Jeremías 23 - Bible in Tzotzil de Chenalhó with Deuterocanon

Sc'oplal c'usi ta to xc'ot ta pasel

¹ “¡Ay, toj abul sbaic li jchabichijetic ti laj yulesic, ti la spuc sbaic batel yu'unic li jchijtac te ta sve'ubique!”, xi li Muc'ul Diose.

² Ja' yu'un li Muc'ul Diose, ja' li Dios yu'un Israele, jech chal ta sventa li jchabichijetic ti ja' chchabibeic steclumale: “Vo'oxuc laj apuquic batel li jchijtaque; vo'oxuc laj asibtasic batel, yu'un muc xachabiic lec. Ja' yu'un ta xcac'boxuc atoj amulic ta scoj ti chopol avabtelique. Jech chcal vu'un li Muc'ul Diosune.

³ Vu'un jtuc ta jtsob sutel tal scomelal jchijtac te ta yantic banamil ti bu laj caq'uic batele, yu'un ta xcac' suticuc tal ti bu ono'ox nacalique; te chlic ch'iicuc, te chlic bolicuc.

⁴ Ta jva'anbe jchabivanejetic yu'unic, yu'un ac'o chabiaticuc, jech mu'yuc xa xi'el cha'yic, xchi'uc jech mu xa xch'ayic junuc”, xi li Muc'ul Diose.

⁵ Li Muc'ul Diose jech chal: “Ta to sta sc'ac'alil ta xcac' loc'uc jun sq'uelum David ti lec tuc' yo'ntone; ja' ta xlic ochuc ta ajvalilal. Ta sventa sbijil ta xlic spas mantal; lec tuc' ta xlic chapanvanuc li' ta banamil.

⁶ C'alal ja'o tiq'uil ta pasmantale, li Judae lec jun yo'nton; li Israele mu'yuc c'usi chal yo'nton. Ja' jech sbi chc'ot yu'unic: ‘Li Muc'ul Diose ja' tuq'uil jchapanvanej cu'untic’, xi sbi chc'ot”, xi.

⁷ “Ta to sta sc'ac'alil ti mu'yuc xa jech chavalic ta stojol Diose: ‘Ja' ta sventa Muc'ul Dios iloq'uic tal ta Egipto li israeletique’, ti xachiique.

⁸ Ja' xa jech chavalic: ‘Ja' ta sventa Muc'ul Dios iloq'uesatic tal ta norte banamil xchi'uc ta yantic lumetic ti bu laj yich'ic puquel batel li israeletique’, xachiic. Jech te chlic naquiicuc ta yosilal stuquic”, xi li Muc'ul Diose.

Sc'oplal c'usi chc'ot ta pasel ta stojol j'epalc'op j'alc'opetic

⁹ Toj yan sba co'nton chca'ay ta sventa li j'alc'opetique; ta xnic scotol jbec'tal, xco'laj xchi'uc jyacubelun. Ja' jechun jech chac c'u cha'al li boch'o q'uixnajem xa lec ta pasem ya'lel ts'usube, ja' ta scoj li c'usi chal Muc'ul Diose; ja' ta scoj li xch'ul c'op laj yal ta sventa li j'alc'opetique.

¹⁰ Yu'un li banamile inoj ta jmulavil cristianoetic, ja' ta scoj ti puru mulil batem ta yo'nton li cristianoetique; solel ja' laj yac'beic yipal spasel li c'usi muc tuc'uque. Jech isoc o li banamile; itaquij scotol li ts'i'laltique.

¹¹ “Yu'un c'alal ta j'alc'opetic ta paleetic ibolibic ta jyalel; toj chopol c'usi tspasic te ta ch'ulna cu'un”, xi li Muc'ul Diose.

¹² “Ja' yu'un li sbe xanebique chcom ta ic'al osil xchi'uc ta bilil be; ta xich'ic net'el batel, jech ta xbalch'ujic o, yu'un vu'un ta jtac tal tsots vocol ta stojolic c'alal me la sta sc'ac'alile”, xi li Muc'ul Diose.

¹³ “Li j'alc'opetic ta Samariae laj xa quil ti toj chopol c'usi tspasique, ta sventa Baal chalic li c'usi chc'ot ta pasele, jech laj yaq'uic ch'ayuc o ta be li jteclumale.

¹⁴ Li j'alc'opetic ta Jerusalene chquil noxtoc ti toj ven chopol c'usitic tspasique; yu'un ta xmulivajic, puru epalc'op tspasic, yo'to tstsatsubtasbeic yo'nton li boch'o chopolique, yu'un jech mu me scomtsanic li smulique. Ja' xa jech chquilic scotolic c'alal ta jnaclumetic jech chac c'u cha'al lum Sodoma xchi'uc lum Gomorra.

¹⁵ Ja' yu'un, vu'un li Muc'ul Diosun, ti ta jpas ta mantal scotol te ta vinajele, jech chcal ta sventa li j'alc'opetique: Ta xcac'be slo'ic ch'ail vomol, xchi'uc ta xcac'be yuch'ic vo' oy svenenoal, yu'un ja' ta sventa j'alc'opetic ta Jerusalén ipuc batel c'usitic chopol ta scotol li yosilalique”, xi li Muc'ul Diose.

¹⁶ Jech chal noxtoc li Muc'ul Dios ti tspas ta mantal scotol te ta vinajele: “Israeletic, mu me xach'unic c'usi chal li j'alc'opetique, yu'un puru epalc'op li c'usitic chalique. Te no'ox tsnop tal ta yo'nton stuquic; muc vu'cun jech ta xcalbeic.

¹⁷ Yu'un jech chalbeic li boch'o mu xich'ic ta muc' c'usi chcale: ‘Jech chal li Muc'ul Diose: Junuc la avo'ntonic’, xutic. Li boch'otic ja' no'ox tspas c'usi tsc'an yo'ntonique, jech chalbeic: ‘Mu'yuc c'usi chopol chc'ot ta pasel ta atojolic’, xutic”, xi li Muc'ul Diose.

¹⁸ ¿Pero me oy boch'o sna'oj c'usi oy ta yo'nton li Muc'ul Diose? ¿Me oy boch'o laj yil, laj ya'ay c'usi chal? ¿Boch'o smala-mala ya'ay chc'opoj li Muc'ul Diose?

¹⁹ Li sc'ac'al yo'nton Muc'ul Diose ja' jech chac c'u cha'al tsatsal ic'al vo'; ja' jech chac c'u cha'al sutub ic', te sututet chc'ot ta stojolic li boch'o chopolique.

²⁰ Muc teuc no'ox ch-ech' li sc'ac'al yo'nton Muc'ul Diose, ja' to ti me ic'ot ta pasel yu'un scotol li c'usi snopoj tspase. Ta to sta sc'ac'alil chava'ibeic smelol scotol li c'usi snopoje.

Sc'oplal c'usi laj yal Dios ta sventa jlo'lavanej j'alc'opetic

²¹ “Li j'alc'opetic le'e muc tacbilicuc tal cu'un, pero italic ono'ox; mu'yuc jc'opanojic, pero oy ono'ox c'usi laj yalic.

²² Ti sna'icuc c'usi oy ta co'ntone, ja' laj yalbeic ya'ay jteclumal ti jechuque. Laj xa yiq'uic sutel tal ta chopol be, laj xa yac'beic scomtsan c'usi chopol tspasic ti jechuque.

²³ “¿Me ja' no'ox Diosun ta sventa li c'usi nopole? ¿Me muc Diosucun ta sventa li c'usi nom noxtoque?”, xi li Muc'ul Diose.

²⁴ “¿Me oy boch'o xu' tsnac' sba ta snac'ubbail ti jech mu xquil bu oye? ¿Me mu teuc oyun ta scotol vinajel xchi'uc ta scotol li banamile?”, xi li Muc'ul Diose.

²⁵ “Li vu'une ca'yoj scotol yepalc'opic li j'alc'opetic le'e. Chalic ti vu'un ta jventa c'alal chalic c'usi chc'ot ta pasele. Jech chalic: ‘Ja' jech laj quil ta jvayech, ja' jech li'ac'bat quil’, xiic.

²⁶ ¿Baq'uin to chlaj sc'oplal ta yo'ntonic ti puru epalc'op, ti puru lo'lavanej no'ox li c'usi chalique?

²⁷ Mu snopic ti laj xa yaq'uic ch'aycun o ta yo'nton jteclumal ta scoj ti ja' xa tslo'iltabe sbaic li xvayechic laj yalbeique. Jech lich'ay xa ta yo'ntonic jech chac c'u cha'al li smoltotic ta vo'one ti ja' bat yich'ic ta muc' li Baale.

²⁸ Me oy jun j'alc'op ti chvaychine, ac'o yal ti tojol vaychil no'oxe. Me ja' laj ya'ay li c'usi chcale, ja' no'ox ac'o yal li c'usi laj cal ta melele. ¿Me co'ol oy stu li bec' trigo xchi'uc li ste'ele?

²⁹ Li jc'ope ja' jech chac c'u cha'al c'oc', xchi'uc ja' jech chac c'u cha'al maro ti ta slilin li tone.

³⁰ “Ja' yu'un, chcal ta jamal ti contra chquil li j'alc'opetic ti ja' no'ox chchanbe c'usi chal xchi'ilic, ti chalic jech caloje.

³¹ Vu'un ta jcontrain noxtoc li boch'otic chalic ti vu'un xa calojbeic scuyojic li c'usi tsnop ta yo'nton stuquique.

³² Vu'un ta jcontrain noxtoc li boch'otic sbol vayechic no'ox chaq'uic ta ch'unel, ti jech ta sventa yepalc'opic, ta sventa slo'ilic chaq'uic ch'ayuc ta be li jteclumale. Yu'un muc tacbilicuc cu'un, muc jpasojicuc ta mantal; ja' yu'un mu'yuc stu c'usi tspasic te ta stojol li jteclumale”, xi li Muc'ul Diose.

³³ “Jeremías, me oy jech chasjac'bot achi'iltac, o me j'alc'op, o me palee: ‘¿C'usi laj yal, c'usi icatsil laj yac'bot li Muc'ul Diose?’, me xayutoxuque, jech xavalbeic: ‘Li c'usi laj yal, li c'usi laj yac'bun jna' li Muc'ul Diose, ja' ti vo'oxuc icatsiloxuc cha'ye, ja' yu'un laj yal ti chasjipoxuc comele’, uto.

³⁴ “Me oy to jun j'alc'op, o me jun pale, o me jun achi'ilic ta xal li jbel c'op ‘icatsil yu'un Muc'ul Dios’ xie, ta xcac'be stoj smul sjunulic ta na.

³⁵ Ja' no'ox jech ac'o sjac'be sbaic li achi'ilique, li avuts' avalalique: ‘¿C'usi laj yal, c'usi laj yac' ta na'el li Muc'ul Diose?’, ac'o xiicuc no'ox.

³⁶ Mu me xtal ta ajolic ta anil no'ox ti jech chavalique: ‘Ja' icatsil cha'ay Muc'ul Dios’, ti xie, yu'un me jech chavalique, ta me xjoybij ta avac'olic li ac'opique, yu'un chavixtanbicun c'usi laj cal vu'un li cuxul Diosun ti ta jpas ta mantal scotol te ta vinajele, vu'un li Diosun avu'unique.

³⁷ “Jeremías, jech xajac'be yan velta li j'alc'opetique: ‘¿C'usi laj yal, c'usi laj yac' ana' li Muc'ul Diose?’, uto.

³⁸ Pero me jech chayalbot, ‘Icatsil cha'ay li Muc'ul Diose’, me xayutote, jech xatac'be: ‘Ta sventa ti ja' chavalic li c'usi laj cal mu xu' chavalique,

³⁹ jech ta jipoxuc loq'uel ta jtojol xchi'uc li lum li'i, ja' ti laj cac'boxuc achi'uquic li amoltotic ta vo'onee.

⁴⁰ J'ech'el chajbic'tajesoxuc o, chacac'oxuc o ta q'uexlal’, uto”, xi li Muc'ul Diose.