Jeremías 29 - Bible in Tzotzil de Chenalhó with Deuterocanon

Li Jeremiase la sts'ibabe batel vun li boch'otic chucbilic batel ta yan banamile

^1-2 C'alal chucbilic xa'ox batel ta yan banamil li ajvalil Jeconías xchi'uc sme', xchi'uc j'abteletic yu'un, xchi'uc li banquilaletic ta Judá xchi'uc ta Jerusalene, xchi'uc li boch'otic oy lec sbijilic ta spasel c'usiuc no'oxe, xchi'uc li jtentaq'uinetique, li Jeremiase lic spas carta te ta Jerusalén yu'un tstac batel c'alal to ta Babilonia ta stojol li moletic, li paleetic, li j'alc'opetic xchi'uc li yantic judaetic ti te to cuxajtic ti c'alal ay yich'ic iq'uel batel ta Babilonia yu'un li ajvalil Nabucodonosore.

³ Li vune ja' la stacbe batel li Elasa xnich'on Safán, xchi'uc Gemarías xnich'on Hilcías, ti itacatic batel ta stojol ajvalil Nabucodonosor yu'un li ajvalil Sedequiase. Li cartae ja' jech chal:

⁴ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chayalboxuc: “Acotolic vo'oxuc ti la jloq'uesoxuc batel li' ta Jerusalén ti laj cac'oxuc batel ta chuquel ta Babiloniae, jech chacalboxuc:

⁵ Pasic lec anaic, te xanaquiic, ts'unic lec jsatinom te'etic avu'unic, lo'anic li sate.

⁶ Nupinanic, ac'o ayinuc aquerem atsebic; ac'o nupinicuc ec li aquerem atsebique jech ac'o ayinuc yalab xnich'nabic ec. Bolanic epajanic te; mu me xabic'tajic.

⁷ Pasic me c'usi ja' sventa slequilal li lum yo' bu la jtacoxuc batele. C'opanicun ta sventa li lume, yu'un li slequilale ja' avu'unic chc'ot.

⁸ Vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele, jech chacalboxuc: Mu me xavac' abaic ta lo'lael yu'un li j'alc'opetic te oy ta atojolique, xchi'uc li boch'otic sna'ic scuyoj sbaic c'usi chc'ot ta pasele, xchi'uc li boch'otic oy c'usi chil ta xvayechique.

⁹ Yu'un ja' no'ox ch-epalc'opojic ta jventa; muc tacbilicuc cu'un”, xi li Muc'ul Diose.

¹⁰ “Jech yaloj li Muc'ul Diose: ‘C'alal me its'aqui li lajuneb xchanvinic (70) jabil te ta Babiloniae, ta xlic jcoltaoxuc, ta xcac' c'otuc ta pasel li jc'op ti laj cal ti chaquic'oxuc sutel tal li' ta banamile.

¹¹ Vu'un jna'oj jtuc li c'usi chapal cu'un ta aventaique; chapal cu'un sventa alequilalic, ma'uc sventa avocolic. Ts'acal chacac'boxuc li c'usi amalaojic ono'oxe.

¹² Chlic ac'anbicun vocol, chlic ac'opanicun, jech ta xca'iboxuc ac'opic.

¹³ Chlic asa'icun, jech chataicun yu'un scotol avo'nton chasa'icun.

¹⁴ Ta xcac' ac'o ataicun, yu'un ta xcac' sutanic tal ti bu chucbiloxuc batele. Ta jtsoboxuc sutel tal ti buyuc no'ox la jpucoxuc batel ta yantic lum xchi'uc ta yantic banamile; te ta xvul cac'oxuc ti bu ono'ox laloq'uic batel cu'une’, xi li Diose.

¹⁵ “Li vo'oxuque jech chavalic: ‘Li Muc'ul Diose laj xa yac'butic j'alc'opetic cu'untic li' ta Babilonia’, xachiic.

¹⁶ Li Muc'ul Diose jech chal ta sventa li ajvalil ti te chotol ta xchotleb Davide xchi'uc ta sventa jnaclumetic li' ta lume, ja' li avuts' avalalic ti muc xchucatic batele:

¹⁷ ‘Jech chal li Muc'ul Dios ti tspas ta mantal scotol te ta vinajele: Ta jtacbeic tal muc'ta c'op, vi'nal, xchi'uc tsatsal chamel. Ja' jech ta jcomtsanic jech chac c'u cha'al higo ti c'a'em, ti mu stac' lo'el oe.

¹⁸ Ta jnutsic loq'uel ta muc'ta c'op, ta vi'nal, xchi'uc ta tsatsal chamel. Ta xcac' ti na'lebilic yu'un li muc'tic lumetique; chopol chich'ic albel sc'oplalic o. Oy spucujalic ch-a'yatic, na'lebilic, uts'intabilic chcomic o yu'un li yantic cristianoetic ti bu la jpuquic batele.

¹⁹ Yu'un muc xch'unbicun li jc'op ti laj calbeic ta sventa j'alc'opetic cu'une, ti scotol ora la jtac tal ta stojolique.

²⁰ Ja' yu'un vo'oxuc ti la jloq'uesoxuc batel li' ta Jerusalén ti la jtacoxuc batel ta Babiloniae, ich'ic ta muc' li c'usi chcale’, xi li Muc'ul Diose.

²¹ “Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal ta sventa li Acab xnich'on Colaiase xchi'uc ta sventa li Sedequías xnich'on Maasías ti chayalboxuc ti vu'un ta jventa chc'opoj scuyojique: ‘Le'e ta xcac' ta sc'ob ajvalil Nabucodonosor ta Babilonia; te ta atojolic ta smilan.

²² Ja' yu'un c'alal oy boch'o tsc'anic ac'o stoj smul li judaetic ti chucbil ibatic ta Babiloniae, jech chalic: Jech ac'o spasbot Muc'ul Dios jech chac c'u cha'al la spasbe li Jeconías xchi'uc Acab ti ichic'atic ta c'oc' yu'un ajvalil ta Babiloniae, xiic.

²³ Ti jech chcac' c'otuc ta pasel ta stojolique yu'un ja' la spasic c'usi toj chopol te ta Israel. La sc'opanbe yajnil xchi'iltaquic, xchi'uc la scuy sbaic ti vu'un ta jventa chc'opojique, pero muc tacbilicuc cu'un. Vu'un lec jna'oj, vu'un testigoun’, xi li Muc'ul Diose”, xi batel ta carta li Jeremiase.

Oy c'usi tsots i'albat Semaías

²⁴ Li Muc'ul Diose jech laj yalbe li Jeremiase: Jech xavalbe batel li Semaías liquem ta Nehelame:

²⁵ “Jech chal li Muc'ul Dios ti tspas ta mantal scotol te ta vinajele, ja' li Dios yu'un Israele: ‘Vo'ot ta abi atuc laj atac tal li carta li' ta Jerusalén ta stojol li pale Sofonías xnich'on Maasiase, xchi'uc ta stojol li yantic paleetique. Jech laj avalbe tal li Sofoniase:

²⁶ Li Muc'ul Diose vo'ot ta stic'ot ta paleal ta xq'uexol li pale Joiadae; vo'ot chaventain li ch'ulna yu'un Muc'ul Diose. Me oy jun chuvaj vinic ti chlic scuy sba ta j'alc'ope, xu' chachuc ta cadena, xchi'uc lats'bo yacan ta lats'ubte', xavut.

²⁷ ¿C'u yu'un muc xachuc li Jeremías liquem ta Anatot ti ic'opoj ta atojolic jech chac c'u cha'al j'alc'ope?

²⁸ Yu'un te aq'ueloj ti la stacbe batel carta li boch'otic chucbilic batel ta Babiloniae, jech laj yalbe batel: Paso lec anaic, te naclanic, ts'unic jsatinom te'etic, te xalo'beic sat, yu'un chajalijic te ta yan banamil, ti xut batel ta cartae’, xayutot li Muc'ul Diose”, xut.

²⁹ C'alal laj yaptabe scarta Semaías li pale Sofoniase, te yabinoj li Jeremiase.

³⁰ Vu'un li Jeremiasune ital sc'opanun li Muc'ul Diose, jech laj yalbun:

³¹ “Jech xavalbe batel scotol li boch'otic chucbilic batel ta yan banamile: ‘Vu'un li Muc'ul Diosune jech chcal ta sventa li Semaías te ta Nehelam, ti ja' no'ox la slo'laoxuc ti chayalboxuc ti vu'un calojbe li c'usi chale, pero muc vu'cun calojbe.

³² Ja' yu'un jech chcal vu'un li Muc'ul Diosune: Ta xcac'be stoj smul c'alal ta smomnich'nab li Semaías liquem ta Nehelame. Mu'yuc smomnich'nab ta xcom li' ta stojol li jteclumale; mu'yuc ta xilic o li c'usi lec ta jpas ta stojol li jteclumale, yu'un toj chopol c'usi laj yal ta jtojol’, uto”, xiyutun li Muc'ul Diose.