Jeremías 45 - Bible in Tzotzil de Chenalhó with Deuterocanon

Sc'oplal c'usi i'albat yu'un Dios li Baruque

¹ C'alal xchanibal jabil yochel ta ajvalil ta Judá li Joacim xnich'on Neriase, li Jeremiase jech laj yalbe li Baruc ti c'alal ja'o te ta sts'iba li c'usitic laj yalbee:

² “Vo'ote Baruc, jech chayalbot li Muc'ul Dios yu'un Israele:

³ Li vo'ote jech laj aval: ‘¡Ay, toj abul jba! C'u yu'un laj yepajesbun tsots jvocol, tsots at-o'nton li Muc'ul Diose; solel sta xa co'nton ta aj'unel, mu'yuc ta jcux o jutuc co'nton’, xachi.

⁴ Ja' yu'un chacalbot c'usi laj yalbun li Muc'ul Diose, jech laj yal: ‘A'yo ava'ay ta jines scotol li c'usi vu'un la jva'ane, ta jbul loq'uel li c'usi jts'unoje, ja' jech ta jpas ta scotol li banamil li'i.

⁵ ¿Me oy c'usi tsots sc'oplal chac'an ta aventa? Ja' lec mu xac'an, yu'un ta xcac' taluc tsots vocol ta stojol li boch'otic oy sbec'talique, pero li vo'ote ta xcac' ti cuxul chacom ti buyuc no'ox chabate’, xi li Muc'ul Diose”, xut.