Jeremías 34 - Bible in Tzotzil de Chenalhó with Deuterocanon

Li Jeremiase la staq'ui li ajvalil Sedequiase

¹ Li Nabucodonosor ajvalil ta Babilonia xchi'uc scotol yajsoldadotac, xchi'uc scotol li ajvaliletic ta yantic banamil bu c'alal sventainoje, ital scontrainic li Jerusalén xchi'uc yantic lumetic yu'une. Ja'o ital c'opanatuc yu'un Muc'ul Dios li Jeremiase, jech i'albat:

² “Vu'un li Muc'ul Diosun yu'un Israele jech chacalbot: Batan ta stojol li Sedequiase jech xc'ot avalbe: ‘Jech chayalbot li Muc'ul Diose: Li lum li'i ta xcac'be ta sc'ob li ajvalil ta Babiloniae; ta xchic' ta c'oc'.

³ Li vo'ote mu'yuc chacol loq'uel ta sc'ob; ta ono'ox xaxchucot, ta ono'ox xa'och ta sc'ob. Ta persa chavilbe aba asatic, ta persa chac'opan abaic; persa ono'ox ic'bil chabat ta Babilonia.

⁴ Sedequías, ajvalil ta Judá, a'yo ava'ay c'usi chal ta aventa li Muc'ul Diose: Mu'yuc chavich' milel ta espada.

⁵ Jun avo'nton chacham, jech chac c'u cha'al laj yich'ic chic'bel muil poxil c'alal icham li amoltotac ti ba'yuc ijelovic ta ajvalilale, ja' jech chavich' chic'bel muil poxil ec ti c'alal chasmucoxuque. Ep ta x'oq'uic ta atojol, jech ta xalic: ¡Ay, ajvalil!, xiic. Vu'un chcal jtuc, vu'un li Muc'ul Diosune’, uto”, x'utat li Jeremiase.

⁶ Li j'alc'op Jeremiase ja' jech ay yalbe scotol li ajvalil Sedequías te ta Jerusalene.

⁷ Li soldadoetic yu'un ajvalil ta Babiloniae yochelic stsaquel ta pleito li Jerusalene, li Laquise, xchi'uc li Azecae, yu'un ja' xa no'ox lumetic te comenic ta Judá ti lec setbilic ta coraltone.

Li judaetique la soquesic li c'usi xchapanojic ta sventa mu smozoin xchi'iltaquique

⁸ Li Jeremiase ital c'opanatuc yu'un Muc'ul Dios yan velta ti c'alal chapal xa'ox yu'unic ajvalil Sedequías xchi'uc jnaclumetic ta Jerusalén ti tsloq'uesic ta mozoil li xchi'iltaquique.

⁹ Jujuntal ac'o scoltaic loq'uel li xchi'iltaquic ta hebreoal, me vinic o me ants, ti te no'ox smozoinojan sba stuquique, yu'un jech mu me stunesic jech chac c'u cha'al mozo li xchi'ilic no'ox ta judioale.

¹⁰ C'alal laj ya'yic li banquilaletique xchi'uc scotol li xchi'iltaquic ti chapanbil xa yu'unic tscoltaic loq'uel li smozoic, o me squiaraique, ti mu xu' tsmozoin no'ox sba stuquic li israeletique, la xch'unic, jech la scoltaic batel.

¹¹ Pero ts'acal lic sutes sc'opic, lic yiq'uic ta smozoic, ta squiaraic yan velta.

¹² Ja' yu'un ic'opanat yu'un Muc'ul Dios yan velta li Jeremiase, jech i'albat:

¹³ “Vu'un li Muc'ul Diosun yu'un Israele jech chcal: C'alal la jloq'ues tal ta Egipto banamil li amoltot ayame'ic ta vo'one ti bu mozoinbilic to'oxe, oy c'usi la jchapan jchi'uc, jech laj calbe:

¹⁴ ‘Ta vucvuc jabil xacoltaic ta mozoil li achi'ilic ti laj aviq'uic ta mozoile. Vaquib jabil ac'o abtejuc avu'unic, ts'acal xacoltaic batel’, xcutic. Pero li amoltotaquique muc xch'unic, muc xich'ic ta muc'.

¹⁵ Yan li vo'oxuque laj ajelic li c'usi chapasique. Ja' chapasic li c'usi lec chquile, yu'un laj xa achapanic ta jtojol te ta ch'ulna cu'un ti chacoltaic loq'uel ta mozoil li achi'iltaquique.

¹⁶ Pero ts'acal laj asutes ac'opic noxtoc; laj asoquesbeic sc'oplal li jbie, yu'un lasut ta ava'lupatic, lic aviq'uic ta amozoic ta aquiaraic yan velta noxtoc li achi'ilic ti slequil avo'nton laj acoltaic batele.

¹⁷ Ja' yu'un ja' jech chcal vu'un li Muc'ul Diosune: Ta sventa ti muc xach'unic c'usi laj cale, yu'un muc xacoltaic ta mozoil li achi'ilique, ja' yu'un vu'un ta jcolta tal pleito, vi'nal, xchi'uc ta tsatsal chamel ta atojolic; jech toj chopol ac'oplalic, toj q'uexlal abaic chcom ta stojol li yantic lumetique.

^18-19 Li banquilaletic ta Judá xchi'uc ta Jerusalene, li j'abteletic ta spasubmantal ajvalile, li paleetique, xchi'uc scotol li achi'iltaquique oy c'usi la xchapanic ta jtojol. Jech la svoq'uic ta cha'voc' jcot ch'ium tot vacax, te ijelovic ta o'lol ti bu tsopajtic yu'unique. Pero la soquesic li c'usi la xchapanique; muc xc'ot ta pasel yu'unic. Ja' yu'un ja' jech ta jpasbeic jech chac c'u cha'al la spasbeic li ch'ium tot vacaxe.

²⁰ Ta xcac' ochicuc ta sc'ob li yajcontraic ti tsc'an chmilatic yu'une. Li sbec'talique ta xlaj ta ti'el ta mutetic xchi'uc ta chonbolometic.

²¹ Jech noxtoc li Sedequías ajvalil ta Judá xchi'uc li banquilaletic yu'une, ta xcac' ochicuc ta sc'ob ec li yajcontraic ti tsc'an chmilatic yu'une. Ta xcac' ochicuc ta sc'ob yajsoldadotac li ajvalil ta Babilonia ti mu'yuc xa li' tscontrainoxuque.

²² Ta jtac sutel tal yan velta li' ta alumalique, yu'un ac'o tal scontrain, ac'o tal ochicuc, ac'o xchiq'uic ta c'oc'. Li lumetic li' ta Judae xocol ta jcomtsan, mu'yuc yajval chcom. Vu'un chcal jtuc, vu'un li Muc'ul Diosune”, xi.