Jeremías 35 - Bible in Tzotzil de Chenalhó with Deuterocanon

Lec la xch'unbeic smantal smoltotic li recabetique

¹ C'alal ja'o tiq'uil ta ajvalilal ta Judá li Joaquim xnich'on Josiase, ital sc'opanun Muc'ul Dios vu'un li Jeremiasune, jech laj yalbun:

² “Batan yo' bu nacalic li recabetique, bat c'opano; ic'o batel ta jc'oluc yut na te ta jch'ulna, ac'bo pasem ya'lel ts'usub yuch'ic”, xiyutun.

³ Ja' laj quic' batel li Jaazanías xnich'on Jeremías smomnich'on Habasiniase; laj quic' batel xchi'uc xchi'iltac ta voq'uel xchi'uc xnich'nabtac xchi'uc scotol li jchop sts'unubal recabetique.

⁴ Te laj quiq'uic batel ta ch'ulna yu'un Muc'ul Dios te ta svayab-na xnich'nabtac Hanán xnich'on Igdalías, ja' li yajtunel Diose. Li jc'ol yut nae ja' te ta nopol svayab-naic banquilaletic te ta yac'ol svayab-na Maasías xnich'on Salum, ja' li jchabi ti'ch'ulnae.

⁵ Li recabetique te laj cac'beic jun unin bin xchi'uc vasoetic nojic ta pasem ya'lel ts'usub, jech laj calbeic: “Uch'anic li pasem ya'lel ts'usube”, xcut.

⁶ Jech laj yalbicun: “Mu xcuch'cutic, yu'un li jmoltotcutic Jonadab xnich'on Recabe jech laj yalbuncutic: ‘Mu me xavuch'ic pasem ya'lel ts'usub xchi'uc li amomnich'nabique,

⁷ mu me xapas lec anaic, mu me c'usi xats'un ta avosilic, mu me xats'unic ts'usubtic avu'unic. Carpana no'ox xanainic ti jayib c'ac'al cuxuloxuque, yu'un jech jal chacuxiic te ta banamil yo' bu chanaquiique’, xiyutuncutic.

⁸ Ja' no'ox ta jch'uncutic c'usi yaloj li jmoltotcutic Jonadab xnich'on Recabe, yu'un laj yal ti mu xu' ta xcuch'cutic pasem ya'lel ts'usub ti jayib c'ac'al cuxuluncutic xchi'uc cajnil jnich'nabcutique,

⁹ xchi'uc ti mu me jpas lec jnacutique, ti mu me jts'un jts'usubcutique, xchi'uc ti mu me c'usi jts'uncutic o ta cosilcutique.

¹⁰ Ta carpana no'ox chinaquicutic, yu'un ja' ta jch'uncutic scotol c'usitic laj yal li jmoltotcutic Jonadabe.

¹¹ Pero c'alal i'och tal li' ta cosilaltic li Nabucodonosor ajvalil ta Babiloniae, lixi'cutic yu'un li soldadoetic yu'un caldeaetique xchi'uc li soldadoetic yu'un siriaetique, jech laj calcutic: ‘Bat jnac' jbatic ta Jerusalén’, xichicutic; ja' yu'un ti li' linaquicutic ta Jerusalene”, xiyuticun.

¹² Li Muc'ul Diose ital sc'opanun vu'un li Jeremiasune, jech laj yalbun:

¹³ “Jech chacalbot vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: Batan, jech xbat avalbe li jnaclumetic ta Judá xchi'uc ta Jerusalene: ‘Ja' me jech xachanic ec; ich'ic me ta muc' li jc'ope.

¹⁴ Li Jonadab xnich'on Recabe laj yich' lec ch'unbel li smantale; li smomnich'nabtaque la xch'unic ti i'albatic mu me xuch'ic pasem ya'lel ts'usube. Jech mu'yuc chuch'ic o c'alal to tana, yu'un laj yich'beic ta muc' li smantal smoltotique. Jech ec li vu'une te ono'ox chajc'opanoxuc o scotol c'ac'al, pero mu xac'an xach'unic.

¹⁵ Scotol ora ta jtaquilanboxuc tal ta atojolic li cajtuneltaque, ja' li j'alc'opetic cu'une, jech chayalboxuc: Comtsanic li chopol be atamojic jujunoxuque, tuq'uibtaso abaic; mu xabatic ta stojol li yantic diosetique, mu me ja'uc xatunic yu'un. Me jech chapasique, jun avo'nton te nacaloxuc o ta banamil ti bu laj cac'boxuc achi'uc li amoltotic ta vo'onee, xayutoxuc. Pero muc xach'unic, muc xavich'ic ta muc'.

¹⁶ Yan li smomnich'nab Jonadab xnich'on Recabe tsots sc'oplal laj ya'yic, la xch'unbeic smantal li smoltotique, pero li junoxuc ta lum li'i mu xac'an xavich'icun ta muc'.

¹⁷ Ja' yu'un jech chcal vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: Ta xcac' taluc ta atojolic te ta Judá xchi'uc ta stojol jnaclumetic ta Jerusalén scotol li vocol ti caloj ono'ox chacac'boxuque. Yu'un la jc'opanoxuc pero muc xatac'ovic; laj quic'oxuc pero muc xavich'ic ta muc', xi li Diose’, uto”, xiyutun.

¹⁸ Vu'un li Jeremiasune, jech laj calbe li recabetique: “Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chayalboxuc: ‘Ta sventa ti laj ach'unbeic smantal li amoltotic Jonadabe, ti laj apasic scotol li c'usitic laj yalboxuque,

¹⁹ ja' yu'un jech chcalboxuc, vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: Mu xlaj sc'oplal o ti oy jun smomnich'on Jonadab te ch-abtej o ta jtojole’, xi li Muc'ul Diose”, xcut.