Jeremías 3 - Bible in Tzotzil de Chenalhó with Deuterocanon

Mu'yuc lec c'usi la spasic ta stojol Muc'ul Dios li israeletique

¹ Jech chal noxtoc li Muc'ul Diose: “Me oy jun vinic ta xicta sbaic xchi'uc yajnile, me imalij ta yan vinic li antse, ¿me chbat to yic' yan velta li vinique? ¿Me mu ja'uc no'ox tsoquesbe sc'oplal sjunul slumal me jech tspase? Ja' jech laj apas ec li vo'ote, Israel; xco'laj xchi'uc ep xa boch'o lamulivaj achi'uc. ¿Me chanop ti xu' to chasut tal ta jtojole?, xacutot vu'un li Muc'ul Diosune.

² “Q'uelo batel lec avil li vitstique, nopo me lec; ¿me oy to bu junuc ti mu'yuc apasoj c'usi chopol tee? Xco'laj xchi'uc te chotolot ta ti'be yu'un chamala li boch'o chasc'upinote; ja' co'ol jech chapas jech chac c'u cha'al tspasic li arabetic ti chmacvanic ta be ta xocol banamile. Ta scoj amul, ta scoj achopolil isoc avu'un li alumale.

³ Ja' yu'un muc xtal li vo'e, jech muc xa xac' o c'alal yorail vo'olaltic. Li asate ja' co'ol xchi'uc sat jmulavil ants, jech mu'yuc q'uexlal sba chava'ay o.

⁴ Pero jech to chavalbicun o: ‘Tati, vo'ot ono'ox jtojobtasvanejot cu'un c'alal ta jbic'tal,

⁵ ¿me j'ech'el cha'ilin o ta jtojol?, ¿me sbatel osil mu xlaj o li sc'ac'al avo'ntone?’, xachi. C'alal ja'o chaval jeche, avac'ojbe yipal spasel o c'usi chopol ti bu to c'alal xu' avu'une”, xi.

Li Muc'ul Diose laj yalbe Israel xchi'uc Judá ti ac'o sutes yo'ntonique

⁶ C'alal ja'o tiq'uil ta ajvalilal li Josiase, jech laj yalbun li Muc'ul Diose: “¿Me laj avil c'usi la spas li jbajmantal Israele? Te ibat ta toyol vitsetic xchi'uc ta yolon muc'tic te'etic, te imulivaj.

⁷ Jech la jnop: ‘C'alal me laj yo'nton ta spasel scotol jech le'e, ta sut tal ta jtojol jna'’, xichi. Pero muc sut o tal. Li yixlale, ja' li jbajmantal Judae,

⁸ laj yil ti laj quicta comel li jtoyba Israel ti laj cac'be lec svunal ti muc xa quic'ojuque. Pero li jbajmantal Judae mu'yuc ixi' o; ibat mulivajuc ec.

⁹ Yu'un mu tsotsuc sc'oplal laj ya'ay li c'usi c'otem ta pasele, jech la soques o li slumale, yu'un imulivaj ta scoj ti ibat yich' ta muc' li tonetic xchi'uc li te'etique.

¹⁰ C'alal jech la spas li jbajmantal Judae, muc xa ta scotoluc sjol yo'nton isut tal ta jtojol. La scuy sba no'ox, spasel no'ox yu'un. Vu'un jtuc Muc'ul Diosun ti jech chcale”, xiyutun.

¹¹ Li Muc'ul Diose jech laj yalbun noxtoc: “Li jbajmantal Israele ja' jutuc no'ox smul; ja' toj ech'em smul li jtoyba Judae.

¹² Batan, jech xbat aval ta stuq'uil norte: ‘Jbajmantal Israel, sutan tal ta jtojol. Mu'yuc ta xcac' c'otuc ta atojol li sc'ac'al co'ntone, yu'un li vu'une muc'ul jc'uxubinvanejun; muc teuc stsoq'uet o co'nton ta atojol.

¹³ Ja' no'ox tsc'an chavotquin lec ti oy amule, yu'un abajojbun jmantal, vu'un li Muc'ul Diosun avu'une. Ay mulivajan ta stojol yan diosetic te ta yolon li muc'tic te'etique, yu'un muc xach'un li c'usi laj cale, xacutot, vu'un li Muc'ul Diosune’, uto”, xiyutun.

¹⁴ Jech laj yal noxtoc li Muc'ul Diose: “Jbajmantaletic, suteso avo'ntonic ta jtojol, yu'un vu'un avajvalicun. Ta xquic'oxuc jun ta jujun lum, chib ta jujuchop abiic, jech chaquic'oxuc sutel ta Sión.

¹⁵ Ta xcac'boxuc jpasmantaletic avu'unic ti ja' tspasic jech chac c'u cha'al tsc'an co'ntone; ja' chlic sventainoxuc lec ta sventa sbijilic.

¹⁶ C'alal me la'epajic, me labolic xa'ox te ta avosilalique, mu'yuc xa boch'o chc'opoj ta sventa li xcaxail jmantale, mu'yuc xa boch'o tsnop, mu'yuc xa boch'o tst'ab, yu'un mu'yuc xa ta yo'ntonic o, xchi'uc mu snopic me tspasic yan. Jech chcal vu'un li Muc'ul Diosune.

¹⁷ C'alal me la sta sc'ac'alil le'e, li Jerusalene ‘Smuc'ta Chotleb Muc'ul Dios’, xi sbi chc'ot. Scotol banamiletic te ta stsob sbaic tal sventa chiyich'icun ta muc', jech mu xa ja'uc chac'beic yipal spasel li c'usi toj chopol oy ta yo'ntonique.

¹⁸ “C'alal me ic'ot sc'ac'alil le'e, li Judae jmoj chbat stsob sbaic xchi'uc li Israele, jech jmoj te ta xtalic ta norte te ta banamil yo' bu laj cac'be yich'ic li amoltot ayame'ic ta vo'onee.

La spas sloc'obal sdiosic li Israeletique

¹⁹ “Jech chcal jtuc vu'un li Muc'ul Diosune: Israel, vu'une scotol co'nton la jnich'oninot, jech laj cac'bot avich' li lequil banamil ti ja' no'ox stuc toj lec ta scotol yantic banamile. La jnop ti ‘Tati’ xavutun oe, ti mu'yuc chavoc' aba ta jtojole.

²⁰ Pero ja' jech laj apas jech chac c'u cha'al jun ants ti mu junuc yo'nton ta stojol smalale. Ja' no'ox jech muc xapas ta jun avo'ntonic ta jtojol ec, xichi chcal vu'un li Muc'ul Diosune”.

²¹ “Lec xvinaj x'avetic ta oq'uel le' ta vitsetic li israeletique, yu'un ta sc'anic coltael ta sventa ti ch'ayemic ta bee, yu'un la sjipicun ta yo'ntonic vu'un li Muc'ul Diosun yu'unique.

²² Jbajmantaletic, suteso avo'ntonic ta jtojol; vu'un ta jpoxtaboxuc li atoyobbailique”, xi li Diose. “Lec oy, ta xitalcutic ta atojol, yu'un vo'ot Muc'ul Diosot cu'uncutic.

Itac'ovic ta stojol Dios li israeletique

²³ Ta melel altic no'ox ti chibatcutic ta vitsetique, ti te xi'avetcutic ta stselejtique. Ta melel vo'ot li Muc'ul Diosot cu'uncutique; vo'ot no'ox te oy ta atojol li coltael ta sventa israeletique.

²⁴ Li diosetic ti chac' no'ox q'uexlale ja' la sve' scotol c'usi oy yu'unic li jmoltotaccutic ti c'alal biq'uituncutic to'oxe, ja' li xchijic, li xvacaxic, xchi'uc li squerem stsebique.

²⁵ Solel chiyalcutic o ta lum ta scoj q'uexlal; mu xa xcac' ta ilel jsatcutic, yu'un ta jbic'talcutic ono'ox la jta ep jmulcutic xchi'uc li jmoltot jyame'cutique. Ja' jechuncutic o c'alal to tana; mu'yuc ono'ox laj quich'cutic ta muc' c'usi chaval, vo'ot li Muc'ul Diosot cu'uncutique”, xiic.