Jeremías 26 - Bible in Tzotzil de Chenalhó with Deuterocanon

Li Jeremiase chapal xa'ox sc'oplal chmilat

¹ C'alal ja' to i'och ta ajvalilal ta Judá li Joacim xnich'on Josiase, ja'o ic'opanat yu'un Muc'ul Dios li Jeremiase,

² jech i'albat: “Bat va'an aba te ta yamaq'uil ch'ulna. Scotol li c'usi chacalbote albo ya'yic scotol li achi'iltac ti chliquic tal ta lumetic ta Judá ti te chtal yich'icun ta muc' ta ch'ulna cu'une; mu me c'usi xamuc comel.

³ Naca me lec cha'yic, jech xu' chlic scomtsanic li chopol be stamojique, jech mu'yuc ta xcac'beic li c'usi jnopoj chcac'beic ta scoj li c'usi chopol tspasique.

⁴ Jech xavalbe ya'yic; jech chcal vu'un li Muc'ul Diosune: ‘Me jech mu xavich'icun o ta muc', me mu xach'unic li mantaletic cu'un laj cac'boxuque,

⁵ xchi'uc me mu xavich'beic o ta muc' sc'op li j'alc'opetic cu'un ti te ono'ox la jtaquilan o tal ta atojolic ti muc ono'ox xavich'ic ta muq'ue,

⁶ li ch'ulna li'i ja' jech ta jpasbe jech chac c'u cha'al la jpasbe ono'ox te ta Siloe. Ja' sq'uelubil ta xc'ot ta scotol yantic lumetic ti chopol sc'oplal chcom o li lum li'i’, uto”, x'utat yu'un li Muc'ul Diose.

⁷ Scotol li c'usitic laj yal te ta ch'ulna li Jeremiase, laj ya'yic li paleetique, li j'alc'opetique, xchi'uc scotol li jteclume.

⁸ C'alal ilaj yo'nton ta yalel c'usi i'albat yu'un Muc'ul Dios li Jeremiase, li paleetic, li j'alc'opetic, xchi'uc scotol li jteclume la stsaquic, jech laj yalbeic: “¡Ta jbel sc'oplal chacham!

⁹ ¿C'u yu'un ti tsots avo'nton chaval ta sventa Muc'ul Dios ti ja' jech chich' pasbel jech chac c'u cha'al laj yich' pasbel te ta Silo li ch'ulna li'i, xchi'uc ti chich' yavnaijesel o li lum li'i, ti solel mu'yuc yajval chcom oe?”, xutic. Jech la stsob sbaic scotol li cristianoetic te ta ch'ulna yu'un Muc'ul Diose yu'un tscontrainic li Jeremiase.

¹⁰ C'alal laj ya'yic banquilaletic ta Judá li c'usi ic'ot ta pasele, te ibatic ta spasubmantal ajvalil te ta ch'ulna, te c'ot chotiicuc ti bu Ach' Ti'na sbie.

¹¹ Li paleetic xchi'uc j'alc'opetique jech laj yalbeic li banquilaletic xchi'uc scotol li jteclume: “Li vinic li'i ta persa ta xich' milel, yu'un chopol c'usi laj yal ta sventa li lum li'i, laj ava'ay lec ta achiquin atuquic”, xut.

¹² Li Jeremiase lic c'opojuc ta stojol li banquilaletic xchi'uc ta stojol li jteclume, jech laj yal: “Ja' Muc'ul Dios la stacun ti jech chic'opoj ta sventa ch'ulnae xchi'uc ta sventa li lum li'i, jech chac c'u cha'al laj ava'yic laj cale.

¹³ Ja' yu'un li' ta orae, lecubtasic li atalelique xchi'uc li c'usi chapasique; ja' ch'unbeic c'usi chal li Muc'ul Dios cu'untique, jech mu'yuc chayac'boxuc li tsots vocol ti yaloj chayac'boxuque.

¹⁴ Yan li vu'une li' xa oyun ta ac'obic; pasbicun li c'usi lec chava'yique, li c'usi tsc'an avo'ntonique.

¹⁵ Pero na'o me ava'yic, me chamilicune, vo'oxuc chcom ta abaic xchi'uc jteclum xch'ich'al li jun vinic ti mu'yuc smule, yu'un ta melel tacbilun tal yu'un Muc'ul Dios ti tal cal ava'yic ta jamal li c'usi chc'ot ta pasele”, xut.

¹⁶ Li banquilaletic xchi'uc scotol jteclume jech laj yalbeic li paleetique xchi'uc li j'alc'opetique: “Li vinic li'i mu'yuc smul ti chich' milele, yu'un ja' ta sventa Muc'ul Dios cu'untic ti jech tal yalbutique”, xutic.

¹⁷ Oy jayibuc moletic te oyic iva'iic, jech laj yalbeic scotol li jteclume:

¹⁸ “Li Miqueas te ta Moresete ta sventa Muc'ul Dios laj yal c'usi chc'ot ta pasel ti c'alal ja'o yorail tiq'uil ta ajvalilal ta Judá li Ezequiase. Jech laj yal ta stojol scotol li xchi'iltaque: ‘Jech chal li Muc'ul Dios ti tspas ta mantal scotol te ta vinajele: Li Sione ja' jech ta xcom jech chac c'u cha'al banamil ti lec locbile; li Jerusalene puru ton xa te busajtic chcom; li vits li' ta ch'ulnae ta xnoj ta chopol ts'i'laletic’, xut.

¹⁹ “Li ajvalil Ezequías xchi'uc scotol li jchi'iltactic ta Judae ¿me yu'un la smilic ec li Miquease? ¿Me muc ja'uc no'ox lic xi'icuc yu'un li Muc'ul Diose? ¿Me muc ja'uc no'ox lic sc'anbeic vocol ti ac'o c'uxubinaticuque, jech muc x'ac'batic o li svocolic ti sc'oplal ox chich'ique? ¿Li vu'utique me xu' ta jpastic li c'usi toj chopol ti xu' chc'ot ta cac'oltique?

²⁰ “Jech noxtoc li j'alc'op Urías xnich'on Semaías te ta Quiriat-jearime, ta sventa Muc'ul Dios laj yal c'usi chc'ot ta pasel ta stojol li lum li'i xchi'uc li banamil li'i. Co'ol laj yal jech chac c'u cha'al laj yal li Jeremiase.

²¹ Li ajvalil Joacim xchi'uc li j'abteletic, li banquilaletic yu'une, ta xa'ox smilic ti c'alal laj ya'yic jech laj yale; pero c'alal laj ya'ay li Uriase ixi', jech ijatov batel ta Egipto.

²² Li ajvalil Joacime la stac batel ta Egipto li Elnatán xnich'on Acbore xchi'uc yantic viniquetic.

²³ Ja' ay yiq'uic sutel tal li Uriase; te vul yac'beic ta sc'ob li ajvalil Joacime. Li Joacime la smil; te no'ox bat yac' ta muquel ta coman muquinaltic yu'unic”, xiic li moletique.

²⁴ Li Ahicam xnich'on Safane ja' la spoj li Jeremiase, jech muc x'och ta sc'ob li jteclume, jech muc xmilat.