Jeremías 33 - Bible in Tzotzil de Chenalhó with Deuterocanon

Ta to sta coltael li Jerusalene

¹ C'alal te to chucul ta yamaq'uil chuquinab li Jeremiase, te ital c'opanatuc yan velta yu'un li Muc'ul Diose jech i'albat:

² “Vu'un li Muc'ul Diosune, vu'un ti la jpas banamile, ti la jchapan lec, ti la jnacan lec ta snaclebe, jech chacalbot:

³ Vocoletan ta jtojol, vu'un chajtac'bot, chacac'bot avil c'usitic toj muc'tic, c'usi mu'yuc vinajem ti mu'yuc ono'ox jech aviloje.

⁴ Vu'un li Muc'ul Diosune jech chcal ta sventa li naetic li' ta lume xchi'uc li sna ajvaliletic ti chich' jinesel ta muc'tic abtejebaletique.

⁵ Ja' ti chtal yich' contrainel yu'un li caldeaetique, ti nojem chcom ta animaetic yu'unique. Vu'un ta xcac' chamicuc ta sc'ac'al co'nton. Jech ta jmac jsat ta stojolic ta scoj ti toj chopol c'usitic tspasique.

⁶ Pero ta xlic jcoltaic, ta xlic jpoxtaic; ta xcac'be sta lec jun yo'ntonic, jech mu c'usi xal yo'ntonic o.

⁷ Ta xcac' suticuc tal li boch'otic chucbil iloq'uic batel ta Judá xchi'uc ta Israele; ta jcha'liques ta ach' jech chac c'u cha'al ono'ox oyic ta sliquebale.

⁸ Ta jpocbe loq'uel scotol li smulic staojic ta jtojole, xchi'uc ta jpasbe perdón li sbolilic xchi'uc li stoyobbailic ta jtojole.

⁹ Scotol li c'usitic lec ta jpas li' ta Jerusalene ja' sventa quich'el ta muc', ja' sventa xcuxetel o'ntonal ta stojol yantic lum li' ta banamil. Yu'un c'alal cha'yic ti lec c'usitic ta jpasbe li jnaclumetic li' ta Jerusalene, ta xlic niquicuc, ta xlic xi'icuc”, xi li Muc'ul Diose.

¹⁰ Jech laj yal noxtoc li Muc'ul Diose: “Li banamil li'i chavalic ti chyavnaij o, ti mu'yuc cristianoetic, ti mu'yuc chonbolometic chcome. Te ta lumetic ta Judá xchi'uc ta xoraltic ta Jerusalene chavalic ti mu'yuc yajval, ti mu jcotuc chonbolometic chcome.

¹¹ Pero ta to xlic vinajuc ti xla'etic no'oxe, ti tse'ej lo'ilic no'ox ta xcuxetel yo'ntonique, xchi'uc ta to xlic vinajuc ti oy q'uin nupinel ta sventa querem tsebetique, xchi'uc ti oy boch'o jech chalique: ‘Albeic slequilal li Muc'ul Dios ti ja' tspas ta mantal scotol te ta vinajele, yu'un ja' toj lec yo'nton, yu'un sbatel osil mu xlaj o c'uxubinel yu'un’, ti xiique. Xchi'uc ta to xvinaj oy boch'o chaq'uic matanal sventa tstojic ta vocol te ta jch'ulna. Yu'un ta to xquiq'uic sutel tal li boch'otic chucbil ibatic ta yan banamile, tstaic yan velta jech chac c'u cha'al ono'ox ta sliquebale. Vu'un chcal jtuc vu'un li Muc'ul Diosune”, xi.

¹² Li Muc'ul Dios ti tspas ta mantal scotol te ta vinajele jech chal noxtoc: “Li banamil li'i ti xocol comen, ti mu'yuc cristianoetic, ti mu'yuc chonbolometic, xchi'uc ti soquem scotol li lumetique, ta xlic ayinuc vomol a'maletic, yu'un ja' te chaq'uic ve'uc xchijic li jchabichijetique.

¹³ Ta lumetic te ta vitstic, ta lumetic ta Sefela, ta lumetic ta Néguev, ta yosilal Benjamín, ta nopol spat xocon Jerusalén, xchi'uc ta lumetic ta Judae, ta to xavilic ta xat xchijic li jchabichijetique. Vu'un chcal jtuc vu'un li Muc'ul Diosune”, xi.

¹⁴ Jech chal noxtoc li Muc'ul Diose: “A'yo ava'yic, ta sta sc'ac'alil ta xcac' c'otuc ta pasel c'usi caloj ta sventa li smomnich'nab Israel xchi'uc smomnich'nab Judae.

¹⁵ C'alal me ic'ot yorail me ic'ot sc'ac'alil le'e, ta to xcac' licuc jun bats'i smomnich'on David, ja' tstuq'uibtas, ja' tsmeltsan lec li c'usi chich' pasel li' ta avosilalique.

¹⁶ Me la sta sc'ac'alile, colem ta xcom li Judae, jech jun yo'nton ta xnaquiic ta Jerusalén. Ja' jech jbi ta xc'ot yu'unic: ‘Muc'ul Dios, tuq'uil jchapanvanej cu'untic’, xiic.

¹⁷ Yu'un jech yaloj li Muc'ul Diose: Mu'yuc ono'ox ta xlaj sc'oplal ch-och ta ajvalilal ta stojol israeletic li smomnich'on Davide.

¹⁸ Mu'yuc ono'ox ta xlaj sc'oplal ti oy paleetic, ti oy levietic chiyac'bicun scotol c'ac'al chic'bil matanal, milbil matanal, xchi'uc li yantic matanal jech chac c'u cha'al trigoe”, xi li Muc'ul Diose.

¹⁹ Li Jeremiase ital c'opanatuc yan velta yu'un li Muc'ul Diose, jech i'albat:

²⁰ “Jech chcal vu'un li Muc'ul Diosune: ¿Me oy boch'o xu' ta soques li c'usi jchapanoj ta sventa c'ac'altic xchi'uc ta sventa ac'ubaltique? Ti oyuc boch'o xu' tsoquese mu'yuc c'ac'altic mu'yuc ac'ubaltic ta yorail ti jechuque.

²¹ Ti jechuque ja' no'ox jech xu' chich' soquesel noxtoc li c'usi jchapanoj ta stojol li cajtunel Davide, ja' ti calojbe persa oy xnich'on ch-och ta ajvalilale, xchi'uc li c'usi jchapanoj ta stojol li paleetic xchi'uc li levietic chtunic ta jtojole.

²² Jech chac c'u cha'al mu stac' atel li c'analetic ta vinajele xchi'uc li yi'tic ta ti'nabe, ja' jech yepal ta jbolesbe smomnich'nab li cajtunel Davide xchi'uc li levietic ti chtunic ta jtojole”, x'utat yu'un Muc'ul Dios li Jeremiase.

²³ Ital c'opanatuc yu'un Muc'ul Dios noxtoc li Jeremiase, jech i'albat:

²⁴ “¿Me mu ava'yojuc c'u x'elan chlo'ilajic li cristianoetique? Chalic ti jbajoj xa o li cha'chop lum ti jt'ujoj ono'oxe, ja' li Israel xchi'uc Judae. Ja' yu'un mu'yuc xa stu chilic o li jteclumale; mu xa scuyic ta jun muc'ta lum.

²⁵ Ja' yu'un jech chcal vu'un li Muc'ul Diosune: Me ta xlaj sc'oplal c'usi jchapanoj ta sventa li c'ac'altic xchi'uc ac'ubaltique, xchi'uc me muc vu'cun cac'ojbeic lec mantal c'u x'elan ch-abtej li vinajel xchi'uc banamile,

²⁶ jech xu' ta jsoques noxtoc li c'usi jchapanoj ta stojol smomnich'nab Jacob xchi'uc li cajtunel Davide. Jech mu'yuc chcac' ochuc ta ajvalilal smomnich'on sventa tsventainbe li smomnich'nab Abraham, Isaac, xchi'uc Jacob ti jechuque. Yu'un ta xquiq'uic ono'ox sutel tal li boch'otic chucbil ibatic ta yan banamile, ta xlic jc'uxubinic”, xi li Muc'ul Diose.