Jeremías 4 - Bible in Tzotzil de Chenalhó with Deuterocanon

Taq'uiel ta sventa ac'o sutes yo'ntonic

¹ Jech chcal vu'un li Muc'ul Diosune: “Israel, me chac'an chasut tale, la' me li' ta jtojole. Me chajip comel ta avo'nton li c'usi toj chopol chquile, me mu xabat ta buyuc no'oxe,

² xu' chaval ta jamal ta sventa jbi. Tsc'an melel, lec cuxul avo'nton, lec oy stuq'uil li c'usi chavale. Vu'un ta jventa tstaic bendición li muc'tic lumetique, xchi'uc vu'un ta jventa ta xmuq'uib lec sc'oplalic”, xi li Muc'ul Diose.

³ Li Muc'ul Diose jech chalbe li jnaclumetic ta Judá xchi'uc ta Jerusalene: “Loquic lec li avosilic ti bu mu'yuc locbil lec avu'unique; mu me staojuc yav ti ta ch'ixtic no'ox chats'unubajique.

⁴ Vinic antsetic ta Judá, jnaclumetic ta Jerusalén, ich'ic circuncisión ta avo'ntonic ta jventa vu'un li Muc'ul Diosune. Loq'uesic li c'usi macal o, li c'usi pixil o avo'ntonique; yu'un naca me stsan jech chac c'u cha'al c'oc' li sc'ac'al co'nton ta scoj amulique, yu'un mu'yuc boch'o xu' yu'un tstu'p o.

Ta xtal yich' tsaquel ta pleito li Judae

⁵ “Puquic mantal ta Judá xchi'uc ta Jerusalén; jupanic oq'ues ta scotol avosilalic; avananic, jech xavalic: ‘Batic ta lumetic ti bu lec setbilic ta coraltone, te jnac' jbatic’, chianic.

⁶ Va'anic senyail ta vits Sión; jatovanic, sa'o lec anac'ubbailic, mu me teuc no'ox xacomic; yu'un ta jtac tal tsots vocol, ta jtac tal milel, xchi'uc ulesel ta stuq'uil norte.

⁷ Li leone loq'uem xa tal ta xch'en; li boch'o ta sjines jujun banamile sbats'il xa tal xanubal, loq'uem xa tal ta yosilal, yu'un chtal yules li avosilalic, li lumetic avu'unique; ta sjines comel, mu'yuc xa yajval chcom yu'unic o.

⁸ Ja' lec lapic c'u'il sventa at-o'nton; ato avo'ntonic, oc'tao abaic, yu'un te me oy o ta atojolic li sc'ac'al co'ntone.”

⁹ “C'alal me ic'ot li sc'ac'alil le'e, ta xniquic ta xi'el li ajvalil xchi'uc li banquilaletique. Li paleetique toj batel xch'ulel chc'otic; li j'alc'opetique toj ch'ayel chc'ot yo'ntonic”, xi li Muc'ul Diose.

¹⁰ Jech laj cal: “¡Ay, Muc'ul Dios, toj ech'em laj alo'la li jchi'iltac li'i xchi'uc li jchi'iltac te ta Jerusalene! Yu'un avalojbe ti chavac'be jun yo'ntonique, pero xco'laj xchi'uc tijil xa espada ta sbec'talic”, xcut.

¹¹ C'alal me ic'ot yorail le'e, ja' jech chich' albel li lum li'i xchi'uc li Jerusalene: “Muc'ta q'uixin ic' ta xtal ta stojol li jteclumale, ja' te chlic tal ta vitsetic ta xocol banamil; li iq'ue mu ja'uc no'ox jech chac c'u cha'al li ic' sventa chich' ic'ael o trigoe.

¹² Li ic' ti ta jmantal ta xtale bats'i ven tsots, ven xi'bal sba; vu'un chcal jtuc ti ja' jech li stojol mulil chtal ta stojolique”, xi li Muc'ul Diose.

Li israeletique tal yich'ic setuel yu'un li yajcontraique

¹³ Q'uelavilic, li avajcontraique toyolic no'ox xchechte-chechteic tal jech chac c'u cha'al toc; li scaretaique ja' jech chac c'u cha'al sutub ic' ta xtal; li sca'ique bats'i xviletic no'ox tal ta anil jech chac c'u cha'al xic. ¡Ay, toj abul jbatic, yu'un lij'och xa o ta c'abal!

¹⁴ Jerusalén, ac'o ta poquel li sbolil avo'ntone, ja' no'ox jech xu' chacol. ¿Baq'uin to chaloq'ues ta atojol li c'usi chopol ta nopele?

¹⁵ Te to ta Dan ta xlic vinajuc tal a'yej; te to ta vitsetic yu'un Efraín ta xvinaj ti chtal tsots vocole:

¹⁶ “Alic batel ta scotol lumetic xchi'uc ta Jerusalén ti talem jcontrainvanejetic ta namal banamile. Tsots ch-avanic tal ta scontrainel li lumetic ta Judae.

¹⁷ Ta xich'ic setuel jech chac c'u cha'al chololic no'ox ta smaquel yosilic, yu'un la stoy sbaic ta jtojol, vu'un li Muc'ul Diosune.”

¹⁸ “Ja' ta scoj chopol avabtel, chopol c'usi laj apas ti jech chc'ot ta pasel ta atojole. Ja' ta scoj achopolil ti toj c'ux avocole, ti toj ep svocol chava'ay li avo'ntone”, xi li Muc'ul Diose.

Li Jeremiase toj abul sba laj ya'ay li steclumale

¹⁹ ¡Ay, toj c'ux li jvocole! Solel xlaj xtu'p ta jyalel li co'ntone, xpujpun ta jyalel li co'ntone. Ta persa chcal, yu'un chca'ay ti tsjupanic tal oq'ues ti ch-avanic tal ta sventa pleito li jcontrainvanejetique.

²⁰ Solel mu'yuc chquechaj o li tsatsal vocole; solel chich' soquesel o scotol li cosilaltique. Ta anil no'ox chich' vuq'uesel li carpanaetique, chich' jinesel scotol li jnatique.

²¹ ¿C'u to sjalil jq'ueloj muyem li sbanderaique, c'u to sjalil te chca'ay o ch-oc' li yoq'uesic sventa pleitoe?

²² Jech chal li Muc'ul Diose: “Li jteclumale toj bolic ta jyalel, mu xiyotquinicun. Li calab jnich'nabe jeche' oyic ta banamil, mu'yuc sbijilic; mu xa'ibeic o smelol. Ja' no'ox bijic ta spasel li c'usi chopole, yan li c'usi leque ja' mu sna'ic spasel”, xi li Diose.

Li Jeremiase laj yil c'u x'elan ta to xich' lajesel soquesel scotol

²³ C'alal la jq'uel li banamile, ja' to laj quil ti xch'ijan, ti yavnaijem oe; c'alal la jq'uel noxtoc li vinajele, mu'yuc xa c'usi yac'oj xojobal o.

²⁴ La jq'uel noxtoc li vitsetique, solel xniclajetic ta jyalel; scotol li bic'tal vitsetique xnechlajetic noxtoc.

²⁵ Mu'yuc xa cristianoetic laj quil noxtoc, xchi'uc mu xa jcotuc mutetic xvinaj, ijatov batel scotol.

²⁶ Li yaxal osile pasem xa ta xocol banamil laj quil; scotol li lumetic yu'une jinem scotol ta scoj stsatsal sc'ac'al yo'nton li Muc'ul Diose.

²⁷ Jech chal li Muc'ul Diose: “Ta xich' soquesel scotol li avosilalique, pero muc j'ech'eluc ta jlajesbe o sc'oplal.

²⁸ Li banamile ta xnoj ta at-o'nton, li vinajele ta x'ic'um ta scoj me'nal. Yu'un li c'usi laj cale laj cal o; li c'usi la jnope la jnop o; mu'yuc ta jsutes jc'op, mu'yuc chisut ta jva'lupat.

²⁹ C'alal cha'yic ti viquil ch'avalic tal li j'ac'flechaetique xchi'uc li boch'otic cajalic tal ta ca'e, ta xjatovic loq'uel ta anil scotol li cristianoetic ta lume. Ta snac' sbaic ta pimilal toyolal te'tic, ta xch'icanan sbaic ta chuculal ch'entic, solel mu'yuc xa yajval chcom o li lumetique solel xch'ijan chcom o.

³⁰ Lum, vo'ot ti jinemot oe, ¿c'usi chapas? Ac'o me chalap lec ac'u' ic'ic'tic sba stsajal, ac'o me chabon lec sti'ti' asat, ac'o me chac'ac'umtas lec aba ta c'anal taq'uinetic, pero altic no'ox ti lec chameltsan abae; yu'un li boch'otic lec to'ox sc'anojicote ta xa sbajicot, ta xa sa'icot sventa chasmilicot.

³¹ Yu'un ta xca'ay oy boch'o x'ayet jech chac c'u cha'al jun ants c'alal chcux ti ja' sba yol toe; ja' snuq'uic li yajval Sione, tsots ch-avanic, ch-oq'uic; xbechoj sc'obic, jech chalic: ‘¡Ay, toj abul jba, chi'alub xa ta xi'el ta scoj ti chismilicun li jmilvanejetique!’, xiic.