Jeremías 24 - Bible in Tzotzil de Chenalhó with Deuterocanon

Senyail c'op sventa lequil higo xchi'uc c'a'emal higo

¹ C'alal chucbil xa'ox batel ta Babilonia yu'un ajvalil Nabucodonosor li Jeconías ajvalil ta Judá xnich'on Joaquime, xchi'uc li banquilaletic te ta Judae, xchi'uc li boch'otic oy lec sbijilic ta abtele xchi'uc li jtentaq'uinetique, li Muc'ul Diose laj yac'bun quil chib moch higo, te ac'bil ta stuq'uil ti'ch'ulna yu'un Muc'ul Dios.

² Li jun moche puru lequil higo te oy, mero sba sat ti ta ba'yuc chyijube; yan li jun moche bats'i chopolic, mu stac' lo'el o.

³ Li Muc'ul Diose jech laj yalbun: “¿C'usi chavil, Jeremías?”, xiyutun. Jech la jtac'be: “Higoetic, bats'i lequic ta jyalel; pero oy toj chopolic ta jyalel; solel mu stac' lo'el o”, xcut.

⁴ Jech laj yalbun noxtoc li Muc'ul Diose:

⁵ “Jech chcal vu'un li Muc'ul Diosun, vu'un li Diosun yu'un Israele: Li judaetic ti chucbil iloq'uic batel cu'un li' ta banamil ti i'ic'atic batel ta yosilal caldeaetique, ja' jech chquilic jech chac c'u cha'al li higo toj ven lequique. Mu'yuc chopol chquilic.

⁶ Te oy jsat ta stojolic; ta xquiq'uic sutel tal li' ta banamil. Ta jcha'va'anic lec, mu'yuc ta jinesic o; ta jts'unic lec, mu'yuc xa ta jbulic o loq'uel.

⁷ Ta jelbe yo'ntonic, yu'un jech chlic c'otuc ta yo'ntonic ti vu'un Muc'ul Diosune. Ja' jteclumal chc'otic o, jech vu'un Diosun yu'unic ta xc'ot ec, yu'un ta sutic tal ta jtojol ta scotol yo'ntonic.

⁸ “Yan li Sedequías ajvalil ta Judá, xchi'uc li banquilaletic, xchi'uc li yantic israeletic ti li' chcomic ta avosilalique xchi'uc li boch'otic chbat naquiicuc ta Egiptoe, ja' jech chquilic jech chac c'u cha'al li chopol higo ti solel mu stac' lo'ele.

⁹ Ta xcaq'uic ta labanel, ta xcac' ti chopol ch-ilatic yu'un scotol li muc'tiquil lum li' ta banamile; ja' sq'uelubil chc'otic ta scotol banamil bu ta jpuquic batel ti chopol sc'oplalique, ti bajbilique, ti contrainbilique.

¹⁰ Xchi'uc ta jtacbe tal ta stojolic milel, vi'nal, xchi'uc chamel, ja' to me itu'p scotolic li' ta banamil ti bu cac'ojbeic xchi'uc li smoltotic ta vo'onee”, xi li Muc'ul Diose.