Jeremías 27 - Bible in Tzotzil de Chenalhó with Deuterocanon

Senyail c'op sventa yabtejeb vacax

¹ C'alal mu'yuc to'ox ep jabil yochel ta ajvalilal ta Judá li Sedequías, xnich'on Josiase, ja'o te ital c'opanatuc yu'un Muc'ul Dios li Jeremiase, jech i'albat:

² “Paso jaylicuc nuculetic xchi'uc jun yabtejeb vacax; chuco ta anuc'.

³ Ts'acal xatac batel mantal ta stojol li ajvaliletic ta Edom, ta Moab, ta Tiro, ta Sidón, xchi'uc li ajvalil yu'un smomnich'nabtac Amone. Ja' xatacbe batel mantal li viniquetic ti te chtalic ta Jerusalén ti tsvu'lanic li Sedequías ajvalil ta Judae.

⁴ Albo batel ti jech ac'o c'ot yalbeic li yajvalique: Jech chal li Muc'ul Dios ti tspas ta mantal scotol te ta vinajele, ja' li Dios yu'un Israele:

⁵ Vu'un la jpas li banamile xchi'uc li cristianoetique xchi'uc li chonbolometic oy ta sba banamile. Ta jvu'el ta jtsatsal, ta coc jc'ob imeltsaj cu'un, jech xu' cu'un ta xcac'be ta sc'ob li boch'o tsc'an co'nton chcac'bee.

⁶ Ja' yu'un li banamiletic li'i laj xa cac'be ta sc'ob li cajtunel Nabucodonosor ajvalil ta Babiloniae; cac'ojbe ta sc'ob scotol c'alal ta chonbolometic.

⁷ Scotol li muc'tiquil lumetique ja' chlic tunicuc yu'un, xchi'uc xnich'nab, xchi'uc smomnich'nabtac, ja' to me la sta sc'ac'alil i'och ta sc'ob yantic banamil, muc'tic ajvaliletic ec li yosilale.

⁸ Me oy bu junuc banamil, o ajvalil mu sc'an xchuc ta snuc' li yabtejeb vacax chac' li Nabucodonosor ajvalil ta Babiloniae, vu'un ta xcac'be stoj smul; ta xcac' ta milel ta espada, ta vi'nal, xchi'uc ta tsatsal chamel, ja' to ti me i'ochic ta sc'ob scotole, uto”, xi li Muc'ul Diose.

⁹ “Mu me xavich'beic ta muc' sc'op li j'alc'opetic avu'unic, li jt'unuletic, li boch'otic oy c'usi chvaychinic, li boch'otic sna'ic c'usi chc'ot ta pasele, xchi'uc li j'ac'chameletique; mu me xach'unic me jech chayalboxuque: ‘Mu me xavac' abaic ta sc'ob li ajvalil ta Babiloniae’, me xayutoxuque.

¹⁰ Yu'un li stuquique puru epalc'op no'ox li c'usitic chalique; ja' no'ox sventa ac'o loc'anic batel li' ta avosilalique, ti ac'o jpucoxuc batel yu'un te ac'o chamanic oe.

¹¹ Yan li jun banamil ti chchuc ta snuc' li yabtejeb vacax chac' ajvalil ta Babiloniae ti chlic tunuc yu'une, te chcac' comuc o ta yosilal, te ch-abtej, te chnaqui o”, xi li Muc'ul Diose.

¹² Vu'un li Jeremiasune, ja' jech lic calbe scotol ec li ajvalil Sedequiase, jech laj calbe: “Chuco ta anuq'uic li yabtejeb vacax yu'un ajvalil ta Babiloniae; tunanic yu'un xchi'uc li steclumale, jech cuxul chacomic.

¹³ ¿Me yu'un ja' lec ti chacham ta pasc'op, ta vi'nal, xchi'uc ta chamel achi'uc scotol jchi'iltactic jech chac c'u cha'al yaloj Muc'ul Dios ta sventa li lum boch'o mu xac' sba ta sc'ob li ajvalil ta Babiloniae?

¹⁴ Ja' lec mu xavich'beic ta muc' sc'op li j'alc'opetic me chayalboxuc ti mu xavac' abaic ta sc'ob li ajvalil ta Babiloniae, yu'un puru epalc'op li c'usi chalique.

¹⁵ Yu'un li Muc'ul Diose jech yaloj: ‘Muc tacbilicuc cu'un; jeche' no'ox tsnopic li c'usi chalic ta jbie. Ja' no'ox sventa c'u cha'al xu' ta jipoxuc loq'uel, yu'un ac'o lajanic o achi'uquic li j'alc'opetic ti jech chayalboxuque’, xi li Diose”, xcut.

¹⁶ Jech lic calbe ec li paleetique xchi'uc scotol li jteclume: “Jech chal li Muc'ul Diose: ‘Mu me xach'unic me jech chayalboxuc li j'alc'opetic avu'unique: Li c'usitic chtun ta ch'ulna yu'un Muc'ul Dios ti ich'bil batel ta Babiloniae, ta sut tal ta oratic xa no'ox, me xayutoxuque, altic no'ox tsnopic ti jech chalique.

¹⁷ ¡Mu me xach'unic! Ac'o abaic ta sc'ob li ajvalil ta Babiloniae, jech chacuxiic to. ¿Me yu'un ja' lec ti xch'ijan chcom o li alumalique?

¹⁸ Me ta melel ja' j'alc'opetique, me ta melel vu'un ta jc'opanique, ac'o sc'anbicun vocol ti mu me xbat ta Babilonia li c'usitic chtun ti li' to comen ta ch'ulna xchi'uc ta spasubmantal ajvalil ta Judae xchi'uc ta Jerusalene’, xi li Diose”, xcut.

¹⁹ Yu'un li Muc'ul Diose jech yaloj ta sventa li oyetic le'e, li yavil vo'e, li snaclebtaque, xchi'uc li scomelal c'usitic chtun ti li' to comenic ta lume,

²⁰ ti mu'yuc laj yich' batel li Nabucodonosor c'alal la xchuc batel ta Babilonia li ajvalil ta Judae, ja' li Jeconías xnich'on Joacime, xchi'uc scotol li boch'otic ich'bilic ta muc' ta Judá xchi'uc ta Jerusalene.

²¹ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech yaloj ta sventa li c'usitic chtun ti te to comenic ta ch'ulnae xchi'uc ta spasubmantal ajvalil ta Judae xchi'uc te ta Jerusalene:

²² “Ta xich' ich'el batel ta Babilonia; te ta xcom o, ja' to ti c'usi ora ta jc'an chich' ich'el sutel tal yan velta li' ta banamile”, xi li Muc'ul Diose.