Jeremías 28 - Bible in Tzotzil de Chenalhó with Deuterocanon

Mu meleluc c'usi laj yal li j'alc'op Hananiase

¹ C'alal yo'bal u xa'ox stsacoj xchanibal jabil yochel ta ajvalilal ta Judá li Sedequiase, li j'alc'op Hananías xnich'on Azur te ta Gabaone jech laj yalbun te ta xch'ulna Muc'ul Dios ta stojol paleetic xchi'uc ta stojol scotol li jteclume:

² —Li Muc'ul Dios ti tspas ta mantal scotol te ta vinajele, ja' li Dios yu'un Israele, jech laj yal: ‘Ta jc'asbe li yabtejeb vacax yu'un ajvalil ta Babiloniae.

³ Le' no'ox ta chib jabil ta xcac' sutuc tal li' ta banamil li c'usitic chtun ta jch'ulna ti laj yich' batel ta Babilonia li ajvalil Nabucodonosore.

⁴ Jech noxtoc ta xcac' suticuc tal li' ta banamil li Sedequías ajvalil ta Judá xnich'on Joaquime xchi'uc yantic achi'iltaquic ti co'ol chucbil ibatic ta Babiloniae, yu'un vu'un ta jc'asbe li yabtejeb vacax yu'un ajvalil Nabucodonosore’, xi li Muc'ul Diose —xi.

⁵ Vu'un li j'alc'op Jeremiasune jech la jtac'be li j'alc'op Hananías te ta stojol paleetic xchi'uc ta stojol li jteclum ti te oyic ta ch'ulna yu'un Muc'ul Diose:

⁶ —¡Toj lec! Jech ac'o spas li Muc'ul Diose, ac'o yac' c'otuc ta pasel Muc'ul Dios li c'usi laj aval ti ta sut tal ta Babilonia li c'usitic chtun li' ta ch'ulna yu'un Muc'ul Diose xchi'uc scotol li boch'otic chucbil ibatique.

⁷ Pero a'yo ava'ay c'usi chacalbot li' ta stojol scotol li jchi'iltactique:

⁸ Li yantic j'alc'opetic ti ba'yuc jelovenic cu'untique, laj ono'ox yalic ti chtal muc'ta c'op, tsots vocol, xchi'uc tsots chamel ta stojol li muc'tic lumetique xchi'uc ta stojol li muc'tic ajvaliletic ti tsots xu' yu'unique.

⁹ Pero li jun j'alc'op ti chal oy c'usi toj lec chc'ot ta pasele, ja' to ta jch'untic ti ja' tacbil tal yu'un Muc'ul Dios me ic'ot ta pasel li c'usi laj yale —xcut.

¹⁰ Li j'alc'op Hananiase la sloq'uesbun li yabtejeb vacax chucul ta jnuq'ue; biq'uitic la slilin.

¹¹ Jech laj yal ta stojol scotol li jteclume: —Jech chal li Muc'ul Diose: ‘Le' ta chib jabile ja' jech ta jlilinbe li yabtejeb vacax yu'un ajvalil Nabucodonosor ta Babilonia ti xchucojbe ta snuc' li cristianoetic ta jujun banamile’, xi li Muc'ul Diose —xi li Hananiase. Li vu'une la jtam batel jbe.

¹² Ts'acal to c'alal sc'asoj xa'ox Hananías li yabtejeb vacax jchucoj ta jnuq'ue, ital sc'opanun li Muc'ul Diose, jech laj yalbun:

¹³ “Jech xavalbe li Hananiase: ‘Jech chal li Muc'ul Diose: Laj ac'as li yabtejeb vacax pasbil no'ox ta te'e, pero chavich'be xq'uexol pasbil lec ta tsatsal taq'uin.

¹⁴ Vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele, jech caloj: Li muc'tiquil lum le'e cac'ojbeic ta snuq'uic yabtejeb vacax pasbil ta tsatsal taq'uin, yu'un jech ac'o tunicuc yu'un li ajvalil Nabucodonosor ta Babiloniae. C'alal ta chonbolometic cac'ojbe ta sc'ob, xi li Muc'ul Diose’, uto”, xiyutun.

¹⁵ Ja' yu'un jech lic calbe li j'alc'op Hananiase: —A'yo ava'ay, Hananías, muc tacbilucot yu'un li Muc'ul Diose. Ta avo'nton atuc ti jech chapatbe yo'nton li jchi'iltactic ta avepalc'ope.

¹⁶ Ja' yu'un li Muc'ul Diose jech chayalbot: ‘A'yo ava'ay, ta jloq'uesot li' ta sba banamile. Li jabil li'i ta xacham, yu'un li c'usi laj avale ja' no'ox sventa laj acontrainun vu'un li Muc'ul Diosune’, xayutot —xcut.

¹⁷ Ja' yu'un li Hananiase te no'ox icham ta svucubal u yochel li jabile.