Jeremías 39 - Bible in Tzotzil de Chenalhó with Deuterocanon

Laj yich' jinesel Jerusalén

¹ C'alal slajunebal xa'ox u stsacoj li sbalunebal jabil yochel ta ajvalilal ta Judá li Sedequiase, ja'o italic xchi'uc scotol yajsoldadotac li Nabucodonosor ajvalil ta Babiloniae; ital setuic li Jerusalene.

² Ta sbalunebal c'ac'al yochel xchanibal u ta xbuluchibal (11) jabil yochel ta ajvalilal ta Judá li Sedequiase, ja'o ijam ochel yu'unic Jerusalén li soldadoetique.

³ Scotol li banquilaletic yu'un ajvalil ta Babiloniae i'ochic batel; te la snacan lec sbaic ta muc'ta ti'coralton. Ja'ic li Nergal-sarezer, Samgar-nebo, Sarsequim, ja' li mero banquilaletic yu'un ajvalile, xchi'uc yan Nergal-sarezer ja' banquilal noxtoc.

⁴ C'alal laj yilic ajvalil Sedequías xchi'uc yajsoldadotac ti jech ic'ot ta pasele, ijatovic loq'uel ta ac'ubaltic. Ja' la stamic batel li sbelal ts'unubaltic yu'un ajvalil te ta ti'na ta sjap bu cha'c'ol coraltone, jech la stamic batel sbelal Arabá.

⁵ Pero li soldadoetic yu'un caldeaetique la snutsic batel; te la staic ta stenlejaltic ta Jericó li ajvalil Sedequiase. La stsaquic, laj yiq'uic batel ta stojol Nabucodonosor te ta Ribla ta yosilal Hamat. Li Nabucodonosore te lic yal c'usi ac'o yich' pasbel.

⁶ Li ajvalil ta Babiloniae te ta sat Sedequías laj yac' ta c'ocanbel sjol li xnich'nabe xchi'uc li banquilaletic yu'un te ta Judae.

⁷ Li ajvalil Sedequiase la sloq'uesbeic xchibal sbec' sat, xchi'uc la xchuquic ta cadena, laj yiq'uic batel ta Babilonia.

⁸ Li caldeaetique laj yac'beic sc'ac'al li spasubmantal ajvalile xchi'uc scotol li naetic te ta lume, xchi'uc la sjinesic li coraltonetic yu'un Jerusalene.

⁹ Li boch'otic te to oyic ta Jerusalene, xchi'uc li boch'otic laj xa yac' sbaic ta sc'ob li ajvalil ta Babiloniae, xchi'uc scotol li jnaclumetic ta Judae la xchuc batel scotol ta Babilonia li Nabuzaradán banquilal jchabivanej yu'un ajvalile.

¹⁰ Ja' xa no'ox la scomtsan te ta Judá li me'onetic ti solel mu'yuc c'usi x'ayin yu'unique; laj yac'be comel ts'usubtic yu'unic xchi'uc yosilic.

Li Nabucodonosore laj yac' ta chabiel lec li Jeremiase

¹¹ Li ajvalil Nabucodonosore laj yalbe mantal li banquilal jchabivanej Nabuzaradán c'usi ac'o spas ta sventa li Jeremiase, jech laj yalbe:

¹² “Ic'o batel, chabio lec. Mu me c'usi chopol xapasbe; ja' pasbo li c'usi chayalbote”, xut.

¹³ Ja' yu'un li banquilal jchabivanej Nabuzaradán, xchi'uc Nabusazbán, xchi'uc Nergal-sarezer, ja' li banquilaletique, xchi'uc li yantic j'abteletic yu'un ajvalil ta Babiloniae,

¹⁴ laj yalic mantal ti ac'o bat yich' iq'uel tal li Jeremías ti te chucbil ta yamaq'uil chuquinabe. Ja' laj yac'beic ta sc'ob li Gedalías xnich'on Ahicam smomnich'on Safane, yu'un ac'o yic' batel ta sna. Ja' yu'un li Jeremiase te icom naquiuc xchi'uc li xchi'iltaque.

Li Diose laj yal ti mu'yuc chac' ta milel li Ebed-melec etiope vinique

¹⁵ C'alal te to'ox chucul ta yamaq'uil chuquinab li Jeremiase, te ital c'opanatuc yu'un li Muc'ul Diose, jech i'albat:

¹⁶ “Jech xatac ta albel li Ebed-melec etiope vinique: ‘Li Muc'ul Dios ti tspas tal mantal scotol te ta vinajele, ja' li Dios yu'un Israele, jech yaloj: A'yo ava'ay, ta ono'ox xcac' c'otuc ta pasel c'usi caloj ta sventa li lum li'i; ja' sventa svocol, mu ja'uc sventa lequilal. C'alal me ic'ot ta pasele, chavil lec ta asat.

¹⁷ Pero ta sc'ac'alil le'e, vu'un ta jcoltaot. Mu'yuc cha'och ta sc'obic li viniquetic le'e ti ep chaxi' yu'une.

¹⁸ Ta melel chajcoltaot, mu'yuc chalaj ta milel. Ja' no'ox chavich' iq'uel batel, yu'un laj apat avo'nton ta jtojol, xi li Muc'ul Diose’, uto”, x'utat li Jeremiase.