Jeremías 49 - Bible in Tzotzil de Chenalhó with Deuterocanon

Sc'oplal c'usi chc'ot ta pasel ta stojol Amón

¹ Li Muc'ul Diose jech chal ta sventa li amonetique: “¿Me yu'un mu'yuc yalab xnich'nab li Israele? ¿Me yu'un mu'yuc boch'o xu' chich'be comel li yosile? ¿C'u yu'un ti ja' yu'uninoj dios Milcom li yosilal Gade, ti ja' xa te nacalic svinictac ta lumetic te ta Gade?

² “Ja' yu'un jech chcal vu'un li Muc'ul Diosune: Ta to sta sc'ac'alil ta xvinaj avanel ta scoj pleito te ta Rabá ta stojol li amonetique. Li slumalique ta xc'ataj ta sbusleb tonetic; ta xich' ac'bel sc'ac'al. Jech li israeletique ta xcha'ich'ic sutel yan velta li yosilic ti ipojbatique”, xi li Muc'ul Diose.

³ “¡Hesbón, ato me avo'nton, yu'un laj xa yich' jinesel li lum Haie! ¡Antsetic ta Rabá, oc'anic me! Lapic c'u'il sventa at-o'nton; joyetanic xa no'ox ta spat xocon anaic. Yu'un li dios Milcome chucbil xa ibat ta yan banamil; chucbil ibat xchi'uc li paleetic xchi'uc li banquilaletic yu'une.

⁴ Jbajmantal cristianoetic, ¿c'u yu'un chatoy aba achi'uquic li yaxal stenlejaltic avu'unique? Yu'un mu'yuc xa c'usi chloc' avu'unic. Vo'oxuc ti ja' no'ox apatoj avo'ntonic yu'un li ac'ulejalique, jech chavalic: ‘¿Me oy boch'o xu' chtal scontrainutic?’, xachiic.

⁵ A'yo ava'yic, vu'un li Muc'ul Diosun ti ta jpas ta mantal scotol te ta vinajele, ta jtac tal xi'el ta atojolic ta buyuc no'ox, jech te no'ox chajatovic batel ta anil yo' bu oyoxuc li jujunoxuque. Mu'yuc xa boch'o xu' chastsoboxuc sutel tal yan velta.

⁶ Pero ta ts'acal ta xlic sta slequilalic yan velta li amonetique”, xi li Muc'ul Diose.

Sc'oplal c'usi chc'ot ta pasel ta stojol Edom

⁷ Li Muc'ul Dios ti tspas ta mantal scotol te ta vinajele jech chal ta sventa li Edome: “¿Me mu'yuc xa boch'o bij te ta Temane? ¿Me mu xa sna' c'usi tspasic o li boch'otic lec bijique? ¿Me ich'ay o batel li sbijilique?

⁸ ¡Jnaclumetic ta Dedán, jatovanic loq'uel ta anil, bat nac'o abaic ta nac'alaltic! Yu'un ta xculesbe li steclumal Esaue; laj xa sta yorail ta xcac'be stoj smul.

⁹ Li boch'otic ta stsobic ts'usube oy to bu ta xcom jutuc yu'unic. C'alal ta xtal j'eleq'uetic ta ac'ubaltique, ja' no'ox ta xich'ic batel li c'u yepal chtun yu'unique.

¹⁰ Pero li vu'une me jutuc mu'yuc c'usi ta jcomtsan te ta slumal li Esaue. Mu xu' yu'un ta spoj sbaic, yu'un chquil ti bu tsnac' sbaique. Ta xculesbe scotol li yalab xnich'nabe, li yuts' yalaltaque, xchi'uc li boch'otic nopol nacalic xchi'uque, jech chch'ay sc'oplalic o.

¹¹ Ac'bun jts'ites li me'on ololetic avu'une; ta jchabi li me'on antsetic avu'une”, xi li Muc'ul Diose.

¹² Li Muc'ul Diose jech chal: “Li boch'o mu'yuc sc'oplal ta xuch' ch'ail vomole ta persa ono'ox ta xuch'. ¿Me vo'ot xa chacol ec? Ta persa chavuch' ec.

¹³ Vu'un li Muc'ul Diosune jamal chcal ta sventa jbi jtuc: Li lum Bosrae ta to xyavnaij; xco'laj xchi'uc xocol banamil chcom, mu'yuc stu chcom o, chopol sc'oplal chcom. Scotol li yantic lumetic yu'une j'ech'el chyavnaij o”, xi li Muc'ul Diose.

¹⁴ Laj ca'ay ti la stac batel j'almantal ta stojol muc'tic lumetic li Muc'ul Diose, jech laj yal: “¡Tsobo abaic, chapano abaic; bat tsaquic ta pleito li Edome!

¹⁵ Edom, ta xcac' ti ven biq'uit chacom ta stojol li yantic lumetique; bajbil chacom o ta stojol li cristianoetique.

¹⁶ Ja' la slo'laot li asimaronil xchi'uc li atoyobbaile, vo'ot ti te nacalot ta jap ch'entique, vo'ot ti te oyot ta ven toyol jol vitse. Ac'o me ta toyol apasoj atas jech chac c'u cha'al xic, pero ta jipot yalel”, xi li Muc'ul Diose.

¹⁷ “Solel xch'ijan chcom o li Edome. Scotol li boch'otic te chjelovique toj ch'ayel chc'ot yo'ntonic; toj xi'bal sba chilic ti c'u x'elan svocolique.

¹⁸ Ja' jech ta xc'ot ta pasel jech chac c'u cha'al li lum Sodoma xchi'uc li lum Gomorrae xchi'uc li yantic lumetic te ta spat xocone. Mu'yuc xa boch'o chnaqui o; mu'yuc yajval chcom o”, xi li Muc'ul Diose.

¹⁹ Ta xital jech chac c'u cha'al jcot león chloc' tal ta toyolal te'tic ta uc'um Jordán, ti chbat yo' bu lec sve'el li chijetique. Ta xcac' jatovicuc loq'uel ta anil li edometique, xchi'uc ta xcac' pasaticuc ta mantal yu'un li boch'o t'ujbil cu'un ch-och ta ajvalilale. ¿Me oy boch'o xco'laj jech chac c'u cha'al li vu'une? ¿Me oy boch'o xu' chistsalun? ¿Me oy junuc jchabichij ti xu' yu'un chtal sva'lebinune?

²⁰ Vu'un li Muc'ul Diosune, a'yo ava'yic c'usi jchapanoj ta sventa li Edome, xchi'uc c'usi jnopoj ta sventa li lum Temane: C'alal ta bic'tal chijetic ta xich'ic jochel batel, ta xich' lilinbel comel li snaique.

²¹ C'alal chjin li Edome, ta xnic li banamile, yu'un xc'ululet ta jyalel. Li oq'uele xvinaj to batel c'alal ta Tsajal Nab.

²² Li yajcontraique ta xvil jech chac c'u cha'al xic; ta xc'ot xlich'an xic' te ta Bosra. C'alal me la sta li sc'ac'alil le'e, li soldadoetic yu'un Edome ja' xa jech yo'nton chc'otic jech chac c'u cha'al jun ants ti c'alal ja'o tsots svocol c'alal yorail chcuxe”, xi li Muc'ul Diose.

Sc'oplal c'usi chc'ot ta pasel ta lum Damasco

²³ Lo'il sventa Damasco: “Li lumetic ta Hamat xchi'uc ta Arfade mu xa sna' c'usi tspasic yu'un laj ya'yic chopol a'yej. Toj ep ta xniquic ta xi'el, jech chac c'u cha'al nab ti mu stac' pajesele.

²⁴ Li Damascoe mu'yuc xa stsatsal yo'nton, ta xa xjatov batel. Ta xa xnic ta xi'el, chat xa yo'nton; toj ep xa svocol cha'ay, jech chac c'u cha'al jun ants ti yu'un xa chcuxe.

²⁵ ¿C'u x'elan xu' chictaic comel li lum ti solel ich'bil ta muq'ue, ti toj xcuxet yo'ntonic yu'une?

²⁶ C'alal me la sta li sc'ac'alile, li queremetic yu'une te lamal chcomic ta xoraltic; li soldadoetic yu'unique ta xchamic noxtoc. Vu'un chcal jtuc, vu'un li Muc'ul Diosun ti ta jpas ta mantal scotol te ta vinajele.

²⁷ Ta xich' ac'bel sc'ac'al li coralton yu'un Damascoe; ta xc'ac' scotol li spasubmantal Ben-adade”, xi li Muc'ul Diose.

Sc'oplal c'usi chc'ot ta pasel ta lum Cedar xchi'uc ta lum Hazor

²⁸ Li'i ja' sc'oplal c'usi chc'ot ta pasel ta stojol li boch'otic te oy ta Cedar xchi'uc li jpasmantaletic ta Hazor, ti c'alal chich' tsalel yu'un li Nabucodonosor ajvalil ta Babiloniae. Jech chal li Muc'ul Diose: “¡Bat tsaquic ta pleito li Cedare! ¡Ulesic o comel li cristianoetic ta sloq'ueb c'ac'ale!

²⁹ Pojbeic li carpanaetic, li chijetic, li camelloetic, li poq'uetic yu'unique; ich'beic scotol li c'usitic chtun yu'unique. Avananic, jech xavalic: ‘¡Puru xi'el ta buyuc no'ox!’, chianic.

³⁰ ¡Jatovanic loq'uel ta anil, jnaclumetic ta Hazor! Bat nac'o abaic ti bu lec nac'alaltique, yu'un chapanbil xa chtal scontrainoxuc li Nabucodonosor ajvalil ta Babiloniae. Vu'un chcal jtuc, vu'un li Muc'ul Diosune.

³¹ Vu'un li Muc'ul Diosune jech chcal: Batanic, bat contrainic li jun lum ti mu'yuc xi'el cha'ay, ti mu c'usi xtal ta yo'ntone. Mu'yuc smac li ti'coralton yu'une, mu'yuc sbajubil, xchi'uc stuc oy noxtoc.

³² Pojbeic li camelloetic xchi'uc chijetic yu'unique. Ta jpuquic batel ta buyuc no'ox; ta jpuquic batel c'alal to ta sti'iltac banamil. Ta xcac'be tal svocolic ta buyuc no'ox. Vu'un chcal jtuc, vu'un li Muc'ul Diosune.

³³ Li lum Hazore yavil oq'uiletic ta xcom cu'un; xch'ijan chcom o ta j'ech'el. Mu'yuc xa boch'o te chnaqui o; mu'yuc yajval chcom o”, xi li Muc'ul Diose.

Sc'oplal c'usi chc'ot ta pasel ta Elam

³⁴ C'alal lic stsac yabtel ta ajvalilal ta Judá li Sedequiase, ja'o ital c'opanatuc yu'un Muc'ul Dios li Jeremiase. Ja' i'albat li c'usi chc'ot ta pasel te ta Elame, jech i'albat:

³⁵ “Jech chcal vu'un li Muc'ul Diosun ti ta jpas ta mantal scotol te ta vinajele: Ta jlilinbe sflecha li Elam ti ja' stsatsal yo'ntone.

³⁶ Ta jtacbe tal ta stojol li muc'ta iq'uetic ta xchanjotal xchiquin vinajel, yu'un jech ac'o spuc sbaic batel ta buyuc no'ox; mu'yuc xa bu junuc lum ti mu'yuc boch'o chc'ot snac' sba tee.

³⁷ Li lum Elame ta xcac' nicuc ta xi'el ta stojol li yajcontrae; ta xcac'be tsots svocol. Ta xcac'be ta stojol scotol li sc'ac'al co'ntone, xchi'uc ta jtacbe tal muc'ta pleito ta stojol, ja' to me i'ul o scotole. Vu'un chcal jtuc, vu'un li Muc'ul Diosune.

³⁸ Vu'un li Muc'ul Diosune ta xcac' lec jchotleb te ta Elam; ta jmilbe li ajvaliletic xchi'uc li banquilaletic yu'une.

³⁹ Pero ta ts'acal, ta to xlic quiq'uic sutel tal te ta Elam li boch'o chucbil ibatique”, xi li Muc'ul Diose.