Jeremías 30 - Bible in Tzotzil de Chenalhó with Deuterocanon

Li Diose laj yal ti ta to sutic tal li boch'otic chucbilic batel ta yan banamile

¹ Li Muc'ul Diose ital sc'opanun yan velta vu'un li Jeremiasune, jech laj yalbun:

² “Vu'un li Muc'ul Diosun yu'un Israele jech chacalbot: Ts'ibao ta vun scotol li c'usitic laj calbote.

³ Ta to sta sc'ac'alil ta xquic' sutel tal ta Israel xchi'uc ta Judá li jteclumale. Li' ta xquic' tal li' ta banamil yo' bu laj ono'ox cac'beic li amoltot ayame'ic ta vo'onee, jech ta xlic sc'upinic li osil li'i”, xiyutun.

⁴ Li c'usitic laj yal Muc'ul Dios ta sventa li israeletic xchi'uc li judaetique ja' li'i:

⁵ Jech laj yal: “Ta xvinaj ov ta scoj tsots xi'el, tsots vocol, xchi'uc at-o'nton.

⁶ Jac'o ava'yic, q'uelo avilic me xu' ta x'alaj li vinique. Yu'un chquil ti scotol viniquetic snet'oj xch'utic jech chac c'u cha'al jun ants ti yu'un xa chcuxe; solel sac-lich'anic xa scotolic.

⁷ ¡Ay! toj muc' vocol chtal li jun c'ac'al le'e; mu'yuc bu yan jech xco'laj xchi'uc. Ja' yorail muc'ta at-o'nton chtal ta stojol li Jacobe, pero ta to sta yorail ta xcol loq'uel.

⁸ Vu'un li Muc'ul Diosun ti ta jpas ta mantal scotol te ta vinajele, jech chcal: Ta to jlilinbe li yabtejeb vacax chucbil ta snuq'uique; ta jtuch'anbe li yaq'uiltaque. Mu'yuc xa chcac' mozoinaticuc yu'un li yanlumetique.

⁹ Ja' xa no'ox chlic tunicuc cu'un, vu'un li Muc'ul Diosun yu'unique, xchi'uc li smomnich'on David ti chlic ochuc ta ajvalilal yu'unique”, xi li Muc'ul Diose.

Li Muc'ul Diose laj yal ti tscolta li yu'untaque

¹⁰ “Jech chcal vu'un li Muc'ul Diosune: Smomnich'nab cajtunel Jacob, mu xavat avo'ntonic; smomnich'nab Israel, mu xaxi'ic. Yu'un vu'un ta jcoltaoxuc loq'uel tal achi'uc amomnich'nabic te ta namal banamil ti bu chucbiloxuc batele. Ta to xtal acux avo'ntonic li'i; jun avo'ntonic li' chanaquiic, mu'yuc boch'o xu' chtal sibtasoxuc.

¹¹ Yu'un te oyun ta atojolic sventa chajcoltaoxuc. Ta xcules scotol li yantic lumetic ti bu la jpucoxuc batele, pero li vo'oxuque mu'yuc chaculesoxuc. Ja' no'ox ta xcac'boxuc atoj amulic, pero lec tuc' ta jpas. Yu'un ta ono'ox xcac'boxuc atojic”, xi li Muc'ul Diose.

¹² Jech chal noxtoc li Muc'ul Diose: “Li avocolique mu stac' poxtael; li atuch'emalique mu xcol o.

¹³ Mu'yuc boch'o oy ta yo'nton chascoltaoxuc. Mu'yuc boch'o tsc'an chpoxta ayayijemalic; mu'yuc poxil ti xu' chacolic yu'une.

¹⁴ Li boch'otic lec ac'anoj aba achi'uquique ta xch'ayoxuc o ta yo'nton, mu'yucoxuc xa o ta yo'nton. Yu'un ep layayij cu'un jech chac c'u cha'al li boch'o lec chac'be yajcontrae; lec laj cac'bot nucul jech chac c'u cha'al chac' nucul li boch'o toj simarone, ja' ta scoj ti toj ep c'usi chopol laj apase, ti mu albaj c'u yepal laj asa' li amule.

¹⁵ ¿C'u yu'un cha'avanic ta scoj li tsots avocolique? Yu'un mu stac' poxtael li c'usi c'ux chava'yique. Ja' ta scoj toj ep achopolilic, toj ep amulic ti jech la jpasboxuque.

¹⁶ Pero li boch'otic chayuts'intaoxuque ta xcac' ta uts'intael ec; li avajcontrataque chucbil ta xbatic ta yan banamil ec. Li boch'otic la spojboxuc batel c'usitic oy avu'unique ta xich'ic pojbel c'usi oy yu'unic ec. Li boch'otic laj yelc'an c'usi oy avu'unique ta xich'ic elc'anbel batel c'usi oy yu'unic ec.

¹⁷ Yan li vo'oxuque ta xcac' colanic lec; ta jpoxtaboxuc li atuch'emalique, ac'o me jech cha'albat ac'oplalic: ‘Li Sione comtsanbil o; mu'yuc xa boch'o oy ta yo'nton o’, ac'o me xi ac'oplalic”, xi li Muc'ul Diose.

¹⁸ Li Muc'ul Diose jech chal: “Ta to xcac' sutuc tal li smomnich'nabtac Jacob ti chucbilic batel ta yan banamile; ta to xlic c'uxubajuc ta co'nton li yosilalique. Li slumalique ta xich' cha'va'anel te ta yav ti bu to'ox oye, xchi'uc li pasubmantale ta xich' va'anel jech chac c'u cha'al ono'oxe.

¹⁹ Ta to xvinaj chq'uejinic sventa tstojic ta vocol, xchi'uc ta xvinaj tse'ej sventa xcuxetel yo'ntonic. Ta jbolesic, mu'yuc ta xcac' bic'tajicuc o; ta xcaq'uic ta ich'el ta muc', mu'yuc chcaq'uic ta labanel.

²⁰ Li israeletique ja' to jech chc'otic jech chac c'u cha'al ono'oxe; ta scotol ti c'u yepal oyique j'ech'el te chcomic o ta jtojol. Ta xcac'beic stoj smulic li j'uts'intavanej yu'unique.

²¹ Te ta xloc' ta stojolic banquilal yu'unic; te ta xloc' ta stojolic jpasmantal yu'un stuquic. Ta xcac' nopajicuc tal ta jtojol, jech xu' yu'unic ta xnopajic tal. ¿Boch'o xu' yu'un ta xnopaj tal ta jtojol ta stuc no'ox?

²² Vu'un Diosun yu'unic chic'ot; ja' jnich'nab chc'otic ec”, xi li Muc'ul Diose.

²³ A'yo ava'yic, li sc'ac'al yo'nton Muc'ul Diose ja' jech chac c'u cha'al tsatsal ic'al vo', ja' jech chac c'u cha'al sutub ic', te sututet chc'ot ta stojolic li boch'otic chopolique.

²⁴ Muc teuc no'ox ch-ech' li sc'ac'al yo'nton Muc'ul Diose, ja' to ti me ic'ot ta pasel yu'un li c'usi snopoj tspase. Ta to sta sc'ac'alil chava'ibeic smelol scotol le'e.