Jeremías 25 - Bible in Tzotzil de Chenalhó with Deuterocanon

Lajuneb xchanvinic (70) jabil te chcomic ta yan banamil li judaetique

¹ C'alal xchanibal jabil xa'ox yochel ta ajvalilal ta Judá li Joacim xnich'on Josiase, ja'o yorail ital c'opanatuc yu'un Muc'ul Dios li Jeremiase; ja' i'albat c'usi chc'ot ta pasel ta stojol li judaetique. Le'e ja' sba jabil yochel ta ajvalil te ta Babilonia li Nabucodonosore.

² Li j'alc'op Jeremiase te lic yalbe scotol judaetic xchi'uc jnaclumetic ta Jerusalén c'usi i'albat yu'un li Diose, jech laj yalbe:

³ “Ta yoxlajunebal (13) jabil to'ox yochel ta ajvalilal ta Judá li Josías xnich'on Amone, ja'o no'ox te lic sc'opanun tal li Muc'ul Diose; ja' yoxibal xa xcha'vinic (23) jabil ti chisc'opanun tale. Laj calilanboxuc tal ava'yic li c'usi chale, pero mu xac'an xach'unic.

⁴ Li Muc'ul Diose la staquilanboxuc tal yajtuneltac, ja' li j'alc'opetic yu'une. Mu'yuc ono'ox la xquechan staquilanel tal, pero li vo'oxuque muc xach'unic, me jutuc muc xavich'ic ta muc' li c'usi laj yalique.

⁵ Jech laj yalboxuc: ‘Comtsanic li chopol be atamojique xchi'uc ti chopol c'usi chapasique, yu'un jech xu' te chanaquiic o li' ta avosilalic ti laj yac'boxuc Dios achi'uc li amoltotic ta vo'onee.

⁶ Mu ja'uc xabatic ta stojol li yan diosetique; mu ja'uc xavich'ic ta muc'; mu ja'uc xatunic yu'un. Mu me ta scojuc yu'un ja' chavich'ic ta muc' li c'usi pasbil ta ac'ob atuquic ti chavaq'uic ilinuc li Diose, yu'un jech mu xayac'boxuc avocolic’, xayutoxuc.

⁷ Jech chayalboxuc li Muc'ul Diose: ‘Li vo'oxuque muc xavich'bicun ta muc' li c'usi laj calboxuque; ja' no'ox laj asa'bicun sc'ac'al co'nton ta sventa li c'usi pasbil ta ac'ob atuquique, yu'un jech ac'o ata avocolic’, xi li Muc'ul Diose.

⁸ “Ja' yu'un jech chal li Muc'ul Dios ti tspas ta mantal scotol te ta vinajele: ‘Ta sventa ti muc xavich'ic ta muc' c'usi laj cale,

⁹ a'yo ava'yic, ta jtac tal ta atojolic scotol jaychop cristianoetic te ta norte xchi'uc li cajtunel Nabucodonosor ajvalil ta Babiloniae. Ja' chtal yochentaic li avosilale xchi'uc li jnaclumetic li'i, xchi'uc li yantic lumetic li' ta spat xocone. Ta xcules o ta j'ech'el. Solel ta jyavnaijes o; j'ech'el chcac' o ta labanel, ta na'leel.

¹⁰ Ta jlajesbe o sc'oplal ti xcuxet no'ox yo'ntonic, ti stse'inic no'ox chc'opojique, ti oy boch'o chmalij, ti oy boch'o tsa' yajnilique, xchi'uc ti chbac' smulinoique, xchi'uc ti xojoban no'ox scandilique.

¹¹ Scotol li banamil li'i tsoc o ta j'ech'el; ta xac' xi'elal o. Li muc'tic lum li' ta spat xocone lajuneb xchanvinic jabil (70) ta xtunic yu'un li ajvalil ta Babiloniae.

¹² C'alal me its'aqui li lajuneb xchanvinic jabile (70), ta xlic cac'be stoj smul li ajvalil ta Babiloniae xchi'uc li sjunul yosilale, ja' li yosilal caldeaetique; j'ech'el ta jyavnaijes o’, xi li Muc'ul Diose.

¹³ ‘Ta xcac' c'otuc ta stojolic ta sjunul yosilalic scotol li c'usi caloj ta sventaic ti ts'ibabil ta vune: ja' li c'usi laj yal li j'alc'op Jeremías ta sventa scontrainel jujun banamile.

¹⁴ Ta xcaq'uic ochuc ta sc'ob yan muc'tic lumetic xchi'uc muc'tic ajvaliletic ec, yu'un vu'un ta xcac'be stojic li c'usitic la spasique, ja' ti c'u x'elan yabtelique’, xi li Muc'ul Diose”, xut.

Jun bis noj ta sc'ac'al yo'nton Dios ta sventa scontrainel yantic lumetic

¹⁵ Jech laj yalbun noxtoc li Muc'ul Dios, ja' li Dios yu'un Israele: “Tsaco li bis li' jtsacoj ti noj ta sc'ac'al co'ntone; bat ac'bo yuch'ic scotol li muc'tic lumetic ti bu chajtacot batele.

¹⁶ C'alal me laj yuch'ique, jeche' xtamlajet chcomic; ta xvovijic ta scoj li pleito ta jtacbe tal ta stojolique”, xiyutun.

¹⁷ La jtsac li bis te oy ta sc'ob Muc'ul Diose; bat cac'be yuch'ic li muc'tic lumetic ti bu la stacun batel li Muc'ul Diose.

¹⁸ Ja' bat cac'be yuch'ic li Jerusalene, li lumetic ta Judae xchi'uc li ajvaliletic, li banquilaletic yu'unique. Yu'un jech ac'o yavnaijicuc o; ac'o yich'ic labanel, na'leel, chopolc'optael jech chac c'u cha'al li' ta orae.

¹⁹ Laj cac'be yuch' ec li faraón ajvalil ta Egiptoe, xchi'uc li yaj'abteltaque, xchi'uc li banquilaletic yu'une, xchi'uc scotol li steclumale,

²⁰ xchi'uc li yantic lum te capalique. Laj cac'be yuch'ic noxtoc li ajvaliletic ta yosilal Uz, ajvaliletic ta yosilal filistaetic, ta Ascalón, ta Gaza, ta Ecrón, xchi'uc li boch'o cuxul to icomic ta Asdode,

²¹ xchi'uc ta Edom, ta Moab, xchi'uc smomnich'nabtac Amón,

²² xchi'uc scotol ajvaliletic ta Tiro, ajvaliletic ta Sidón, ajvaliletic ta jot nab Mediterráneo,

²³ ta Dedán, ta Tema, ta Buz, xchi'uc li boch'otic puru juxanbil stsuq'uique.

²⁴ Laj cac'be yuch'ic ec scotol li ajvaliletic ta Arabia, xchi'uc scotol li ajvaliletic yu'unic cristianoetic te nacalic ta xocol banamil ti ep ta chop sts'unubal scapoj sbaique,

²⁵ xchi'uc scotol ajvaliletic ta Zimri, scotol ajvaliletic ta Elam, scotol ajvaliletic ta Media,

²⁶ scotol ajvaliletic ta norte ti ta nom ta noch' yiloj sbaique, xchi'uc scotol li muc'tic ajvaliletic li' ta sba banamile. Ja' slajeb xa chcac'be yuch' li ajvalil ta Babiloniae.

²⁷ Ts'acal jech laj yalbun li Muc'ul Diose: “Jech xavalbe ya'yic: Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: ‘Persa chavuch'ic ec, yacubanic, xenanic, yalanic ta lum; mu'yuc xa chatotsic o ta scoj li milel ta jtac tal ta atojolique’, uto.

²⁸ Me mu sc'an xuch'ic sbel li bis chavac'bee jech xavalbeic: ‘Jech chal li Muc'ul Dios ti tspas ta mantal scotol te ta vinajele: Ta persa chavuch'ic.

²⁹ Yu'un ta xa xlic cac'be stoj smul li lum ti xcuchojbicun jbie. ¿Me vo'oxuc xa chacolic ec? Mu'yuc ono'ox chacolic, yu'un ta jtac tal milel ta espada ta stojol li jnaclumetic ta scotol banamile’, xi li Muc'ul Dios ti tspas ta mantal scotol te ta vinajele.

³⁰ “Vo'ot Jeremías, albo ya'yic scotol li c'usitic li' chacalbote, jech xavalbe ya'yic: ‘Li Muc'ul Diose tsots chc'opoj tal c'alal to ta toyol; tsots chlo'ilaj tal c'alal to ta xch'ul nacleb. Tsots ch-avan tal ta scontrainel li yu'untaque, tsots xc'aq'uet tal jech chac c'u cha'al jpits' ya'lel ts'usubetic. Ta scontrain scotol li jnaclumetic ta banamile.

³¹ Xc'avlajet to yech'al ye chc'ot ta jujujot sti'il banamil, yu'un li Muc'ul Diose ta xchapanbe smul scotol li jujun muc'tic lume. Ja' jchapanvanej yu'un scotol li cristianoetique; ta xac' ta milel ta espada scotol li boch'otic chopol yo'ntonique’, xi li Muc'ul Diose, uto”, xiyutun.

³² Jech chal li Muc'ul Dios ti tspas ta mantal scotol te ta vinajele: “Li tsots vocole xquechcun chc'ot ta pasel ta jujun muc'tic lum, jun muc'ta tsatsal ic'al vo' ta xlic c'alal to ta jujujot sti'il banamil”, xi.

³³ Toj ep boch'o ta xcham yu'un Muc'ul Dios c'alal me la sta sc'ac'alile; buyuc no'ox quilajtic chcomic c'alal ta jujujot sti'il banamil. Mu'yuc boch'o ta xoc'ta, mu'yuc boch'o ta stsob ta smuc; te no'ox tanpuc chcomic ta banamil jech chac c'u cha'al c'a'ep.

³⁴ ¡Jchabichijetic, oc'anic avananic! ¡Banquilal jq'uelchijetic, mochano abaic ta pucuctic! Yu'un laj xa sta yorail ti chavich'ic milel, ti chavich'ic puquel batele, yu'un chavich'ic lilinel vo'oxuc ti ja' jechoxuc jech chac c'u cha'al vaso ti toj c'upil to'ox sbae.

³⁵ Li jchabichijetique mu'yuc bu xu' chjatovic; li jtojobtasej chijetique mu'yuc bu xu' tsnac' sbaic.

³⁶ Tsots ac'o avanicuc li jchabichijetique; tsots ac'o oc'uc li jtojobtasej chijetique, yu'un li Muc'ul Diose ta xules batel li sve'ub chijetic yu'unique.

³⁷ Li stenlejaltic bu oy c'unil jobeltique ta x'ul ta sc'ac'al yo'nton li Muc'ul Diose.

³⁸ Yu'un ja' jech chloc' tal jech chac c'u cha'al jcot león ti chloc' tal ta xch'ene, jech ta syavnaijes scotol li yosilalique, yu'un liquem sc'ac'al yo'nton li Muc'ul Diose; bats'i toj tsots i'ilin li j'ulesvaneje.