Jeremías 36 - Bible in Tzotzil de Chenalhó with Deuterocanon

Li Baruque laj yapta ta ch'ulna li balbil vune

¹ C'alal xchanibal jabil xa'ox yochel ta ajvalilal ta Judá li Joacim xnich'on Josiase, ja'o te ital c'opanatuc yu'un Muc'ul Dios li Jeremiase, jech i'albat:

² “Tsaco junuc balbil vun, ja' te xats'iba scotol li c'usi laj calbot ta sventa li Judá, ta sventa Jerusalén, xchi'uc ta sventa yantic lumetique. Xquechet xlic ats'iba scotol c'alal lic jc'opanot tal ta yorail c'alal cuxul to'ox li ajvalil Josiase, xchi'uc c'alal to tanae.

³ Naca me ja' to jech xlic scomtsan c'usi chopol tspas li judaetic c'alal me cha'yic scotol c'u x'elan li vocol ta jtacbe tal ta stojolique; jech xu' ta jpasbe perdón li smulique, li xchopolilique”, x'utat.

⁴ Li Jeremiase la stac ta iq'uel li Baruc xnich'on Neriase; laj yalbe scotol li c'usi i'albat yu'un Muc'ul Diose. Li Baruque ja' lic sts'iba ta jun balbil vun scotol.

⁵ Li Jeremiase jech laj yalbe li Baruque: “Li vu'une mu xaq'uic ochcun ta ch'ulna yu'un li Muc'ul Diose.

⁶ Ja' lec vo'ot xabat te ti c'alal yorail ta xictaic ixime; aptao li balbil vun laj ats'iba ti vu'un laj calbote, yu'un ac'o ya'yic scotol jchi'iltactic, xchi'uc scotol jnaclumetic ta Judá c'usi yaloj li Muc'ul Diose.

⁷ Naca me jech chlic sc'opanic li Muc'ul Diose, jech xu' chlic scomtsanic li chopol be stamojic jujunique. Yu'un toj tsots ch-ilin, toj tsots liquem sc'ac'al yo'nton ta stojolic li Muc'ul Diose”, xut.

⁸ Li Baruc xnich'on Neriase la spas scotol jech chac c'u cha'al i'albat yu'un li j'alc'op Jeremiase; te bat yapta ta ch'ulna li c'usi yaloj Muc'ul Diose.

⁹ C'alal sbalunebal u stsacoj yo'bal jabil yochel ta ajvalilal ta Judá li Joacim xnich'on Josiase, ja'o la spuquic mantal ti ac'o tal yictaic ixim ta sventa Muc'ul Dios te ta Jerusalén scotol li jnaclumetic ta Jerusalén xchi'uc scotol jnaclumetic ta yantic lum te ta yosilal Judae.

¹⁰ Li Baruque ibat ta ch'ulna, te ic'ot ta muc'ta amac' ti te xlic ta svayab-na Gemarías xnich'on Safán, ja' li jts'ibajome, te ta nopol ti bu Ach' Ti'na sbi ta ch'ulnae. Te laj yapta ta stojol scotol judaetic li c'usi ts'ibabil ta balbil vun ti laj yal Jeremiase.

Li Baruque laj yapta ta stojol ajvaliletic li balbil vune

¹¹ Li Micaías xnich'on Gemarías smomnich'on Safane laj ya'ay scotol c'usitic laj yal li Muc'ul Diose.

¹² Jech ibat ta spasubmantal ajvalil te ta svayab-na jts'ibajom. Ja' te chotolic scotol li j'abteletique, ja' li Elisama jts'ibajome, Delaía xnich'on Semaías, Elnatán xnich'on Acbor, Gemarías xnich'on Safán, Sedequías xnich'on Ananías, xchi'uc scotol li yan banquilaletique.

¹³ Li Micaiase te lic xchol scotol li c'usitic laj ya'ay ta balbil vun ti laj yapta ta stojol scotol jteclum li Baruque.

¹⁴ Li banquilaletique te lic staquic batel li Jehudí xnich'on Netanías, smomnich'on Selemías, ja' li xnich'on Cusie. Ja' bat yalbe Baruc ti ac'o yich' batel li balbil vun laj yapta ta stojol xchi'iltaquique. Jech li Baruque laj yich' batel ta stojolic li balbil vune.

¹⁵ Jech laj yalbeic: —Chotlan li'i, aptabun ca'icutic ec li balbil vune —xutic. Jech te lic yapta li Baruque.

¹⁶ C'alal laj ya'yique, ixi'ic, jech lic yalbe sbaic jujunic: —Tsc'an chbat calbetic ya'ay scotol li ajvalile —xiic.

¹⁷ Jech la sjac'beic li Baruque: —Alo ca'icutic, ¿c'uxi laj ats'iba li vun li'i? ¿Me ja' laj yalbot li Jeremiase? —xutic.

¹⁸ Itac'ov li Baruque: —Ja' laj yalbun scotol li Jeremiase; vu'un la jts'iba ta vun ec —xi.

¹⁹ Li banquilaletique jech laj yalbeic li Baruque: —Bat nac'o abaic achi'uc li Jeremiase, yu'un jech mu'yuc boch'o tsna' bu oyoxuc —xutic.

Li ajvalil Joacime la xchic' li balbil vune

²⁰ Li balbil vune te laj yaq'uic ta svayab-na Elisama, ja' li jts'ibajome, jech te ibatic ta spasubmantal li ajvalile; la xcholbeic ya'ay ajvalil scotol li c'usi laj ya'yique.

²¹ Li ajvalile la stac batel Jehudí, yu'un ac'o bat yich' tal li balbil vune. Jech te bat yich' tal ta svayab-na li Elisamae. Li Jehudie te lic yapta ta stojol li ajvalile xchi'uc li banquilaletic te oyique.

²² Ta sventa ti oyic xa ta sbalunebal ue ja' xa yorail sictic, ja' yu'un li ajvalile te stsanoj ac'al ta scuarto te chc'atin.

²³ C'alal laj yapta jelovel oxvoc', o me chanvoc' li Jehudie, li ajvalile la xut'an loq'uel ta cuchilo, la xchic' ta c'oc' te yo' bu tsanal yu'une, ja' to ti c'alal la xchic' scotol li balbil vune.

²⁴ Li ajvalil xchi'uc li j'abteletic yu'une mu'yuc bu ixi'ic, mu'yuc bu la sli' sc'u'ic, mu'yuc bu laj yat yo'ntonic c'alal laj ya'yic c'usi chal li balbil vune.

²⁵ Li Elnatán, Delaía, xchi'uc Gemariase te xvocoletic ta stojol ajvalil ti mu me xchic' ta c'oc' li balbil vune, pero muc xch'unbatic.

²⁶ Li ajvalile lic spas ta mantal li Jerameel xnich'on Hameleque, xchi'uc li Seraías xnich'on Azriele, xchi'uc li Selemías xnich'on Abdeele, yu'un ac'o bat stsaquic li Baruc boch'o its'ibaje xchi'uc li j'alc'op Jeremiase. Pero inac'atic yu'un stuc li Muc'ul Diose.

Li Jeremiase laj yac' ta ts'ibael yan balbil vun

²⁷ C'alal laj xa'ox xchic' balbil vun li ajvalile, ja' li balbil vun yo' bu la sts'iba c'usi i'albat yu'un Jeremías li Baruque, ital c'opanatuc yan velta yu'un Muc'ul Dios li Jeremiase, jech i'albat:

²⁸ “Tsaco yan balbil vun; ts'ibao yan velta scotol li c'usitic laj ono'ox ats'iba ta yan balbil vun ti la xchic' li Joacim ajvalil ta Judae.

²⁹ Jech xavalbe li ajvalil Joacime: ‘Jech chal li Muc'ul Diose: Vo'ot laj achic' li balbil vune; laj avut noxtoc li Jeremías ti c'alal la sts'iba ti ta persa ta xtal li ajvalil ta Babiloniae ti chtal syavnaijes li avosilalique, ti mu'yuc cristianoetic, ti mu'yuc chonbolometic ta xcom yu'une.

³⁰ Ja' yu'un jech chcal vu'un li Muc'ul Diosune: Me junuc amomnich'nab mu'yuc ta xchoti ta spasubmantal li Davide. Li abec'tale te no'ox telel chcom ta xc'uxul c'ac'al xchi'uc ta siquil ac'ubal.

³¹ Ta xcac'bot atoj amulic achi'uc anich'nabtac xchi'uc li j'abteletic avu'une. Ta xcac' taluc ta atojolic xchi'uc ta stojol jnaclumetic ta Jerusalén xchi'uc ta Judá scotol li vocol ti laj calboxuc ta jtac tal ti muc xavich'ic ta muq'ue’, uto”, x'utat li Jeremiase.

³² Li Jeremiase la stsac yan balbil vun, laj yac'be li Baruque, ja' li jts'ibajom xnich'on Neriase. Ja' te la sts'iba scotol c'usi laj yal li Jeremiase, ja' ti c'usi ts'ibabil ono'ox ta yan balbil vun ti la xchic' ta c'oc' li Joacim ajvalil ta Judae. Li Jeremiase laj to yac'be ep xchi'il ti co'oltic smelole.