Jeremías 20 - Bible in Tzotzil de Chenalhó with Deuterocanon

Li Jeremiase laj yal c'usi chc'ot ta pasel ta stojol li Pasure, ja' li yajcontrae

¹ Li pale Pasur xnich'on Imere, ja' li banquilal yu'unic te ta ch'ulna yu'un Muc'ul Diose, laj ya'ay ti laj yal Jeremías li c'usitic chc'ot ta pasele.

² Jech laj yal mantal ti ac'o yich' majel li Jeremiase, xchi'uc ti ac'o yich' xojbel ta lats'ubte' yacan ti te oy ta muc'ta ti'na Benjamín xc'ot ta ch'ulnae.

³ Li Pasure ta yoc'omal la sloq'uesbe ta lats'ubte' yacan li Jeremiase. Li Jeremiase jech laj yalbe: “Mu xa ja'uc Pasur abi chc'ot yu'un li Muc'ul Diose; ja' xa Magor-misabib abi chc'ot.

⁴ Yu'un jech yaloj li Muc'ul Diose: ‘Ta xcac' ti te chlic asibtas aba atuque xchi'uc ta xi'ic avu'un scotol li boch'o lec xac'opan aba achi'uque. Le'e te ta asat ta xlajic ta milel yu'un li avajcontraique. Jech noxtoc, scotol li jnaclumetic ta Judae ta xcac' ta sc'ob li ajvalil ta Babiloniae, jech chucbil chbatic ta Babilonia banamil, o me chich'ic milel comel.

⁵ Jech noxtoc, li sc'ulejal lum li'i, xchi'uc scotol li c'usitic oy yu'une, xchi'uc li c'usitic ven toyolic stojole ta xcac' ta sc'ob li avajcontraique. Li sc'ulejal ajvaliletic ta Judae ta xcac' ta sc'ob li avajcontraique; ta spojic, ta xich'ic batel scotol ta Babilonia.

⁶ Jech ec li vo'ote Pasur, chavich'ic chuquel batel ta Babilonia ajunulic ta na. Te chachamic o; te chavich'ic muquel achi'uc li boch'otic lec xac'opan aba achi'uc ti laj avalbe ya'yic c'usi chc'ot ta pasel ti mu meleluque’, xi li Muc'ul Diose”, xut.

Ep i'oc' ta stojol Dios li Jeremiase

⁷ Muc'ul Dios, ja' no'ox laj alo'laun, jech laj cac' jba ta lo'lael ec. Toj ech'em avu'el, jech laj atsalun. Scotol c'ac'al na'lebilun, tse'intabilun avu'un.

⁸ C'alal chic'opoje, ja' no'ox chcal ti chtal uts'intaele; c'alal chi'avane, ja' no'ox chcal ti chtal milele. Ja' yu'un ti c'alal chcal ac'ope, ja' no'ox sventa chquich' labanel xchi'uc contrainel.

⁹ Me jech chcale: “Mu'yuc xa chic'opoj ta sventa li Muc'ul Diose; ta jip ta co'nton o”, me xichie, li ac'ope chlic tsanuc ta co'nton jech chac c'u cha'al c'oc'; ta xc'ac'ub c'alal ta jbaquiltac. Ta jc'an ta jpajes jba ta yalel li ac'ope, pero mu xu' cu'un.

¹⁰ Yu'un chca'ay ti puru mucul lo'il tspasique: “Puru xi'el xa no'ox ya'yel”, xiic. Jech chalic noxtoc: “La'ic, la jtic'betic smul”, xiic. Li boch'otic co'ol co'nton jchi'uque jech chalic ec: “Oyuc c'uxi lajuc ta lo'laele, jech xu' ta jtsaltic, jech xu' ta jpacbetic”, xiic.

¹¹ Pero vo'ote, Muc'ul Dios, li' oyot ta jtojol jech chac c'u cha'al jun muc'ta vinic ti mu stac' tsalele. Ja' yu'un li boch'o chisnutsicune te chyalic ta lum, jech mu xu' yu'un chistsalicun, j'ech'el chyalic o ta q'uexlal; mu'yuc boch'o chch'ay ta yo'nton o.

¹² Vo'ot li Muc'ul Diosot ti chapas ta mantal scotol te ta vinajele, xavotquinbe c'u x'elan yo'nton li boch'otic tuc' yo'ntonique, xchi'uc ana'oj c'usi oy ta yut yo'nton li cristianoetique; ac'bun quil c'u x'elan chapacbe li cajcontrae, yu'un vo'ot no'ox cac'oj aventain li jvocole.

¹³ ¡Q'uejintaic li Muc'ul Diose, albeic slequilal! Yu'un ja' xu' yu'un tscolta loq'uel ta sc'ob chopol cristianoetic li boch'otic abul sbaique.

¹⁴ Toj chopol li jun c'ac'al ti c'alal livoq'ue; mu'yuc c'usi stu o li jun c'ac'al c'alal la svoq'uesun jme'e.

¹⁵ Toj chopol li vinic ti ay yac'be xcuxetel yo'nton li jtote, ti jech laj yalbee: “Toj lec ti ivoc' avunin quereme; toj xcuxet no'ox co'ntontic”, ti xute.

¹⁶ Li vinique ac'o jech c'otuc ta stojol jech chac c'u cha'al lumetic ti j'ech'el ta xules li Muc'ul Diose. Ac'o vinajuc yavanel ta sob; ac'o vinajuc yoq'uel ta o'lol c'ac'al, ti yu'un xa chich' milele.

¹⁷ Teuc ono'ox laj yac' chamcun ta yut xch'ut jme' li Diose, ti chamcun ono'oxe, ja' jmuquinal ic'ot li jme'e, jech muc xquil ta jsat livoc', li'ayin ti jechuque.

¹⁸ ¿C'u yu'un livoc' me ja' no'ox tal ca'ay at-o'nton xchi'uc vocole, me ta puru q'uexlal no'ox chlaj li coraile?