Jeremías 31 - Bible in Tzotzil de Chenalhó with Deuterocanon

Ta sutic tal ta slumalic li israeletique

¹ “Me la sta li sc'ac'alil le'e, vu'un Diosun yu'unic chc'ot scotol li jaychop sts'unubal Israele; ja' jteclumal ta xc'otic o”, xi li Muc'ul Diose.

² Jech chal li Muc'ul Diose: “Li jteclumal ti icolic ta milele, laj cac'be yilic slequil co'nton te ta xocol banamil ti c'alal ja'o chbat sa' bu ta xcux yo'nton li Israele.

³ Vo'one ono'ox laj cac' jba ta ilel ta stojolic, jech laj calbe: Laj cal ti j'ech'el la jc'anot oe, ja' yu'un yoquel to jech jc'anojot o.

⁴ Israel, ta jcha'va'anot ta ach' jech lec chacom yan velta; xcuxet no'ox avo'nton chlic ac'otajan yan velta ta sepsep taq'uin.

⁵ Ta xlic ats'unic yan velta ts'usubtic te ta bic'tal vitsetic ta Samaria. Li boch'otic ta sts'un sts'usubique xcuxet no'ox yo'nton ta slo'beic sat.

⁶ Yu'un ta to sta sc'ac'alil ta x'avanic li jq'uel osiletic ta toyol q'uelub osil te ta vits Efraine: ‘La'ic, batic ta Sión yo' bu oy li Dios cu'untique’, xiic”, xi li Muc'ul Diose.

⁷ Li Muc'ul Diose jech chal: “Cuxetuc no'ox avo'nton q'uejinanic ta sventa li smomnich'nab Jacobe; avetanic no'ox ta xcuxetel avo'ntonic ta sventa Israel, ja' li banquilal yu'un yantic lumetique. Aq'uic ta a'yel ti c'u x'elan chavalbeic slequilal yutsilale, jech xavalic: ‘Li Muc'ul Diose laj xa scolta li steclumale, ja' li scomelal sts'unubal Israele’, chianic.

⁸ A'yo ava'yic, ta to xquiq'uic loq'uel tal te ta banamil ta norte; ta xlic jtsobic tal c'alal to ta jujujot sti'il banamil. Jmoj chtal xchi'uquic li ma'satetique, li coxoetique, li antsetic ti oy xch'utique xchi'uc li boch'otic xcuxojic xae. Jmoj ep stsobetic tsutic tal.

⁹ C'alal ta sutic tale, x'oc' x'avanic tal, li vu'une ta xc'uxul co'nton ta xcac' suticuc tal. Te ta xquiq'uic tal ti bu oy lec vo'etique; ta tuq'uil be lec chtalic cu'un jech mu sbosi tal yacanic. Yu'un vu'un stotun li Israele, ja' sba jnich'on li Efraine.

¹⁰ “Muc'tiquil lumetic, a'yo ava'yic c'usi chal li Muc'ul Diose; alic batel ta ti'ti' nab, jech xavalic: ‘Li Boch'o la spuc batel li israeletique ta stsob sutel tal yan velta, lec ta xchabi jech chac c'u cha'al ta xchabi xchij li jchabichije’, chianic.

¹¹ Yu'un li Muc'ul Diose ta scoltabe li smomnich'nab Jacobe; ta spoj loq'uel ta sc'ob li jun lum ti toj tsots xu' yu'une.

¹² “Ta xtalic, xcuxet no'ox yo'nton chlic q'uejinicuc te ta toyol vits Sión; ja' snutsojic tal c'usi lec chac' li Muc'ul Diose: ja' li trigo, li ya'lel ts'usub, li aceite, li chijetic, xchi'uc li vacaxetique. Ja' jech chc'otic jech chac c'u cha'al ts'unubaltic ti lec at'esbile, jech mu'yuc xa cha'ay svocolic o.

¹³ Li tsebetique xcuxet no'ox yo'nton ch-ac'otajic; ta x'ac'otajic noxtoc li queremetic xchi'uc li moletique. Ta jc'atajesbe ta tse'ej li svocolique; ta xcac'be lec spatubil yo'ntonic. Ta jc'atajesbe ta xcuxetel yo'ntonic li xc'uxul svocolique.

¹⁴ Li paleetique ja' ta jmac'linic o ta lequil ve'liletic; li jteclumale ta jnojesbe lec xch'utic o ta sventa li c'usitic lec oy cu'une”, xi li Muc'ul Diose.

¹⁵ Jech chal noxtoc li Muc'ul Diose: “Chvinaj tsots oq'uel te ta Ramá; oy boch'o toj tsots choc'ta sba. Ja' Raquel ta xoc'ta yalabtac; muc sbalin patbel yo'nton, yu'un j'ech'el ilaj li yalabe”, xi.

¹⁶ Pero li Muc'ul Diose jech chalbe: “Raquel, mu epuc xa'oc'; mu loq'uel xamal ya'lel asat, yu'un li avocole chavich'be stojol, li avalabtaque ta to sutic tal te ta slumal li yajcontraique.

¹⁷ Oy c'usi toj lec chc'ot ta atojol ta ts'acal, yu'un ta to sutic tal ta yosil sbanamilic li avalabe.

¹⁸ Laj ca'ay ti bats'i x'oc' x'avan no'ox li Efraine, jech chal: ‘Laj abijubtasun ta nucul jech chac c'u cha'al unin tot vacax ti mu stac' pasel ta mansoe. Jelbun li co'ntone, ta jc'an chisut tal ta atojol, yu'un vo'ot no'ox Diosot cu'un.

¹⁹ La jvoc' to'ox jba ta atojol, pero li' ta orae la jsutes xa co'nton; laj quil ti mu'yuc lec c'usi ta jpase. Jech la jmajilan sna co'nton, toj q'uexlal sba chca'ay; toj biq'uitun yu'un chca'ay li jmul laj sa' tal ta jbic'tale’, xi ta oq'uel li Efraine.

²⁰ “Li Efraine ja' jnich'on ti lec c'upil chquile, ti lec jc'anoje. Tsots laj cac'be taq'uiel, pero te ta jna'ilan o. Solel toj yan sba co'nton yu'un; ep c'ux o ta co'nton”, xi li Muc'ul Diose.

²¹ “Israel, ac'bo comel senyail li bee, busano tonetic; comtsano lec ta asat c'u x'elan li be bu chaxanov batele. Israel sutan tal ta be ti bu ono'ox labate; sutan tal li' ta lumetic avu'une.

²² ¿Baq'uin to chacomtsan ti buyuc no'ox xaloc' xa'ech' jech chac c'u cha'al jun tseb ti buyuc no'ox xloc' x'ech'e? Yu'un li Muc'ul Diose oy c'usi ach' tsliques ta aventa li' ta avosilal ti mu'yuc bu jech xquiltique: jech chac c'u cha'al jun ants ti tsjoy smalale”, xi.

Ta to staic lequilal ta ts'acal li israeletique

²³ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: “C'alal ta xlic quic' sutel tal li' ta banamil li boch'otic chucbil ibatic ta yan banamile, me li' xa'ox oyic yan velta ta slumalic, ta yosilalique, jech chalic: ‘Ac'o ac'batuc bendición yu'un Muc'ul Dios li ch'ul vits li'i, li yavil c'usitic lec, c'usitic tuq'ue’, xi.

²⁴ Li j'abteletic ta banamil xchi'uc li jchabichijetique te chnaquiic ta Judá xchi'uc ta scotol lumetic yu'unic.

²⁵ Ta xcac'be ep sve'elic li boch'otic lubenique; ta jnojesbe lec xch'utic li boch'otic ch-alubic xae”, xi li Muc'ul Diose.

²⁶ Jech lijulov, la jvic' jsat; toj lec laj ca'ay li c'usi la jvaychine.

²⁷ Jech chal li Muc'ul Diose: “Ta to sta sc'ac'alil ta jboles lec sts'unubal cristianoetic xchi'uc chonbolometic te ta Israel xchi'uc ta Judá.

²⁸ Jech chac c'u cha'al ta sjunul co'nton la jbul loq'uel, la jines, laj yales ta lum, la jsoques, xchi'uc laj cac'be svocolique, ja' jech jun co'nton ta jva'an, ta jcha'ts'un noxtoc”, xi li Muc'ul Diose.

²⁹ “Ta sc'ac'alil le'e mu'yuc xa jech chalic: ‘Li totil me'iletique puru pajal ts'usub la slo'ic, li nich'naletique tsiq'uem yeic’, ti xiique.

³⁰ Yu'un li boch'o ta slo'ic pajal ts'usube ta ono'ox stsic' yeic; ja' jech jujuntal ta xchamic ta scoj smul stuquic”, xi li Muc'ul Diose.

³¹ Jech chal li Muc'ul Diose: “Ta to sta sc'ac'alil oy c'usi yan ach' ta jchapan jchi'uc li smomnich'nab Israele xchi'uc li smomnich'nab Judae.

³² Mu xa co'oluc jech chac c'u cha'al la jchapan jchi'uc li smoltot syame'ic ta vo'one c'alal la jloq'uesic tal ta Egipto banamile. Yu'un li stuquique muc xich'ic ta muc' li c'usi la jchapan jchi'uque, ac'o me vu'un yajvalicun”, xi li Muc'ul Diose.

³³ “Ja' jech li c'usi ta jchapan ta stojolique: C'alal me la sta sc'ac'alil cu'une, ta xcac'be ta sjolic li jmantaltaque, ta jts'ibabe ta yo'ntonic, vu'un Diosun yu'unic chic'ot; ja' jteclumal chc'otic o ec.

³⁴ Jech mu'yuc xa boch'o jech chalbe xchi'ilic, mu'yuc xa boch'o jech chalbe yuts' yalalic: ‘Tsc'an chavotquin lec li Muc'ul Diose’, mu'yuc xa boch'o xut. Yu'un scotolic chlic yotquinicun c'alal ta muc', ta biq'uit. Yu'un j'ech'el ta jch'aybe o ta co'nton li xchopolilique; mu'yuc xa ta jt'abbe o ta co'nton li smulique”, xi li Muc'ul Diose.

³⁵ Li Muc'ul Dios ti ja' laj yac' c'ac'al sventa tsacubtas osil ta c'ac'altique, xchi'uc li u xchi'uc c'analetic sventa tsacubtasic osil ta ac'ubaltique, xchi'uc ti ja' chac' syuc' sba li nab ti tsots chbac' yu'une, ja' li Muc'ul Dios sbi ti ja' tspas ta mantal scotol te ta vinajele, jech chal:

³⁶ “Me oy chc'ot yorail ti mu xc'ot ta pasel c'usi chal li mantaletic laj cal li'i ja'o yorail xu' mu xa xcom ta jteclumal ec li smomnich'nab Israele.

³⁷ Jech noxtoc me oy chc'ot ta pasel chich' bisel c'u smuc'ul li vinajele xchi'uc me oy boch'o tsta ta q'uelel bu snacleb li banamile, ja'o yorail xu' te ta jip comel li smomnich'nab Israel ta scoj li c'usitic spasojique.

³⁸ A'yo ava'yic, jech chal li Muc'ul Diose: “Ta to sta sc'ac'alil ta xich' cha'va'anel lec li lum cu'une. Ja' to te chlic tal ta toyol q'uelub osil Hananeel c'alal to ti bu Chiquin Coralton sbie.

³⁹ Li sbisele tuc' chbat c'alal to ta biq'uit vits Gareb, te chjoybij tal ta stuq'uil Goa.

⁴⁰ Scotol li stenlejaltic bu muquinaltic xchi'uc bu xch'ayubil tane, xchi'uc scotol li soplejaltic c'alal to ta bevo'tic Cedrone, xchi'uc c'alal to ta chiquin ti'coralton bu yocheb ca'etic te ta stuq'uil sloq'ueb c'ac'ale, ts'u'iltasbil ta xcom o cu'un. Ta scotol le'e mu'yuc bu chich' jinesel o; mu'yuc bu chich' soquesel o yan velta”, xi li Muc'ul Diose.