Jeremías 48 - Bible in Tzotzil de Chenalhó with Deuterocanon

Sc'oplal c'usi chc'ot ta pasel ta stojol Moab

¹ Li Muc'ul Dios ti tspas ta mantal scotol te ta vinajele, jech chal ta sventa li Moabe: “¡Ay, lum Nebo, ijin xa o; iyal xa o ta q'uexlal! Li Quiriataime i'och xa o ta c'abal. Li tsatsal coralton yu'une ijin yalel o c'alal ta banamil.

² Ilaj xa sc'oplal ti ich'bil ta muc' li Moabe. Te ta Hesbón laj yich' chapanbel sc'oplal yu'un yajcontratac, jech laj yalic: ‘Batic, bat jch'aybetic o sc'oplal ta stojol yantic lum’, xiic. Jech ec li vo'ote, Madmena, ta xavich' ulesel o; ta xtal ta atojol li espadae.

³ Ta xvinaj tsots oq'uel te ta Horonaim: ‘Lijyavnaij xa, lij'ul xa o’, xiic.

⁴ “Li Moabe iyavnaij xa; x'avetic no'ox ta vocol li ololetique.

⁵ Li boch'otic chmuyic batel ta Luhite x'oc'oletic chmuyic batel. Li boch'otic chyalic batel ta Horonaime, ch-a'yatic x'avetic ta oq'uel ta scoj xi'el chyalic batel.

⁶ ¡Pojo to abaic ta milel, jatovanic batel ta anil jech chac c'u cha'al taqui ts'i'lal ti cuchbil ta iq'ue!

⁷ “Moab, ta sventa ti ja' laj apat avo'nton yu'un li c'usitic oy avu'un, xchi'uc li ac'ulejale, ja' yu'un cha'och ta c'abal; li adios Quemose chucbil ta xbat, xchi'uc li paleetic xchi'uc li banquilaletic yu'une.

⁸ Ta xtal jmilvanejetic ta jujun lum; me junuc lum mu'yuc ta xcol. Ta xich' yavnaijesel noxtoc li stenlejaltique; soquesbil ta xcom o li soplejaltique. Vu'un chcal jtuc, vu'un li Muc'ul Diosune.

⁹ Bat va'anic muc'ta ton ta sventa senyail muquinal te ta Moab, yu'un ta xbat avulesic, yu'un ta xich' yavnaijesel scotol li lumetic yu'une, mu'yuc xa boch'o te nacal chcom o”, xi.

¹⁰ ¡Ac'o bat stoj li boch'o mu sc'an spas ta scotol yo'nton li c'usi yabtel chcac'bee. Ac'o bat stoj li boch'o mu sc'an xac' espadae!

¹¹ Li Moabe jun yo'nton o, mu'yuc ono'ox baq'uin xa'ay svocol ta sbic'tal. Ja' jech chac c'u cha'al pasem ya'lel ts'usub ti mu'yuc chich' jeltabel o yavile, jech mu'yuc baq'uin tsoc o smuil, mu'yuc jelem o yic'. Ja' no'ox jech ec li Moabe mu'yuc bu yich'oj chuquel batel ta yan banamil.

¹² Ja' yu'un jech chal li Muc'ul Diose: “Ta to sta sc'ac'alil ta jtac tal boch'otic ta xtal sjeltabeic yavil, ta xocobtasbeic li yavil ono'oxe. Ta sjatbeic comel li snae; voc'taltic xa chbat yu'unic.

¹³ Li Moabe yalem ta q'uexlal ta xcom ta scoj li sdios Quemose, jech chac c'u cha'al yalem ta q'uexlal icom li Israel ta scoj li c'usi la spasic ta Betele.

¹⁴ “Ja' yu'un mu xu' jech chal li Moabe: ‘Lec tsatsal vinicuncutic, lec xu' cu'uncutic pleito’, mu xu' xiic.

¹⁵ Ta xjin xa li Moabe xchi'uc li lumetic yu'une; li querem soldadoetic yu'un ti lequique ta xa xlajic. Ja' jech chcal vu'un li muc'ta Ajvalilune, vu'un li Muc'ul Dios jbie, ti ta jpas ta mantal scotol te ta vinajele.

¹⁶ Nopol xa xtal jmilvanejetic ta stojol li Moabe; nopol xa xtal ta stojol li c'usi chopole.

¹⁷ Vo'oxuc ti te oyoxuc ta spat xocon Moabe xchi'uc vo'oxuc ti ava'yojbeic sc'oplale oc'anic ta stojol, jech xavalic: ‘¿C'u x'elan ic'as li tsatsal vastone, li vara ti toj lec c'upil sbae?’, chianic.

¹⁸ “Lum Dibón, bic'tajeso aba, yalan, chotlan ta lumtic, yu'un li boch'o chules li Moabe te xa chtal ta atojol ec; ta xa sjines li tsatsal coraltonetic avu'une.

¹⁹ Jnaclumetic ta Aroer, licanic me, bat va'ano abaic ta be; jac'bo ava'yic li boch'otic chjatovic batel ti icolic to ta milele. ‘¿C'usi ic'ot ta pasel?’, utic ava'yic.

²⁰ Li Moabe iyal xa ta q'uexlal, iyich' xa o. ¡Oc'anic, avananic ta stojol! Alic batel ta uc'um Arnón ti ilaj xa o li Moabe”, xi li Muc'ul Diose.

²¹ Ital xa chapanel ta stojol li lumetic ta stenlejaltique, ja' li lum Holón, Jahaza, Mefaat,

²² Dibón, Nebo, Bet-diblataim,

²³ Quiriataim, Bet-gamul, Bet-meón,

²⁴ Queriot, Bosra, xchi'uc scotol li lumetic ta nom ta noch' te ta yosilal Moabe.

²⁵ “Laj xa yich' tuch'bel yip li Moabe; laj xa yich' c'asbel li ste'el sc'obe”, xi li Muc'ul Diose.

²⁶ Yacubtasic li Moabe yu'un la stoy sba ta stojol li Muc'ul Diose; yu'un jech ac'o sbonilan sba ta xe, jech ac'o yich' labanel.

²⁷ ¿Moab, me muc vo'ocot ti laj ana'le li Israele? ¿Me mu vo'ocot ti scotol c'ac'al puru labanel laj avac'be jech chac c'u cha'al chich' labanel jun j'eleq'ue?

²⁸ Jnaclumetic ta Moab, comtsanic li alumalique; bat naclanic ta ch'entic jech chac c'u cha'al stsumut ti te tspas stasic ta c'alch'entique.

²⁹ Laj xa ca'ibetic c'u x'elan stoyobbail li Moabe, ven jtoyba ta jyalel, toj muc' yac'oj sba.

³⁰ Xcotquinbe c'u x'elan li stoyobbaile, pero mu'yuc c'usi tsta o yu'un. Quilojbe c'u x'elan li simaronile, pero mu'yuc c'usi xu' yu'un.

³¹ Ja' yu'un chi'oc' chi'avan ta stojol li Moabe, xchi'uc ta stojol li cristianoetic ta Kir-harese.

³² Ta xi'oc' ta atojol ts'usubtic ta Sibma; ech'em to jech chacoc'taot jech chac c'u cha'al laj yich' oc'tael li Jazere. Li ac'obc'obtaque la slim sba batel ta jot nab; ic'ot c'alal to ta nab Jazer. Pero li asate tal yich' ulesel scotol.

³³ Ta xich' lajesbel sc'oplal ti xcuxet no'ox yo'ntonic, ti tse'ej lo'ilic no'ox te ta ts'unubaltic ta Moabe. Li yavil spits'ubil ya'lel ts'usube jeche' taquich'ojan chcom. Mu'yuc xa ya'lel ts'usub te, mu'yuc xa boch'o tspits' ya'lel sts'usub; mu'yuc xa boch'o chq'uejin ta sventa ti xcuxet no'ox yo'ntone.

³⁴ Li cristianoetic ta Hesbone x'oc' x'avanic ta xc'uxul vocol; xvinaj to c'alal ta Eleale xchi'uc c'alal to ta Jahaza ti ch-oq'uique. Xchi'uc xvinaj noxtoc ta Zoar c'alal to ta Horonaim xchi'uc ta Eglat-selisiya. Jech noxtoc li nio'etic ta Nimrime itaquijan xa.

³⁵ Li Muc'ul Diose jech chal: “Ta xcules li cristianoetic ta Moabe, ja' li boch'otic tsmilic matanaletic ta toyol c'opojebaletique xchi'uc ti chchiq'uic pom ta stojol diosetic yu'unique”, xi li Muc'ul Diose.

³⁶ “Ja' yu'un xna'et co'nton yu'un li Moab jech chac c'u cha'al chich' jupanel oq'uese. Chc'unib co'nton yu'un li cristianoetic ta Kir-harese, yu'un jeche' chch'ay scotol li sc'ulejalic la stsobique.

³⁷ Scotolic xjuxanoj sjolic xchi'uc yisimic; sbojanoj sbec'talic, xchi'uc slapojic c'u'il sventa at-o'nton.

³⁸ “Ta scotol yamaq'uil jolnaetic xchi'uc ta scotol xoraltic ta Moabe puru oq'uel xa chvinaj, yu'un la jlilin li Moabe jech chac c'u cha'al jun bin ti mu'yuc xa stu chquile”, xi li Muc'ul Diose.

³⁹ “¡Oc'anic yu'un li Moabe! C'uxi ic'ot ta pasel ti lec o'lol itambat batele. Solel yalem ta q'uexlal icom o. Solel labanbil, toj i'lal xa sba ch-ilat yu'un li boch'otic sts'aquinojan sba xchi'uque.”

⁴⁰ Jech chal noxtoc li Muc'ul Diose: “A'yo ava'yic, ta xvil tal jech chac c'u cha'al jcot xic li yajcontra Moabe; ta xlich'an tal lec xic' ta stojol li Moabe.

⁴¹ Ta x'och ta c'abal li lumetic yu'une xchi'uc li tsatsal coraltonetic yu'une. Li simaron soldadoetic yu'une chniquic xa jech chac c'u cha'al jun ants ti toj c'ux svocol cha'ay c'alal yorail xa chcuxe.

⁴² Li Moabe ta xich' jinesel o, mu xa lumuc chcom o, yu'un la stoy sba ta jtojol vu'un li Muc'ul Diosune.

⁴³ Li jnaclumetic ta Moabe puru xi'el xa cha'yic; chapal xa xch'enalic, lich'il xa lec xch'ajanulic.

⁴⁴ Li boch'o chjatov batel ta anil ta scoj xi'ele ta xbalch'ujic yalel ta ch'en; li boch'o chjatov loq'uel ta ch'ene ta xich' chuquel ta lasu, yu'un laj xa sta sjabilal, laj xa sta sc'ac'alil ta xcac'be stoj smul li Moabe”, xi li Muc'ul Diose.

⁴⁵ “Li boch'otic chjatovic batele, ch-alubic, te chlic snac' sbaic ta xyaxinal lum Hesbón. Pero chloc' c'oc' noxtoc te ta Hesbón, natic yat c'oc' chloc' te ta slumal li ajvalil Sehone, jech ta xchic' scotol li vitsetic yu'un Moab, ja' li jsa'c'op lume.

⁴⁶ ¡Ay, toj abul aba Moab! ¡Xnich'nabtac dios Quemos, lach'ayic o batel! Ichucatic xa batel li viniquetic avu'unique; i'ic'atic xa batel ta yan banamil li antsetic avu'unique.

⁴⁷ Pero ta to xquic' sutel tal ta ts'acal li moabetic ti bu chucbilic batele”, xi li Muc'ul Diose. Ja' jech yepal ch-ac'bat stoj smul yu'un Dios li Moabe.