Jeremías 46 - Bible in Tzotzil de Chenalhó with Deuterocanon

Sc'oplal c'usi chc'ot ta pasel ta Egipto

¹ Li Jeremiase ital c'opanatuc yu'un Muc'ul Dios ta sventa c'usi chc'ot ta stojol li muc'tic lumetique.

² Ja' ic'opoj ta scontra li Egiptoe: ja' li yajsoldadotac Necao, faraón ta Egiptoe. Ja' ti te oyic ta lum Carquemis ta nopol uc'um Éufrates yo' bu laj yich' tsalel yu'un ajvalil Nabucodonosor ta Babilonia c'alal xchanibal jabil xa'ox yochel ta ajvalilal ta Judá li Joacim xnich'on Josiase. Jech laj yal li Muc'ul Diose:

³ “¡Chapanic macubbailetic, batanic ta paspleito!

⁴ ¡Cajanbeic smontura li ca'etique! ¡Cajlanic soldadoetic! ¡Aq'uic smac ajolic; cholo abaic batel ta anil! ¡Juxbeic lec sni' li lanzaetique! ¡Aq'uic smac li abec'talique!

⁵ “Pero oy c'usi chquil: Solel chlajic ta xi'el; tsutic xa ta sva'lupatic. Li boch'otic toj tsots yo'ntonique muc xvinaj c'uxi ibatic. Ijatovic batel ta anil, me jutuc mu xa sq'uel sva'lupatic; puru xi'el xa no'ox cha'yic ta jujujot.

⁶ Muc xu' yu'un tspoj sbaic li boch'otic toj tsots yo'ntonique; muc xu' yu'un xjatovic ta anil li boch'otic toj tsots x'anilajique. Te ta norte ta nopol uc'um Eufratese ta sbosi yacanic, ta xyalic ta lum.

⁷ ¿Boch'o ti le' yantic no'ox chtoy muyel jech chac c'u cha'al chnoj uc'um Niloe, ti toyolic no'ox xvil chquile?

⁸ Ja' Egipto ti chtoy muyel jech chac c'u cha'al uc'um Niloe, ti toyolic no'ox xvil jech chac c'u cha'al nojelal uc'ume. Li Egiptoe jech chal: ‘Ta xitoy muyel, ta jmuc scotol li banamile; ta xcules scotol lumetic xchi'uc li jnaclumetic yu'une’, xi.

⁹ “¡Aq'uic persa ca'etic! ¡Jipo abaic batel caretaetic! ¡Loc'anic xa batel soldadoetic! Li soldadoetic ta Etiopía xchi'uc ta Libiae ac'o xa yich' batel li smaquique; li soldadoetic ta Lidiae ac'o xa st'inan batel li st'ilesubil sflechaique.

¹⁰ Li c'ac'al le'e ja' sventa Muc'ul Dios ti tspas ta mantal scotol te ta vinajele; ja' xa sc'ac'alil ta stsal li yajcontrae. Ta stsac lec sve'el li espadae, ta xnoj lec xch'ut; ta xyacub lec yu'un li ch'ich' chuch'e. Li Muc'ul Diose ta spas lec q'uin, chac' lec milbil matanal te ta norte banamil ta nopol uc'um Éufrates.

¹¹ “Jnaclumetic ta Egipto, bat sa'o apoxilic ta Galaad. Ac'o me chasa' ep apoxil, pero mu'yuc poxil ta sventa li vo'ote.

¹² Li yantic lumetique sna'ojic ti mu'yuc xa atu oe; scotol banamil cha'yic cha'avan, yu'un la snet' sba stuquic li boch'o lec xu' yu'unique, jech co'ol te iyalic ta lum”, xi li Muc'ul Diose.

Li Nabucodonosore bat stsac ta c'op li Egiptoe

¹³ Li j'alc'op Jeremiase ital c'opanatuc yu'un Muc'ul Dios, ja' i'albat ti chtal yich' tsaquel ta pleito yu'un ajvalil Nabucodonosor ta Babilonia li Egiptoe:

¹⁴ “Alo batel ta Egipto, puco batel ta Migdol, ta Menfis, xchi'uc ta Tafnes, jech xaval: ‘¡Q'uelo me abaic, bijanic me! Yu'un ta me xtal sti'oxuc acotolic li espadae.

¹⁵ ¿C'u yu'un ibutq'uij li tot vacax Apis ti ja' adiosinoje? ¿C'u yu'un ti mu xu' yu'un lec cotol chcome? Yu'un vu'un la jbutq'uin, vu'un li Muc'ul Diosune.

¹⁶ Toj ep boch'otic chyalic ta lum; te no'ox ta xt'ixilin sba stuquic, jech chalbe sbaic: ‘Licanic, sutcutic batel ta jlumaltic ta cosilaltic ti bu lijvoc'utique; jatovcutic batel ta anil yu'un li espadae’, xut sbaic.

¹⁷ “Jech ta x'avanic, jech ta xalbeic sc'oplal li faraone: ‘Li ajvalil ta Egiptoe tsots chc'opoj, pero mu'yuc c'usi xu' yu'un’, xiic.

¹⁸ Vu'un jtuc Ajvalilun. Vu'un li Muc'ul Diosun ti ta jpas ta mantal scotol te ta vinajele, jech chcal ta sventa ti vu'un cuxulun oe: Jech chac c'u cha'al li vits Tabor ti jeloven ta jol vitsetique, xchi'uc li vits Carmelo ti jeloven to ta sba li nabetique, ja' jech ta xtal li avajcontrae.

¹⁹ Chapano me abaic ta sventa chavich'ic chuquel batel, jnaclumetic ta Egipto, yu'un li lum Menfise ta xc'ataj ta xocol banamil; ta xyavnaij o, mu'yuc yajval chcom o.

²⁰ Li Egiptoe ja' jech chac c'u cha'al jcot tsebal vacax, pero chtal ti'atuc yu'un jcot muc'ta xcoch ta norte.

²¹ Li soldadoetic ti ep tojbilic ta taq'uin yu'une ja' jechic jech chac c'u cha'al juben vacaxetic. Pero ta sutic batel ta sva'lupatic, ta xjatovic batel ta anil ec, yu'un chtal sc'ac'alil li tsots svocolique; tsta yorail chich' li stojol smulique.

²² Li Egiptoe x'i'i'et chjatov batel ta anil jech chac c'u cha'al ora chon, yu'un yich'anoj tal yeq'uelic jech chac c'u cha'al jts'et te'etic li yajcontrataque.

²³ Ta xvul syalesic scotol li pimilal toyol te'etique, ac'o me mu jlec'uc stac' ochentael, yu'un bats'i epic jech chac c'u cha'al c'ulubetic; ac'o me solel mu stac' atel o.

²⁴ Yalem ta q'uexlal chcom li Egiptoe, yu'un ta x'och ta sc'ob li cristianoetic ta nortee”, xi li Muc'ul Diose.

²⁵ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: “Ta xcac'be stoj smul li Amone, li dios ta Tebase, xchi'uc li Egiptoe xchi'uc li diosetic yu'une, li ajvaliletic yu'une, xchi'uc li faraone, xchi'uc li boch'otic ja' spatoj yo'ntonic ta stojole.

²⁶ Ta xcac' ochicuc ta sc'ob yajcontraic, ja' li ajvalil Nabucodonosor ta Babiloniae xchi'uc li svinictaque. Pero li Egiptoe ta to xlic tsatsubicuc ta ts'acal jech chac c'u cha'al ono'ox oyic ta ba'yuque, xichi vu'un li Muc'ul Diosune”, xi.

Li Muc'ul Diose ta scolta li yu'untaque

²⁷ “Smomnich'nab cajtunel Jacob, mu xaxi'ic. Israel, mu xchibaj avo'nton, yu'un vu'un chajcoltaoxuc achi'uc avalab anich'nab ti bu chucbiloxuc batel ta namal banamile. Ta to xasut tal, jun avo'nton chvul naclan; mu'yuc boch'o chasibtasot.

²⁸ Smomnich'nab cajtunel Jacob, mu xaxi', yu'un li' jchi'inojot. Ta xcules scotol li yantic lum ti bu la jpucoxuc batele; Yan li vo'oxuque mu'yuc chaculesoxuc. Lec tuc' ta jtaq'uioxuc; mu xu' ti colem chacomic, ti mu'yuc chacac'boxuc atoj amulique”, xi li Muc'ul Diose.