Jeremías 47 - Bible in Tzotzil de Chenalhó with Deuterocanon

Sc'oplal c'usi chc'ot ta pasel ta stojol filistaetic

¹ Li Jeremiase ital c'opanatuc yu'un Muc'ul Dios ta sventa c'usi chc'ot ta pasel ta stojol li filistaetique; ja'o laj yich' c'opanel ti c'alal mu'yuc to'ox chbat yules lum Gaza li faraone.

² Jech laj yal li Muc'ul Diose: “Ta xtal muc'ta nojelal uc'um ta norte; bats'i tsots yoc ta xtal. Ta xmuc ta vo' scotol li banamil li'i, xchi'uc li lume, xchi'uc li jnaclumetique, xchi'uc scotol li c'usitic te oye. Scotol li cristianoetic, li jnaclumetique ch-oc' ch-avanic ta vocol.

³ Li totiletique chlaj stsatsalic ta scoj xi'elal ti xbatatet no'ox tal li svoy ca'etique, ti xchac'lajet no'ox tal caretaetique, ti squits'lajet no'ox tal li yacantaque; jech mu'yuc xa ta stuc'ulanic o li xnich'nabique.

⁴ Yu'un ta xa sta sc'ac'alil ta xich'ic ulesel li filistaetique, xchi'uc li lum Tiro, xchi'uc Sidone, xchi'uc li boch'o cuxul to chcomic ti co'ol yo'ntonic xchi'uque. Yu'un li Muc'ul Diose ta xules o li filistaetic ti te liquemic tal ta banamil Caftor ti cacal ta nabe.

⁵ Li lum Gazae ta xjux sjol; li Ascalone mu xa xbac'. Vo'oxuc li scomelaloxuc muc'tic cristianoetic ta vo'onee, ¿baq'uin to chabojilan abec'talic sventa senyail ti oy avocolique?

⁶ Oy boch'o jech chalic: ‘¡Ay, yespada Muc'ul Dios! ¿Baq'uin to chapajes aba? Tic'o aba ochel ta ana; mu xabac', ch'an xi oyan’, xiic.

⁷ ¿Pero c'u x'elan xu' tspajes sba ti me vu'un calojbe mantal chbat scontrain li Ascalón xchi'uc li boch'otic nacajtic ta ti'ti' nabe?”, xi li Muc'ul Diose.