Jeremías 37 - Bible in Tzotzil de Chenalhó with Deuterocanon

I'och ta chuquel li Jeremiase

¹ Li Nabucodonosor ajvalil ta Babiloniae la stic' ta ajvalilal ta Judá li Sedequías xnich'on Josiase; ja' la xq'uexolin li Jeconías xnich'on Joacime.

² Pero li Sedequías xchi'uc li j'abteletic yu'une, xchi'uc scotol li judaetique, mu'yuc laj yich'ic ta muc' ec li c'usi laj yal Muc'ul Dios ta stojol li j'alc'op Jeremiase.

³ Li ajvalil Sedequiase la stac batel ta stojol j'alc'op Jeremías li Jucal xnich'on Selemías, xchi'uc li pale Sofonías xnich'on Maasiase, jech c'ot yalbeic: “C'anbuncutic vocol ta stojol li Muc'ul Dios cu'untique”, xutic.

⁴ Li Jeremiase lec to'ox xu' yu'un xloc' x'och te ta stojol li xchi'iltaque yu'un mu'yuc to tic'bil ta chuquel.

⁵ Li caldeaetic ti te xa'ox setuojic li Jerusalene, ivul a'yej ta stojolic ti iloq'uic xa tal ta Egipto li yajsoldadotac Faraone. C'alal laj ya'yique, iloq'uic batel ta Jerusalén, jech isutic o batel.

⁶ Jech te ic'opanat yu'un Muc'ul Dios li Jeremiase, jech i'albat:

⁷ “Jech xavalbe ya'yic li boch'otic tacbilic tale: ‘Jech chal li Muc'ul Diose, jech xc'ot avalbeic li ajvalil ti ja' la stacoxuc tal li' ta jtojole: Li soldadoetic yu'un faraón ti chtal ox scoltaoxuque isutic batel ta slumalic ta Egipto.

⁸ Ja' yu'un li caldeaetique ta ono'ox xtal scontrain li lum Jerusalene. Ta ono'ox x'och ta sc'obic; ta xac'beic sc'ac'al.

⁹ Jech chal li Muc'ul Diose: Mu xalo'la abaic ti chanopic ti iloq'uic o batel li caldeaetique, ti mu'yuc xa chascontrainoxuque. Mu'yuc bu iloq'uic o batel.

¹⁰ Ac'o me chatsalic scotol li soldadoetic yu'un caldeaetique, pero oy to ono'ox boch'o cuxul ta xcomic ti yayijemic xa avu'unique; ja' ta xliquic tal te ta scarpanaic, ja' chtal yac'beic sc'ac'al li lum li'i’, xi li Muc'ul Diose”, xut batel li j'almantaletic yu'un ajvalile.

¹¹ C'alal sutemic batel li caldeaetic ta scoj ti ixi'ic yu'un li soldadoetic yu'un faraone,

¹² li Jeremiase ta ox xloc' batel ta Jerusalén, yu'un chbat ta yosilal Benjamín sventa chbat sq'uel bu stuq'uil chich' li yosil te ta yosilalique.

¹³ C'alal ibat te ta ti'coralton Benjamín sbie, te oy jun banquilal soldado Irías sbi, xnich'on Selemías smomnich'on Hananías, te la xchuc li Jeremiase, jech laj yalbe: —¡Me yu'un ja' te chajelov batel yo' bu oy li caldeaetique! —xut.

¹⁴ Jech la stac' li Jeremiase: —¡Mo'oj, mu'yuc te chijelov batel! —xi. Pero li Iriase muc xch'un, jech te la xchuc li Jeremiase; laj yic' batel ta stojol banquilaletic.

¹⁵ Li banquilaletique i'ilinic ta stojol li Jeremiase. La smajic, la stiq'uic ta chuquel te ta sna Jonatán, ja' li jts'ibajome, yu'un ja' c'otem ta chuquinab yu'unic li snae.

¹⁶ Jech te itic'at ta jun ch'en te vombil ta yut na. Ep c'ac'al te icom li Jeremiase.

¹⁷ Li ajvalil Sedequiase laj yal mantal ti ac'o yiq'uic batel te ta spasubmantal li Jeremiase. C'alal ic'ot ta stojol ajvalil li Jeremiase, li ajvalile te lic sjac'be ta mucul stuc, jech laj yalbe: —¿Me oy c'usi yaloj li Muc'ul Diose? —xut. Itac'ov li Jeremiase: —Oy. Ta ono'ox xa'och ta sc'ob li ajvalil ta Babiloniae —xut.

¹⁸ Li Jeremiase jech la sjac'be ec li ajvalil Sedequiase: —¿C'usi jmul ta atojol xchi'uc ta stojol li j'abteletic avu'une xchi'uc ta stojol li jchi'iltactic ti laj atic'un ta chuquele?

¹⁹ ¿Bu oy li j'alc'opetic avu'un ti laj yalbicot ti mu'yuc ta xtal scontrainutic, ti mu'yuc ta xtal soquesic cosilaltic li ajvalil ta Babiloniae?

²⁰ Ajvalil, avocoluc a'ibun li c'usi ta xcale, vo'ot li ajvalilot cu'une, c'otuc ta avo'nton li vocol chajc'anbote. Mu xa xavac' ti te chbat yaq'uicun yan velta ta sna li Jonatane, naca me te licham —xut.

²¹ Ja' yu'un li ajvalil Sedequiase laj yal mantal ti te xa no'ox ac'o bat xchabiic ta yamaq'uil chuquinabe, xchi'uc ac'o yac'beic jbejuc pan sve' ta jujun c'ac'al ti te chich' pasel ta xoraltic ta spasubil pane. Jech te tal yaq'uilanbeic o, ja' to ti c'alal ilaj scotol li pan chich' pasel te ta lume. Jech te no'ox icom ta yamaq'uil chuquinab li Jeremiase.