Jeremías 42 - Bible in Tzotzil de Chenalhó with Deuterocanon

Li judaetique la sc'anbeic vocol Jeremías ti ac'o c'opanbatuc Dios ta stojolique

¹ Li banquilal soldadoetique xchi'uc li Johanán xnich'on Careae, xchi'uc li Azarías xnich'on Osaiase, xchi'uc scotol li judaetic c'alal ta biq'uit ta muq'ue,

² ibatic ta stojol li j'alc'op Jeremiase, jech laj yalbeic: —Avocoluc pasbuncutic li c'usi chajc'anbotcutique; c'opano Muc'ul Dios avu'un ta jventacutic ti c'u to quepal licomcutique. Ta vo'onee epuncutic to'ox, pero li' ta orae bats'i mu'yuc xa epuncutic jech chac c'u cha'al chavil ta asat li' ta orae.

³ C'anbo vocol Dios avu'un, yu'un ac'o yac' quilcutic ti bu beal ta jtamcutic batele xchi'uc li c'usi tsc'an ta jpascutique —xutic.

⁴ Li j'alc'op Jeremiase jech laj yal: —Lec oy, xu' ta jc'anbe vocol li Dios jech chac c'u cha'al chac'anbicune. Scotol c'usi chiyalbun li Muc'ul Diose ta xcalboxuc ava'yic scotol, me jutuc mu'yuc ta jmucboxuc ta co'nton jbeluc —xi.

⁵ Jech laj yalbeic li Jeremiase: —Li Dios avu'une ja' tsva'an sba ta tuq'uil testigo ta jtojolcutic ti me muc jch'uncutic li c'usi chayalbote.

⁶ Me xc'ot ta co'ntoncutic, me mu xc'ot ta co'ntoncutic c'usi chayalbot tal li Muc'ul Dios cu'untique, ta jch'uncutic ono'ox, yu'un jech lec chibatcutic me ta jch'uncutic c'usi chal li Muc'ul Dios cu'untique —xiic.

Itac'bat sc'op yu'un Muc'ul Dios li Jeremiase

⁷ C'alal i'ech' xa'ox lajuneb c'ac'ale, ital c'opanatuc yu'un Muc'ul Dios li Jeremiase.

⁸ Te laj yic' li Johanán xchi'uc scotol li banquilal soldadoetic te xchi'uque, xchi'uc scotol li xchi'iltaquic c'alal ta biq'uit ta muq'ue,

⁹ jech laj yalbe: “Li Muc'ul Dios, ja' li Dios yu'un Israele, ja' li boch'o laj avalbicun ta jc'anbe vocol ta aventaique, jech chal:

¹⁰ ‘Me jun avo'ntonic ch'anxachi nacaloxuc li' ta avosilalique, ta jva'anoxuc lec; mu'yuc ta jbutq'uinoxuc. Ta jts'unoxuc lec; mu'yuc ta jbuloxuc loq'uel. Yu'un laj xa jsutes co'nton ta sventa li c'usi chopol la jpasboxuque.

¹¹ Mu loq'uel xaxi'ic yu'un li ajvalil ta Babiloniae. Mu xaxi'ic yu'un; vu'un chajcoltaoxuc loq'uel ta sc'ob, ja' yu'un mu xaxi'ic.

¹² Toj ep c'uxoxuc ta co'nton. Ta xcac' ti ac'o xc'uxubinoxuc ec li ajvalile; ta xcac' ti ac'o yac' sutanic batel ta avosilalique’, xi.

¹³ “Yan me mu xac'an xanaquiic li'i, me mu xc'ot ta avo'ntonic c'usi chal li Muc'ul Diose,

¹⁴ me jech chavalique: ‘Mu jc'an xicomcutic li'i, ja' te chbat naquicuncutic ta Egipto. Mu'yuc chquilcutic c'op te; mu'yuc chca'icutic oq'ues sventa pleito, xchi'uc mu'yuc vi'nal te’, me xachiique,

¹⁵ vo'oxuc ti scomelaloxuc Judae, a'yo ava'yic c'usi chal li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: ‘Me yu'un ja' te oy avo'ntonic chac'an chabatic ta naclej ta Egiptoe,

¹⁶ te ono'ox chataic milel ta espada xchi'uc vi'nal ti ja' chaxi'ic yu'une. Te chavich'ic uts'intael ta Egipto; te chachamic o.

¹⁷ Scotol li boch'otic te batem yo'ntonic tsc'an chbatic ta naclej ta Egiptoe te ta xlajic ta milel, ta xchamic ta vi'nal, ta xchamic ta tsatsal chamel. Jech mu'yuc boch'o cuxul ta xcom; mu'yuc boch'o xu' yu'un ta spoj sba ta sventa li vocol ta jtac batele’, xi li Muc'ul Diose.

¹⁸ “Jech chal noxtoc li Muc'ul Dios ti tspas ta mantal scotol te ta vinajele, ja' li Dios yu'un Israele: ‘Jech chac c'u cha'al la jmal loq'uel sc'ac'al co'nton ta stojol li jnaclumetic ta Jerusalene, ja' jech ta jmal loq'uel sc'ac'al co'nton ta atojolic noxtoc vo'oxuc ti te chabatic ta Egiptoe. Jech na'lebiloxuc, toj chopol ac'oplalic, labanbiloxuc, bajbiloxuc chacomic ta stojol li yantic cristianoetique; mu'yuc xa chtal aq'uelic o yan velta li banamil li'i’, xayutoxuc li Muc'ul Diose.

¹⁹ Vo'oxuc ti scomelaloxuc Judae jech chacalboxuc: Mu me xabatic ta Egipto; nopo ava'yic lec, ja' yu'un ta xcac'boxuc lec ana'ic.

²⁰ ¿C'u yu'un ti ja' no'ox chasa' avocol atuquique? Yu'un vo'oxuc atuquic laj avalbicun ti ac'o jc'opan li Muc'ul Dios cu'untique, jech laj avalbicun: ‘C'anbo vocol ta jtojolcutic li Muc'ul Dios avu'une; albun ca'icutic scotol li c'usitic chayalbote, ta jch'uncutic’, xavuticun.

²¹ Ja' yu'un jamal laj calboxuc c'usitic laj yal Muc'ul Dios cu'untic ti ac'o apasique, pero mu xach'unic.

²² Ja' yu'un a'yo ava'yic, ti bu lumal anopoj chbat naclanique ta melel te chachamic ta espada, ta vi'nal, xchi'uc ta tsatsal chamel”, xi li Jeremiase.