Jeremías 19 - Bible in Tzotzil de Chenalhó with Deuterocanon

Senyail laj yal Dios ta sventa voc'bil q'uib

¹ Li Muc'ul Diose jech laj yalbun: “Bat mano jbejuc biq'uit q'uib; ic'o batel achi'in jayibuc banquilaletic ta lum xchi'uc banquilal paleetic.

² Loc'an batel, batan te ta stenlejal Ben-hinom ta stuq'uil ti'coralton sventa xch'ayubil li c'usitic chvoq'ue; ja' te xlic aval li c'usi chacalbote.

³ Jech xavalbe: ‘Ajvaliletic ta Judá, jnaclumetic ta Jerusalén, a'yo ava'yic c'usi chal li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: Ta jtac tal tsots vocol li' ta banamile; scotol li boch'o cha'yic c'usi tsots chc'ot ta pasele, tojtoj maquel chc'ot xchiquinic.

⁴ Yu'un li israeletique solel la syanijesic li banamil li'i. Li' la xchic'beic pom li yantic diosetic ti mu xotquinique, xchi'uc ti mu ono'ox xotquinic ec li smoltot syame'ique. Jech noxtoc li ajvaliletic ta Judae la snojesic ta xch'ich'al li boch'otic mu'yuc smulique.

⁵ La spasic toyol scajleb matanaletic ta sventa sdiosic Baal; ja' te la xchic'beic smotonin li xnich'nabique. Ja' la spasic li c'usi mu jechuc calojbeic ti muc ta jmantaluc jech la spasique, me jutuc mu'yuc jnopoj me oy jech tspasic.

⁶ Ja' yu'un ta to sta yorail ti mu'yuc xa jech chich' albel Tofet, o me Ben-hinom li banamil li'i. Ja' Stenlejal Milubbailtic xi xa sbi chc'ot.

⁷ Li' ta banamil ta jlilinbe c'usitic snopojic li Judá xchi'uc Jerusalene. Ta xcac' lajicuc ta milel yu'un li yajcontraique; ta xcac' ochicuc ta sc'ob li boch'o ta xcontrainatic yu'une. Li sbec'talique ta xcac'be sti' xulemetic xchi'uc jti'val chonbolometic.

⁸ Li lum li'i ta xcac' ta yavnaijesel xchi'uc ta labanel. Scotol li boch'o te ta xjelovique toj ch'ayel chc'ot yo'ntonic; ta slabanic ti solel vuq'uem scotol chilique.

⁹ Ta to xcac' sti'ic li squerem stsebique, xchi'uc ta to sti'ic li boch'o lec sc'opan sba xchi'uquique. Ja' ta scoj ti chich'ic tsots vocole, ti te setubilic yu'un li yajcontraique’, uto, xi li Muc'ul Diose.

¹⁰ “Li q'uibe ja'o xavoc' te ta stojolic li boch'otic te achi'uque.

¹¹ Jech xavalbe ya'yic: ‘Ja' jech chal li Muc'ul Dios ti tspas ta mantal scotol te ta vinajele: Li cristianoetic li' ta lume ja' jech ta jvoq'uic ta j'ech'el ec jech chac c'u cha'al me oy boch'o tsvoc' jbej q'uib ti mu xa stac' cha'meltsanel oe. Te chbat yich'ic muquel ta Tofet, yu'un mu'yuc xa xocol banamil bu xu' chich'ic muquel.

¹² Ja' jech ta jpasbe li banamil li'i xchi'uc li jnaclumetic yu'une. Li lume ja' jech ta jcomtsan jech chac c'u cha'al Tofet. Jech chcal vu'un li Muc'ul Diosune.

¹³ Li naetic ta Jerusalén xchi'uc li spasubmantal ajvaliletic ta Judae, xchi'uc li yamaq'uil sjol snaic ti bu la xchiq'uic pom ta sventa li c'usi xojobanic ta vinajele, xchi'uc ti bu la smalic pasem ya'lel ts'usub sventa smoton yan diosetique solel boliben chcom o jech chac c'u cha'al li banamil ta Tofete’, uto”, xiyutun li Muc'ul Diose.

¹⁴ Li Jeremiase iloc' batel ta Tofet yo' bu itacat batel yu'un Muc'ul Dios sventa chal li c'usi chc'ot ta pasele. Te c'ot sva'an sba ta yamaq'uil ch'ulna yu'un Muc'ul Dios, jech lic yalbe li cristianoetique:

¹⁵ “Li Muc'ul Dios ti tspas ta mantal scotol te ta vinajele, ja' li Dios yu'un Israele, jech ta xal: ‘Ta jtacbe tal tsots vocol li lum li'i xchi'uc li yantic lumetic li' ta spat xocone jech chac c'u cha'al jnopoj ono'oxe, yu'un solel stsatsubtasoj o yo'ntonic, mu sc'an xch'unic o li c'usi chcale’, xi li Muc'ul Diose”, xut.