Jeremías 40 - Bible in Tzotzil de Chenalhó with Deuterocanon

Li Jeremiase te icom naquiuc xchi'uc li Gedaliase xchi'uc li yantic te icomique

¹ Li Jeremiase ital c'opanatuc yu'un Muc'ul Dios ti c'alal laj xa'ox yich' coltael ta chuquel te ta Ramá yu'un banquilal jchabivanej Nabuzaradane. Yu'un te chucul ta cadena itaat yu'un Nabuzaradán ta stojol scotol li viniquetic ta Jerusalén xchi'uc ta Judá ti talem yich'ic chuquel batel ta Babiloniae.

² Li banquilal jchabivanej Nabuzaradane laj yic' li Jeremiase, jech laj yalbe: “Li Muc'ul Dios avu'une laj ono'ox yal ti chtal vocol li' ta banamile.

³ Jech laj xa yac' c'otuc ta pasel li c'usi yaloje. Ja' ta scoj ti laj ata amulic ta stojole, ti muc xavich'ic ta muq'ue, ja' yu'un ti jech ic'ot ta pasel ta atojolique.

⁴ Pero li' ta orae laj xa jcoltaot ti chucbilot to'ox ta cadenae. Me chac'an chbat achi'inun ta Babiloniae, batic; vu'un chajchabiot. Pero me mu xac'an xabate, jechuc xu' chacom. Q'uelo avil scotol li banamil li'i, oy ta ac'ob; xu' te chabat ti bu jotucal lec chava'ye.

⁵ Yan me chac'an chasute, bat chi'ino li Gedalías xnich'on Ahicam smomnich'on Safane, yu'un li ajvalil ta Babiloniae ja' xa la stic' ta ajvalilal ta sventa scotol li lumetic li' ta Judae. Te chi'ino ta naclej xchi'uc li achi'iltaque. Xu' chanop atuc ti bu chac'ane”, xut. Laj yac'be comel smoton, laj yac'be sve'el; te la svoc' sbaic, jech ibat.

⁶ Li Jeremiase bat xchi'in li Gedalías xnich'on Ahicam te ta Mizpae; te la xchi'in ta naclej li xchi'iltac ti te icomic ta yosilalique.

⁷ C'alal te snac'oj sbaic ta te'tic li banquilal soldado yu'un judaetic xchi'uc svinictaquique, laj ya'yic ti ja' xa la stic' ta ajvalilal te ta slumalic li Gedalías xnich'on Ahicam li ajvalil ta Babiloniae, xchi'uc ti ja' laj yac'be comel sventain li vinic antsetic xchi'uc li ololetic ti ven me'onic te ta yosilalique, ja' li boch'otic mu'yuc laj yich'ic chuquel batel ta Babiloniae.

⁸ Jech ta ora no'ox ibatic ta stojol Gedalías te ta Mizpa, ja'ic li Ismael xnich'on Netanías, Johanán, xchi'uc Jonatán xnich'nab Carea, Seraías xnich'on Tanhumet, xchi'uc xnich'nab Efai ta Netofa, xchi'uc Jezanías xnich'on jun Maaca vinic, xchi'uc svinictaquic.

⁹ Li Gedalías xnich'on Ahicame jech laj yalbe ta jamal ta stojol Dios li boch'otic te ic'otic xchi'uc svinictaquique: “Mu xaxi'ic, junuc avo'ntonic tunanic yu'un li caldeaetique. Te naclanic ta avosilalic, pero ac'o abaic ta sc'ob li ajvalil ta Babiloniae, jech lec chabatic.

¹⁰ Li vu'une li' chinaqui ta Mizpa, jech vu'un chic'opoj ta aventaic ti c'alal ta xtalic li caldeaetic li'i. Li vo'oxuque tsobic ep li ya'lel ts'usube, li sat te'etique, xchi'uc li aceitee, tiq'uic ta snail; te comanic o ta lumetic avu'unic ti bu aventainojique”, xut.

¹¹ Jech noxtoc li yantic judaetic ti te ibatic ta Moab, ta Amón, ta Edom, xchi'uc ta yantic banamile, laj ya'yic ti oy to boch'o la scomtsan te ta Judá li ajvalil ta Babiloniae. Xchi'uc laj ya'yic ti ja' xa la st'ujbe comel ta ajvalilal yu'unic li Gedalías xnich'on Ahicam smomnich'on Safane.

¹² Ja' yu'un scotol iloq'uic batel te ta lum ti bu la spuc sbaic batele; isutic batel ta yosilal ta Judá te ta stojol Gedalías ta Mizpa. Te c'ot stsobic ep ya'lel sts'usub xchi'uc ep sat te'etic.

Li Ismaele la snop c'u x'elan xu' ta smil ta mucul li Gedaliase

¹³ Li Johanán xnich'on Carea xchi'uc scotol li banquilal soldadoetic te oyic ta te'tique te italic ta stojol Gedalías te ta Mizpa.

¹⁴ Jech laj yalbeic: —¿Me mu xana' ti tacbil tal yu'un Baalis ajvalil ta Amón li Ismael xnich'on Netanías sventa chtal smilote? —xut. Li Gedaliase muc xch'un.

¹⁵ Ja' yu'un li Johanán xnich'on Careae jech lic yalbe ta mucul li Gedaliase: —Vu'un chbat jmil li Ismael xnich'on Netaniase, jech mu'yuc boch'o xu' tsna' o. Yu'un mu lecuc me vo'ot chtal smilote, yu'un jech xu' tspuc sbaic batel scotol li judaetic ti li' tsobolic ta atojole, jech ta x'ul o li scomelal judaetic li' comenique —xut.

¹⁶ Pero li Gedalías xnich'on Ahicame jech la stac'be li Johanán xnich'on Careae: —Mu xapas jech; mu meleluc c'usi chaval ta sventa li Ismaele —xut.