Jeremías 22 - Bible in Tzotzil de Chenalhó with Deuterocanon

Sc'oplal c'usi chc'ot ta pasel ta stojol ajvalil ta Judá

¹ Jech laj yalbun li Muc'ul Diose: “Batan ta spasubmantal li ajvalil ta Judae; albo ya'ay li c'usi chacalbote.

² Jech xavalbe: ‘Vo'ot ajvalil ta Judá, ti li' chotolot ta spasubmantal li Davide, xchi'uc li j'abteletic avu'une, xchi'uc scotol cristianoetic ti ch-ochic tal li' ta ti'coraltone, a'yo ava'yic c'usi chal li Muc'ul Diose.

³ Jech ta xal: Lec me tuc' xachapanvanic li' ta avosilalique; tuc' c'usitic xapasic. Coltaic loq'uel ta sc'ob j'uts'intavanejetic li boch'otic uts'intabilique. Mu me xalo'laic; mu xavelc'anbeic c'usi oy yu'un li yanlumetique, li me'on ololetique, xchi'uc li me'on antsetique. Mu me xamalbeic xch'ich'al li boch'otic mu'yuc smulique.

⁴ Me chach'unic li c'usi chacalboxuque, jech staoj yav oy ajvaliletic avu'unic li' chchotiic ta xchotleb li Davide; cajal ta careta xchi'uc cajal ta ca' ch-ochic batel li' ta pasubmantal xchi'uc li j'abteletic yu'unique xchi'uc li yantic achi'iltaquique.

⁵ Pero me mu xach'unic li c'usi chacalboxuc li'i, jamal ta xcal ti chich' jinesel o li spasubmantal ajvalil li'i, xi li Muc'ul Diose’, uto”, xiyutun.

⁶ Yu'un li Muc'ul Diose jech chal ta sventa li spasubmantal ajvalil ta Judae: “Li vo'ote, ja' jechot chquil jech chac c'u cha'al vits ta Galaad, jech chac c'u cha'al jol vits ta Líbano. Pero chcal ta jamal ti chavich' yavnaijesele; mu'yuc boch'o te nacal chcom o.

⁷ Ta jchapan lec boch'o chtal yulesot, lec chapal chtalic xchi'uc yabtejebic; ta sts'etic li lequil ch'ut te'etic avu'une, ta xchiq'uic ta c'oc'.

⁸ “Ep cristianoetic ta xjelovic li' ta lum, jech ta xalbe sbaic: ‘¿C'u yu'un jech la spasbe Muc'ul Dios li jun muc'ta lum li'i?’, xiic.

⁹ Jech ta stac'be sbaic: ‘Yu'un la scomtsanic li Muc'ul Dios yu'unique; ja' bat yich'ic ta muc' li yantic diosetique, ja' itunic yu'un’, xiic”, xi li Muc'ul Diose.

Li Jeremiase oy c'usi laj yal ta sventa Salum, ja' li Joacaz yan sbie

^10-11 Mu me xavoc'ta li ajvalil Josiase; mu me xavat avo'ntonic ti c'alal ta xchame. Ja' oc'tabeic li xnich'one, ja' li Salume, yu'un j'ech'el ibat o, mu'yuc xa ta sut tal; mu'yuc xa chtal sq'uel yan velta ti bu ivoq'ue. Yu'un li Muc'ul Diose jech yaloj ta sventa li Salum xnich'on Josiase, ja' li ajvalil ta Judae, ja' ti i'och ta xq'uexol stote, ti iloc' batel li' ta banamile: “Mu'yuc xa c'usi ora ta sut o tal;

¹² te ta xcham o ta yan banamil ti bu chucbil ibate; mu'yuc xa chtal sq'uel yan velta li banamil li'i”, xi.

Sc'oplal Joacim

¹³ “¡Ay, toj abul aba ti ta scoj toj chopol c'usi laj apas, ta scoj muc tuc'uc c'usi laj apas chava'an xa o lec apasubmantale, xchi'uc ti chapas xa o lec muc'tic naetique, xchi'uc ti jeche' no'ox chavac' abtejicuc li viniquetique; ti mu'yuc chatojbe li yabtelique!

¹⁴ Yu'un jech chaval: ‘Ta jpas junuc jmuc'ta pasubmantal; lec muc'tic yut ta jpas ta toyol’, xachi. Chavac'be lec sventanail; chapix lec ta ch'ut te'etic, xchi'uc lec tsoj xavac'be sbon.

¹⁵ ¿Me chanop ti ja' toj lec muc'ta ajvalilot, ti lec xa pixbil ta ch'ut te'etic anae? Li atote ¿me muc xve', me mu xuch' lec vo' ec ti c'alal li' cuxule? Li stuque lec tuc' la spas yabtel; lec c'usitic la spas, jech lec ibat.

¹⁶ Lec la xchapan li boch'o uts'intabilique; lec la scolta li me'onetique, jech lec ibat yu'un. ¿Me mu ja'uc jech tspas li boch'o xiyotquinune?”, xi li Muc'ul Diose.

¹⁷ “Pero li vo'ote ja' no'ox batem ta avo'nton ti chatsob ep ac'ulejal ta sventa lo'lavaneje, ti chamalbe xch'ich'al li boch'o mu'yuc smulique, ti chavuts'inta, ti chalo'labe c'usi oy yu'un achi'iltaque”, xi li Muc'ul Diose.

¹⁸ Li Muc'ul Diose jech chal ta sventa li Joaquim xnich'on Josías, ajvalil ta Judae: “Me jutuc mu'yuc boch'o ta xoc'ta ti c'alal chchame. Mu'yuc boch'o ta xat yo'nton; mu'yuc boch'o jech ta xal: ‘¡Ay, quits'in! ¡Ay, quixlal! ¡Ay, cajval! ¡Ay, muc'ta ajvalil!’, mu'yuc boch'o xi.

¹⁹ Ja' jech chich' muquel jech chac c'u cha'al jcot buro; ta xjochic loq'uel, te chbat yaq'uic ta pat coralton yu'un Jerusalén”, xi li Muc'ul Diose.

Chich' c'opanel lum Jerusalén

²⁰ “Muyan ta vits Líbano, te xa'avan. Tsots xa'avan batel ta vitsetic ta Basán. Avanan batel ta buyuc no'ox, yu'un li boch'o lec ac'anojan aba achi'uque laj xa yich'ic tsalel.

²¹ Laj ono'ox jc'opanot ti c'alal lec to'ox ibat avu'un scotole, pero muc xava'ibun li jc'ope. Ja' jechot o tal ta aqueremal, mu xac'an xach'un o li c'usi chcale.

²² Li ajvaliletic avu'une ta xcuchatic batel ta ic'; li boch'otic lec ac'anojane chucbil ta xbatic. Jech ec li vo'ote chava'ay tsots q'uexlal; toj biq'uit chacom ta scoj li yepal amule.

²³ Li' ta orae jun avo'nton laj apas atas ta ch'ut te'etic liquem tal ta Líbano. Pero c'alal chtal avocole, ta to xa'ajquinaj jech chac c'u cha'al jun ants ti yorail xa chcuxe”, xi li Muc'ul Diose.

Li Diose oy c'usi laj yal ta sventa li ajvalil Jeconiase

²⁴ Li Muc'ul Diose jech chalbe li Jeconías xnich'on Joacim, ajvalil ta Judae: “Vu'un ti cuxulune, ac'o me ja' jechot jech chac c'u cha'al yixtolal jbats'ic'ob ti ja' sventa jselloe, pero ta jipot loq'uel.

²⁵ Chacac'ot ta sc'ob li boch'o tsc'an ono'ox chasmilicote xchi'uc ta sc'ob li boch'o toj ep ono'ox chaxi' yu'une, ja' li Nabucodonosor ajvalil ta Babiloniae xchi'uc li caldeaetique.

²⁶ Chajipot batel achi'uc ame' ta yan banamil ti mu ja'uc te lavoq'ue, te chachamic o”, xut.

²⁷ Jech mu'yuc xa ta sutic tal li' ta banamil ti bu chac to suticuc tal ya'yique.

Tsots ic'opoj li j'alc'op Jeremiase

²⁸ ¿Me ja' jech ic'ot li Jeconías jech chac c'u cha'al bin ti voq'uem, ti mu'yuc xa stue, ti ja' jech chac c'u cha'al jun sets' ti mu'yuc xa boch'o tstuc'ulane? ¿C'u yu'un ti j'ech'el ijipatic o batel xchi'uc yalab xnich'nab ta yan banamil ti mu xotquinique?

²⁹ Banamil, banamil, banamil, a'yo ava'ay c'usi chal li Muc'ul Diose.

³⁰ Jech chal li Muc'ul Diose: “Tsacbeic ta vun sbi li vinic li'i, jech chac c'u cha'al jun vinic ti mu'yuc xnich'one, ti mu'yuc c'usi lec tsta o ti jayib c'ac'al cuxule. Yu'un me junuc smomnich'on mu'yuc ta xchoti o ta xchotleb li ajvalil Davide; mu'yuc bu chlic spas ta mantal li Judaetique”, xi li Muc'ul Diose.