diosune: ¿Me mu'yuc chaxi'ic cu'un ta melel? ¿Me mu'yuc chaniquic jutuc ta jtojol? ¿Me mu xana'ic ti vu'un laj cac' li yi'tic ta ti'ti' nab sventa sts'aquil bu c'alal chpaj li nabe? Le'e ja' sts'aquil comen o cu'un. Ac'o me tsots ta syuq'uilan sba, ac'o me toyolic no'ox xvil, pero mu ono'ox xjelov batel.

²³ Li vo'oxuque toj tsots avo'ntonic, bats'i jtoybaoxuc; laj acomtsanicun, j'ech'el labatic o.

²⁴ Mu'yuc jech laj aval ta avo'ntonic: Ja' ac'o quich'tic ta muc' li Muc'ul Dios cu'untique yu'un ja' chiyac'butic tal vo' ta yorail vo'olaltic xchi'uc ta yorail q'uinubaltic, xchi'uc ja' yac'ojbe lec yorail li c'aoj cu'untique, mu'yuc xachiic.

²⁵ Yu'un li achopolilique xch'ayesoj ajolic; li amulique la sjipboxuc loq'uel ta avo'ntonic li c'usi leque.

²⁶ Yu'un ivinaj xa ti oy boch'o toj chopolic te ta atojolic vo'oxuc ii cu'untacoxuque; ta xyacvanic ta mucul jech chac c'u cha'al boch'o tsyac mut, xco'laj xchi'uc ta st'inan syoquic sventa tsyaquic cristianoetic.

²⁷ Li snaique noj ta yeleq'uic, jech chac c'u cha'al noj ta snail li mutetique, jech itoyic o, ipasic o ta jc'ulej.

²⁸ Solel iju'p xchi'uquic o, xja'te-ja'te xa lec li snuculilique. Solel ijelov ta bis li smulique. Mu'yuc tuc' chchapanic li me'on ololetique; mu'yuc tscoltaic li me'onetique.

²⁹ ¿Me mu'yuc ta xcac'be stoj smulic ti jech tspasique? ¿Me mu'yuc ta xcac'be stojic ti jech tspasic li cristianoetic le'e?, xichi vu'un li Muc'ul Diosune.

³⁰ ‘Toj ven chopol, toj ven xi'bal sba li c'usi tspasic li' ta banamile.

³¹ Li j'alc'opetique puru epalc'op c'usitic chalic; li paleetique ja' chaq'uic ta ch'unel li c'usi tsc'an yo'nton stuquique; li jteclumale toj lec cha'yic, jech tsc'an yo'ntonic ec. Pero ¿c'usi chapasic c'alal me la sta yorail ital avocolique?’, uto”, xi li Muc'ul Diose.