Jeremías 21 - Bible in Tzotzil de Chenalhó with Deuterocanon

Laj yich' albel sc'oplal ti chich' jinesel li Jerusalene

^1-2 Li ajvalil Sedequiase la stac batel ta stojol Jeremías li Pasur xnich'on Malquías xchi'uc pale Sofonías xnich'on Maasiase, yu'un jech ac'o bat yalbeic: “Avocoluc jac'o ta stojol Muc'ul Dios c'usi chc'ot ta pasel ta jtojolcutic, yu'un li Nabucodonosor ajvalil ta Babiloniae chistsacuncutic xa ta pleito. Xca'itic-ca'tic me tsc'an chac' ta ilel sq'uelubil svu'el stsatsal ta jtojolcutic li Muc'ul Diose, yu'un jech ac'o loq'uicuc batel li' ta jtojolcutic li cajcontracutique”, xutic c'otel. Li Jeremiase ital c'opanatuc yu'un li Muc'ul Diose.

³ Ja' yu'un jech laj yalbe li boch'otic tacbilic batele: “Jech xavalbeic ya'ay li ajvalil Sedequiase:

⁴ Jech yaloj li Muc'ul Diose, ja' li Dios yu'un Israele: ‘Li avajsoldado ti tstsaquic ta pleito li ajvalil ta Babiloniae xchi'uc li caldeaetic te setuojoxuc ta pat coraltone, ta xcac' suticuc ta spatic, te ta jtsob ta yut lum scotol.

⁵ Vu'un jtuc ta jtsacoxuc ta pleito ta jvu'el, jtsatsal, ta tsots sc'ac'al co'nton.

⁶ Ta jmilan scotol li jnaclumetic li' ta lume, c'alal ta cristianoetic, ta ats'unub avovolic ta xlajic ta tsatsal chamel.

⁷ Ts'acal ta xcaq'uic ta sc'ob Nabucodonosor xchi'uc ta sc'ob yantic yajcontraic li ajvalil Sedequías ta Judae xchi'uc li xchi'iltac ta abtele xchi'uc li boch'otic chcolic to ta chamel, ta milel, xchi'uc ta vi'nale. Te ta xmilatic o ta espada. Me jutuc mu'yuc xa ta xcoltaatic, mu'yuc abul sba ch-ilatic; me jutuc mu'yuc xa c'uxubinel. Jech chcal vu'un li Muc'ul Diosune.

⁸ ‘Jech xavalbe ya'yic noxtoc li jteclumale: Jech chal li Muc'ul Diose: Vu'un ta xcac' at'ujic me ja' chac'anic li sbelal cuxlejale, o me ja' chac'anic li sbelal lajele.

⁹ Li boch'o li' no'ox chcomic ta lume ta xlajic ta milel, ta vi'nal, o me ta chamel. Yan li boch'o ta xloc' batel, chbat yac' sbaic ta sc'ob li caldeaetic te setuojoxuque mu'yuc ta xcham, ja' chcuch to yu'un.

¹⁰ Yu'un jnopoj xa o ti chcac'be tal svocol li lum li'i; mu'yuc lec c'usi chtal ta stojol. Yu'un ta ono'ox x'och ta sc'ob li ajvalil ta Babiloniae; ta xchic' ta c'oc'’, xi li Muc'ul Diose.

Sc'oplal c'usi chc'ot ta pasel ta stojol ajvalil ta Judá

¹¹ ‘Smomnich'nab ajvalil ta Judá: A'yo ava'yic c'usi chal li Muc'ul Diose:

¹² Smomnich'nab ajvalil David, ja' jech chayalboxuc li Muc'ul Diose: Oc'ome liquesic me spasel li c'usitic tuq'ue; coltaic loq'uel ta sc'ob j'uts'intavanejetic li boch'o uts'intabilique. Mu me ta scojuc toj chopol avabtelic ti tstsan jech chac c'u cha'al c'oc' li sc'ac'al co'ntone, ti mu'yuc xa boch'o xu' tstu'p oe.

I'albat ti chich' tsots vocol li Jerusalene

¹³ Jnaclumetic ta stenlejaltic, jnaclumetic ta ch'entic te ta soplejaltic, vu'un chajcontrainoxuc, vu'un li Muc'ul Diosune. Vo'oxuc ti jech chavalique: ¿Boch'o xu' yu'un chtal scontrainutic? ¿Boch'o xu' yu'un ch-och ta jnac'ubbailtic?, xachiic.

¹⁴ Vu'un ta xcac' atoj amulic ta sventa ti c'u x'elan avabtelique; ta jchic' ta c'oc' li toyolal te'tic avu'unique, yu'un ac'o c'ac'uc scotol li c'usitic te oy ta spat xocone. Jech chcal vu'un li Muc'ul Diosune’, xi li Diose”, xut.