Jeremías 41 - Bible in Tzotzil de Chenalhó with Deuterocanon

Imilat li Gedaliase

¹ Ta svucubal u ibat sc'opan Gedalías te ta Mizpa li Ismael xnich'on Netanías smomnich'on Elisama, ja' li bats'i smomnich'nab li boch'otic i'ochic tal ta ajvalilale, xchi'inoj batel lajuneb xchi'iltac. C'alal ja'o te co'ol chve'ique,

² ilic li Ismaele xchi'uc li lajuneb xchi'iltaque; la smilic ta espada li ajvalil Gedalías ti ja' itic'at ta ajvalilal yu'un li ajvalil ta Babilonia te ta yosilalique.

³ La smilic noxtoc li judaetic ti te xchi'inojic li Gedalías te ta Mizpae, xchi'uc la smilic noxtoc li caldea soldadoetic te oyique.

⁴ Ta yoc'omal c'alal ja' to la smilic li Gedaliase, mu'yuc to'ox boch'o sna'oj ti jech ic'ot ta pasele.

⁵ Ja'o italic jayibuc viniquetic ta Siquem, ta Silo, xchi'uc ta Samaria; ja' chanvinic (80) viniquetic ta scotolic, xjuxanoj tal yisimic, li'emic sc'u'ic, xtuch'anojic tal sbec'talic, yich'anojic tal matanaletic, xchi'uc pom sventa tal yaq'uic ta ch'ulna yu'un li Muc'ul Diose.

⁶ Li Ismaele iloc' batel ta Mizpa te ch-oc' batel ta be. C'alal la snupanan ta bee, jech laj yalbe: —La' q'uelavilic li Gedalías xnich'on Ahicame —xut.

⁷ C'alal ic'otic ta yut lume, li Ismael xchi'uc xchi'iltaque te no'ox la smilic; te la stiq'uic ta jun natil joc'.

⁸ Pero oy lajuneb viniquetic ti mu'yuc to xmilatique, jech laj yalbeic li Ismaele: —Mu xamiluncutic, yu'un oy ep trigo, cebada, aceite, xchi'uc spom muc'ta pom le' jnac'ojcutic ta te'tic —xutic. Jech muc co'oluc xmilatic xchi'uc li yantic xchi'iltaquique.

⁹ Li joc' bu la stic' scotol boch'otic la smil li Ismaele, ja' li joc' laj yac' ta pasel ajvalil Asa ta sventa tsnac' sba ta scoj li ajvalil Baasa te ta Israele. Pero li Ismaele la snojes ta animaetic.

¹⁰ Li Ismaele la xchuc batel scotol li boch'otic te comenic ta Mizpae xchi'uc li stsebetic ajvalil ti ja' to'ox la sventain Gedalías ta smantal li banquilal jchabivanej Nabuzaradane. Te laj yac' jelovicuc batel ta yosilal li amonetique.

¹¹ Li Johanán xnich'on Carea xchi'uc li banquilal soldadoetic te xchi'inoje laj ya'yic scotol c'usi chopol la spas li Ismael xnich'on Netaniase.

¹² Jech lic stsob batel scotol li xchi'iltaquique, bat scontrainic li Ismaele. Te la staic ta nopol stanqueal vo' ta Gabaón.

¹³ Scotol li boch'otic chucbilic batel yu'un li Ismaele xcuxet xa yo'ntonic ti c'alal laj yilic li Johanán xchi'uc scotol li banquilal soldadoetic te xchi'inoj batele.

¹⁴ Scotol li boch'otic ay xchuc loq'uel ta Mizpa li Ismaele ibatic ta stojol Johanán scotolic.

¹⁵ Li Ismaele ixi' yu'un li Johanane, jech ijatovic batel ta yosilal amonetic xchi'uc vaxquib xchi'iltac.

¹⁶ Li Johanán xchi'uc li banquilal soldadoetic te xchi'uque; laj yiq'uic sutel scotol li xchi'iltaquic ti ay xchuc loq'uel ta Mizpa li Ismael c'alal laj xa'ox smil comel li Gedaliase, ja' li soldadoetic, li antsetic, li ololetic xchi'uc li boch'otic tsots yabtelique. Jech te laj yic' loq'uel ta Gabaón.

¹⁷ Jech ibatic, te ic'ot naquiicuc ta Gerut-quimam te ta nopol Belén. Snopojic ti chbatic c'alal to ta Egipto banamile,

¹⁸ yu'un ta xi'ic yu'un li caldeaetic ta scoj ti la smil Gedalías li Ismaele; yu'un li ajvalil ta Babiloniae ja' la stic' comel ta ajvalilal te ta yosilalic.