Jeremías 44 - Bible in Tzotzil de Chenalhó with Deuterocanon

Li Jeremiase laj yal c'usi chc'ot ta pasel ta stojol li judaetic ti ibatic ta Egiptoe

¹ Li Jeremiase ital c'opanatuc yu'un Dios ta sventa c'usi chc'ot ta pasel ta stojol li judaetic ti te xa nacalic ta yosilal Egipto, te ta lum Migdol, Tafnes, Menfis, xchi'uc ta yosilal Patrose. Jech i'albat:

² “Jech chcal vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: ‘Li vo'oxuque laj avilic scotol li vocol laj cac' tal ta Jerusalén xchi'uc ta scotol lumetic ta Judae, ja' yu'un li' ta orae xch'ijan xa; mu'yuc xa boch'o te nacal.

³ Ja' ta scoj ti toj chopol c'usi la spasique, jech laj yaq'uic ilincun, yu'un ja' bat yich'ic ta muc' li yantic diosetique; ja' bat xchic'beic pom ta stojol li yantic diosetic ti mu xavotquinique, me ja'uc li amoltot ayame'ic ta vo'onee muc xotquinic ec.

⁴ Scotol c'ac'al la jtaquilanboxuc tal ta atojolic li cajtuneltac, ja' li j'alc'opetique. Mu'yuc bu la jquechan staquel tal, tal yalboxuc ti mu xapasic li c'usi toj chopole, yu'un mu lecuc chquil.

⁵ Pero muc xach'unic, muc xavich'ic ta muc'; muc xacomtsanic li c'usi toj chopol chapasique ti chachic'beic pom ta stojol li yantic diosetique.

⁶ Ja' yu'un la jmal loq'uel li sc'ac'al co'ntone; itsan jech chac c'u cha'al c'oc' te ta lumetic ta Judá xchi'uc ta xoraltic ta Jerusalén. Ja' yu'un isoc o, iyavnaij o, jech chac c'u cha'al chavilic li' ta orae.

⁷ ‘Ja' yu'un jech chcal vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: ¿C'u yu'un ti chasa' atuquic li tsatsal vocol chtal ta atojolique? ¿C'u yu'un ti chavaq'uic uluc te ta Judá li vinic antsetic, li querem tsebetic, li bic'tal ololetic ti chchu'unic toe, yu'un jech mu'yuc xa boch'o chcom o avu'unique?

⁸ Yu'un ja' no'ox chavaq'uic ilincun ta sventa li c'usi apasoj ta ac'obique, xchi'uc ti chachiq'uic pom ta stojol li yantic diosetic te ta Egipto ti bu talemoxuc ta nacleje. Ja' xa no'ox amotonic ti chaculesoxuc o, ti chopol chacomic o, ti mu'yuc atu cha'ilatic o yu'un li yantic banamile.

⁹ ¿Me yu'un ich'ay ta avo'ntonic li smul amoltot ayame'ic ta vo'onee, li smul ajvaliletic ta Judae, xchi'uc li smul yajnilique, xchi'uc amul atuquic ec, xchi'uc smul avajnilic ti laj asa'ic ta yosilal Judá xchi'uc ta xoraltic ta Jerusalene?

¹⁰ Li' ta orae mu'yuc chabic'tajes abaic o; mu'yuc bu chaxi'ic cu'un. Mu ja'uc chapasic c'usi chal li mantaletic, li chanubtaseletic cu'un ti laj cac'boxuc achi'uc li amoltot ayame'ique.

¹¹ ‘Ja' yu'un jech chcal vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: Nopbil xa cu'un ti ta xcac' tal avocolic, ti ta xcules o scotol li Judae.

¹² Li scomelal judaetic ti la sc'upinic batel, bat naquiicuc ta Egiptoe te ta x'ulic scotolic ta Egipto. Te ta xlajic ta milel, ta vi'nal c'alal ta muc' ta biq'uit. Jech mu'yuc xa stuic, labanbilic, bajbilic chcomic o.

¹³ Li boch'otic te ono'ox nacalic ta Egiptoe ta xcac'be stoj smulic jech chac c'u cha'al laj cac'be stoj smulic ta milel, ta vi'nal, xchi'uc ta tsatsal chamel li Jerusalene.

¹⁴ Li scomelal judaetic ti ibatic ta naclej ta Egiptoe me junuc mu'yuc boch'o chcol; mu'yuc boch'o cuxul chcom ti xu' to chbat nacluc yan velta ta yosilal Judae. Ac'o me tsc'an to chbat naquiicuc te, pero mu'yuc xa tsutic, ja' xa no'ox me oy to jun chibuc chjatovic sutele’, xi li Muc'ul Diose”, xi li Jeremiase.

¹⁵ Ja' yu'un li boch'o sna'ojic ti la xchiq'uic pom ta stojol yantic diosetic li yajnilique, xchi'uc li yantic antsetique, bats'i ep te stsoboj sbaic ta jyalel. Te oyic ec li judaetic te nacajtic ta Patros ta yosilal Egiptoe, jech laj yalbeic li Jeremiase:

¹⁶ —Mu jch'uncutic c'usi chavalbuncutic ta sventa li Muc'ul Diose.

¹⁷ Ja' no'ox ta jpascutic o li c'usi calojcutic xa ta jpascutique. Ja' ta jchic'cutic o pom ta stojol, xchi'uc ta xcac'becutic o matanaletic ta stojol li Me'ajvalil sventa Vinajel jech chac c'u cha'al ta jpascutic li' ta orae, xchi'uc jech chac c'u cha'al la spasic ono'ox tal li jmoltot jyame'tique, xchi'uc li ajvaliletic, li banquilaletic cu'untic ta lumetic ta Judá xchi'uc ta xoraltic ta Jerusalene. Oy to'ox lec jve'elcutic, xcuxet no'ox co'ntoncutic; me jutuc mu'yuc xquilcutic vocol.

¹⁸ Pero c'alal la jcomtsancutic xchiq'uel pom, xchi'uc yaq'uel pasem ya'lel ts'usub ta stojol li Me'ajvalil sventa Vinajele, mu'yuc xa c'usi oy cu'uncutic, puru milel, puru vi'nal xa chismiluncutic —xiic.

¹⁹ Jech laj yalic ec li antsetique: —C'alal la jchic'cutic pom, laj cac'cutic pasem ya'lel ts'usub ta stojol li Me'ajvalil sventa Vinajele, vu'uncutic la jpascutic li pan ti yich'ojbe sloc'obal li Me'ajvalil sventa Vinajele, pero lec yabinoj jmalalcutic scotol ti jech la jpascutique, xchi'uc jech la sc'anic ec —xiic.

²⁰ Li Jeremiase jech la stac'be scotol li vinic antsetic ti ilo'ilajique:

²¹ —¿Me yu'un mu xa sna', mu xa sventauc acuyojic li Muc'ul Dios ti laj achiq'uic pom ta lumetic ta Judá xchi'uc ta xoraltic ta Jerusalén achi'uc li amoltotaquic, li ajvaliletic, li banquilaletic avu'unic, xchi'uc scotol li jchi'iltactique?

²² Yu'un muc xa sts'ic yu'un laj ya'ay ti toj chopol c'usi chapasique, ja' yu'un li avosilalique la syavnaijes. Toj xi'bal sba ta q'uelel, chopol sc'oplal o; mu'yuc yajval icom o jech chac c'u cha'al li' ta orae.

²³ Yu'un laj achiq'uic pom ta stojol yantic diosetic, jech laj ata amulic ta stojol li Muc'ul Diose. Muc ja'uc xavich'ic ta muc' li mantaletic, li chanubtaseletic xchi'uc li tojobtasel yu'une, ja' yu'un ital li vocol ta atojolic jech chac c'u cha'al li' ta orae —xut.

²⁴ Li Jeremiase jech to laj yalbe scotol li xchi'iltaque xchi'uc li antsetique: —Judaetic, a'yo ava'yic c'usi chal Muc'ul Dios vo'oxuc ti te nacaloxuc ta Egiptoe.

²⁵ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: ‘Li vo'oxuc xchi'uc avajnilique oy c'usi laj aval ta aveic; oy c'usi laj apasbeic sc'obilal, jech laj avalic: Ta persa ta jpastic ti calojtic ta jamal ta jchic'tic pom, chcac'tic pasem ya'lel ts'usub ta stojol li Me'ajvalil sventa Vinajele, xachiic. Lec oy, pasic, c'otuc me ta pasel avu'unic li c'usi avalojic ta jamale.

²⁶ Judaetic, vo'oxuc ti te xa nacaloxuc ta Egiptoe, a'yo ava'yic c'usi chcal vu'un li Muc'ul Diosune: Oy c'usi jamal chcal ec ta sventa smuc'ul li jbie. Me junuc judaetic mu'yuc xa chiyalbicun o jbi te ta Egipto: Ich'biluc ta muc' Muc'ul Dios, ja' li Ajvalile, mu'yuc xa boch'o xi.

²⁷ Yu'un ta ono'ox xcac' tal tsots avocolic; muc alequilalicuc ta xcac' tal. Vo'oxuc ti te nacaloxuc ta Egiptoe chalajic ta milel, chalajic ta vi'nal, ja' to me la'ul acotolique.

²⁸ Jayibuc xa no'ox ta xcolic ta milel te ta Egipto, ja' ta sutic to batel ta Judá. Vo'oxuc ti te bat naclanic ta Egiptoe, te chvinaj boch'o chc'ot ta pasel sc'op, me vo'oxuc, o me vu'un.

²⁹ Vu'un li Muc'ul Diosune ta xcac'boxuc avilic sq'uelubil ti ta melel chc'ot ta pasele; chacac'boxuc atoj amulic li' ta banamil.

³⁰ Ta xcac' ochuc ta sc'ob yajcontra li ajvalil Hofra, faraón ta Egiptoe, jech chac c'u cha'al laj cac' ochuc ta sc'ob yajcontra li ajvalil Sedequiase, ja' li Nabucodonosor ajvalil ta Babiloniae, ja' li yajcontra ti pajal ono'ox sc'oplal chmilat yu'une’, xi li Muc'ul Diose —xi li Jeremiase.