Jeremías 2 - Bible in Tzotzil de Chenalhó with Deuterocanon

Li israeletique muc tuc'uc yo'ntonic ta stojol li Muc'ul Diose

¹ Ital sc'opanun noxtoc li Muc'ul Diose, jech laj yalbun:

² “Batan, bat c'opano li lum Jerusalene; tsots xac'opan yu'un jech ac'o ya'ay lec, jech xavalbe: ‘Jech chayalbot li Muc'ul Diose: Ta to jna' c'u x'elan ti c'alal tsebot to'oxe, lec to'ox tuc' avo'nton ta jtojol. C'alal laj to'ox quic'ote, lec to'ox ac'anojun; te xana'pnun batel cu'un ta xocol banamil yo' bu mu'yuc c'usi xch'ie, xayutot’, uto.

³ Li Israele voc'bil to'ox cu'un; ja' to'ox jech c'otem cu'un jech chac c'u cha'al li sba sat c'usi chloq'ue. Scotol li boch'o la soquese la sta smulic, jech laj cac'be tsots svocolic”, xiyutun li Muc'ul Diose.

⁴ Smomnich'nab Jacob, vo'oxuc li jaychopoxuc ta scotol sts'unubal Israele, a'yo ava'yic c'usi chal li Muc'ul Diose.

⁵ Jech chayalboxuc: “¿C'usi chopol la stabicun li amoltotaquic ta vo'one ti inamajic loq'uel ta jtojol, ti ja' ibatic ta stojol li yan diosetic ti mu'yuc stue, ti ja' jech mu'yuc stu ic'ot o xchi'uquique?

⁶ Mu'yuc la sna'icun jutuc, mu'yuc jech laj yalic: ‘¿Bu oy li Muc'ul Dios ti la sloq'uesutic tal ta Egiptoe, ti laj yic'utic tal ta xocol banamil yo' bu mu'yuc c'usi x'ayin tee, ti mu'yuc boch'o naquiem, ti toj taq'uin, ti mu'yuc boch'o xu' chcuxi, xchi'uc ti mu boch'o sc'an xjelov ta xanubal tee?’, mu'yuc bu xiic.

⁷ Vu'un laj quic'oxuc tal li' ta yaxal banamil, yu'un ac'o ave'ic li c'usitic chloq'ue, li c'usitic toj lequic chac' sate; pero vo'oxuc tal asoquesic li cosile, laj abolibtasic o li jbanamile.

⁸ Li paleetique la xch'ayicun o ta yo'ntonic; li jchanubtasvanejetic sventa jmantale mu xa sna'icun; li banquilaletique solel la stoy sbaic o ta jtojol. Li j'alc'opetique ja' xa ic'otic ta j'alc'op yu'un li Baale, yu'un ja' te ibatic o ta stojol li diosetic ti mu'yuc stue.

Ta xich' taq'uiel Israel

⁹ “Ja' yu'un, vu'un jtuc ta xtal cac'boxuc ava'yic; ta xtal jtsacoxuc achi'uc anich'nabic xchi'uc amomnich'nabic, vu'un li Muc'ul Diosune.

¹⁰ Batanic ta Quitim ja' li banamil cacal ta nabe, bat q'uelo tal avilic; taquic batel boch'o chbat sq'uel tal lec noxtoc li lum Cedare, ac'o bat sq'uel tal lec yil me oy jech tspasic jech chac c'u cha'al chapasique.

¹¹ Li yantic lumetique ¿me oy ta sjelta sdiosic? Ta melel muc ja'uc bats'i Dios. Pero vo'oxuc li cu'untacoxuque, laj xa acomtsanicun vu'un ti alequilalic c'otemune; ja' xa laj adiosinic li c'usi mu'yuc stue.

¹² “¡Vinajel, xi'an me ta sventa le'e! ¡Nican me ta stsatsal yipal li xi'ele! Vu'un jtuc Muc'ul Diosun, jech chcal.

¹³ Yu'un li jteclumale oy chib ti bu la sta smulic ta jtojole: la scomtsanicun, vu'un li bats'i nio'un yu'unique, xchi'uc la smeltsanic yavil vo' yu'un stuquic. Pero chaq'uem, solel mu sts'ani o ya'lel.

Ta xich'beic stojol stoyobbailic li israeletique

¹⁴ Li israeletique mu ja'uc mozoetic; muc teuc ivoq'uic ta sna mozo. ¿C'u yu'un ti chtal yich'ic chuquel batele?

¹⁵ ¿C'u yu'un ti chtal yich'ic tsaquel jech chac c'u cha'al tstsacvan leone ti xlaquet no'ox sc'oplalique? Solel mu'yuc smelol icom ta ixtanel li yosilalique, xchi'uc stanil icom ta c'oc' li slumalique, solel mu'yuc yajval icom o.

¹⁶ Li cristianoetic ta Menfis xchi'uc ta Tafnese la xjuxboxuc ajolic.

¹⁷ ¿Me mu jechuc lapasbatic ti c'alal laj acomtsanicun? vu'un li Muc'ul Diosun avu'unique, vu'un ti la jtojobtasoxuc tal ta bee.

¹⁸ Pero tanae ¿c'usi chataic o ti chabatic ta Egiptoe? ¿Me yu'un ja' chbat avuch'beic ya'lel li uc'um Niloe? ¿C'usi chataic o ti chabatic ta Asiriae? ¿Me yu'un ja' chbat avuch'beic ya'lel li uc'um Eufratese?

¹⁹ Achopolilic no'ox chayac'boxuc atoj amulic; atoyobbailic no'ox chayac'oxuc ta vocol. Nopic me lec, q'uelo lec avilic ti toj chopol, ti acomtsanojicun vu'un li Muc'ul Diosun avu'unique, ti muc xavich'icun ta muq'ue. Jech chcal jtuc vu'un li Muc'ul Diosune, vu'un li Diosun ti ta jpas ta mantal scotol te ta vinajele.

Ep la stoy sbaic ta stojol Dios li israeletique

²⁰ “Ep xa c'ac'al laj atuch' loq'uel avaq'uil; laj apas aba ta mantal atuc, jech laj aval: ‘Mu jc'an xitun avu'un’, xachi. Jech te labat ta scotol toyol vitsetic, ta yolon muc'tic te'etic; xco'laj xchi'uc jmulavil ants lac'ot ta sventa li c'usi laj apase.

²¹ Vu'une la jts'unot jech chac c'u cha'al jpets lequil ts'usub, vo'ot sts'unubalot lequil ts'usub cu'un. Pero ¿c'u yu'un laj ac'atajes aba ta sts'unubal chopol ts'usub?

²² Ac'o me chapoc aba lec ta jaychopuc xavon, ac'o me chajux aba lec ta ton, pero ic' chaquilot o ta scoj li amule. Jech chcal jtuc vu'un li Muc'ul Diosune, vu'un li Avajvalicune.

²³ Mu xu' jech chaval: ‘Mu'yuc jmul; mu'yuc chquich' ta muc' li baaletique’, mu xu' xachi. Q'uelo lec avil c'u x'elan atalel te ta stenlejaltique; tuc'ulano lec avil li c'usi apasoje. Ja' jechot jech chac c'u cha'al me' ca' ti buyuc no'ox xojet sjol ta anil c'alal chbaq'ue.

²⁴ Ja' jechot jech chac c'u cha'al te'tical me' buro ti nopen xa'ay oy ta te'tique, ti xjuch'et no'ox sni' ta anil c'alal chbaq'ue. C'alal ja'o liquem sbaq'uele, mu'yuc boch'o xu' tspajes; mu persauc to chich' sa'el yu'un li tot buroe, yu'un stuc chbat yac' sba.

²⁵ Jech laj calbot: ‘Israel, mu me xyayij avacan ti jeche' xbixbun avacan ta anile; mu me teuc no'ox avabinoj ti chtaquij sbe aviq'ue’, xacutot. Pero jech laj aval: ‘Mu'yuc xa jpoxil chca'ay; ta sventa ja' jc'anoj o li c'usi mu xcotquine, ja' chbat jchi'inic o’, xachi.

Li Israele ja' smoton li stojol mulile

²⁶ “Jech chac c'u cha'al chyal ta q'uexlal jun j'elec' me ivinaje, ja' jech chyalic ta q'uexlal ec li smomnich'nab Israele; chyalic ta q'uexlal li ajvaliletic, li banquilaletic, li paleetic, xchi'uc li j'alc'opetic yu'unique.

²⁷ Yu'un jech chalbeic li jpets te'e: ‘Vo'ot jtotot’, xutic. Jech chalbeic li tone: ‘Vo'ot jme'ot’, xutic. Yan li vu'une spatic xa no'ox yac'ojbicun; mu ja'uc yac'ojbicun li satique. Pero c'alal oyic ta tsots vocole, jech chiyalbicun: ‘La' coltauncutic’, xiyuticun.

²⁸ Judá, ¿bu oy li diosetic avu'un apasoje? Ja' ac'o sva'an sbaic tal avu'un, jq'ueltiquic me xu' yu'unic chascoltaot ti c'alal yorail chavich' tsots avocole; yu'un ja' to jech yepal jech chac c'u cha'al lumetic avu'un li adiostaque.

²⁹ ¿C'u yu'un ti toj tsots chapas abaic ta jtojole? yu'un vo'oxuc mero jbajmantaloxuc, xichi vu'un li Muc'ul Diosune.

³⁰ Altic no'ox laj cac'be nucul li anich'nabique, yu'un muc xtuq'uibic o, muc xlecubic o. Vo'oxuc laj amilic ta espada j'alc'opetic avu'unic jech chac c'u cha'al chmilvan li leonetique.

³¹ Vo'oxuc ti cuxuloxuc li' ta orae, a'yo ava'yic c'usi chcal, vu'un li Muc'ul Diosune. ¿Me yu'un ja' jechun jech chac c'u cha'al xocol banamil? ¿Me ja' jechun jech chac c'u cha'al ic'al osil chavilic? Jteclumal, ¿c'u yu'un ti jech chavalique: ‘Mu'yuc boch'o sventauncutic, mu'yuc xa chisutcutic o tal ta atojol?’, ti xachiique.

³² ¿Me oy chch'ay ta yo'nton sc'ac'ubtasel lec sba ta sventa chich' c'upinel li tsebe? ¿Me oy chch'ay ta yo'nton smeltsanel lec sba c'alal yorail chnupin li tsebe? Pero li jteclumale ep xa c'ac'al la xch'ayicun o ta yo'ntonic.

³³ “Toj lec xa chameltsan aba ta sventa ti chac'an oy boch'o chasc'upinote. Vo'ot me' jchanubtasvanejot yu'un li chopol antsetique.

³⁴ Yatinoj ac'u' xch'ich'alic li me'onetic xchi'uc li boch'o mu'yuc smulique, ac'o me mu'yuc i'och ta elec' ta ana.

³⁵ Ac'o me ja' jech apasoj pero jech chaval: ‘Mu'yuc jmul, ja' yu'un li Diose mu'yuc xa ch-ilin ta jtojol’, xachi. Lec oy, yu'un chaval ti mu'yuc amule, ta jchapanot quic me ta melel mu'yuc amule.

³⁶ ¿C'u yu'un ti asujoj no'ox aba ti naca xajelilan no'ox boch'o chascoltaote? Jech chac c'u cha'al layal ta q'uexlal yu'un li Asiriae, ja' jech chayal ta q'uexlal yu'un noxtoc li Egiptoe.

³⁷ Solel abul aba ta q'uexlal ti c'alal chasut tale, yu'un laj xa jip comel li boch'otic apatoj avo'nton yu'une, jech mu'yuc c'usi lec chata o yu'unic”, xi li Diose.