Jeremías 18 - Bible in Tzotzil de Chenalhó with Deuterocanon

Senyail laj yac' ta ilel Dios ta stojol jpatbin

¹ Li Muc'ul Diose ital sc'opanun noxtoc, jech laj yalbun:

² “Lican, batan te ta sna li jpatbine, yu'un oy c'usi te chacalbot”, xiyutun.

³ Jech libat ta sna li jpatbine; te sbats'il spatel bin c'ot jta.

⁴ Li bin sbats'il spatele ivuc' ta sc'ob. Pero lic xcha'pat yan velta, ja' to ti c'alal imeltsaj lec yu'un jech chac c'u cha'al tsc'ane.

⁵ Ja'o te ital sc'opanun li Muc'ul Diose, jech laj yalbun:

⁶ “¿Me mu xu' cu'un jech ta jpasboxuc vo'oxuc li smomnich'naboxuc Israel jech chac c'u cha'al tspas li jpatbine? Li vo'oxuque ja' jechoxuc ta jc'ob ec jech chac c'u cha'al li ach'el oy ta sc'ob jpatbine, xi.

⁷ Ta jliquel no'ox xu' ta jbul loq'uel, ta jip loq'uel, o me ta xcules li jun muc'ta lum xchi'uc li ajvalil te tspas mantale.

⁸ Pero me ta sutes yo'nton yu'un smulique, mu'yuc ta xcac'be tal li c'usi chopol jnopoj chcac'bee.

⁹ Jech noxtoc ta ora no'ox xu' ta jva'an lec, ta jnacan lec li jun ta lum cristianoetic xchi'uc ajvalil yu'unique.

¹⁰ Pero me ta xlic spasic c'usi chopol ta jtojol, me mu sc'an xa'yic li c'usi chcale, ja' jech mu'yuc ta xcac'beic ec li c'usi lec jnopoj ta xcac'beique.

¹¹ “Albo ya'yic li cristianoetic ta Judá xchi'uc li jnaclumetic ta Jerusalene, jech xavalbe: ‘Jech chal li Muc'ul Diose: A'yo ava'yic, oy c'usi chopol jnopoj ta jpas ta atojolic, jnopoj ti chacac'boxuc avocolique. Ja' yu'un comtsanic xa li chopol be atamojique, tuq'uibtasic li c'usi chapasique, lecubtasic li avabtelique’, uto.

¹² Pero jech chastac'boxuc: ‘Altic tal avac' avocol, yu'un oy ta co'ntoncutic ta jpascutic o li c'usi jnopoj jujununcutique, ta jpascutic o batel li c'usi chopol tsc'an co'ntoncutique’, xayutoxuc”, xiyutun li Diose.

¹³ Ja' yu'un jech chal li Muc'ul Diose: “Jaq'uic a'yej ava'yic ta yantic lum me oy jech ya'yojic chac le'e: Li lum Israele toj ven chopol li c'usi tspase.

¹⁴ ¿Me oy bu chavilic ch-ul o ta j'ech'el li tayo te ta toyol vitstic ta Libanoe? ¿Me oy chavilic ch-ul li muc'ul uc'um ti chlic tal ta vitstique?

¹⁵ Pero li jteclumale i'ul xa o xch'unojel yo'ntonic ta jtojol, ja' bat xchiq'uic pom ta stojol li diosetic ti mu'yuc stue; solel ch'ayemic o ta be. Ja' stamojic o batel li poco' be ta vo'onee; ja' li chucul be ti mu'yuc boch'o xotquine.

¹⁶ Ja' jech la soquesic o li yosilalique; puru labanel chich' o scotol c'ac'al. Li boch'o te ta xjelovique toj ch'ayel chc'ot yo'ntonic, tsjimulan no'ox sjolic.

¹⁷ Li vu'une ja' jechun jech chac c'u cha'al muc'ta ic' chtal ta sloq'ueb c'ac'al. Ta jpuc batel li israeletique; ta xcac' jatovicuc batel ta stojol li yajcontraique. Ta jvalu'patinic o comel, mu'yuc ta xcac'be yilic jsat ti c'alal yorail oy svocolique”, xi li Muc'ul Diose.

Ichapanbat sc'oplal li Jeremiase

¹⁸ Jech lic yalic li cristianoetique: “La'ic, la' jchapantic c'usi chcut ta jmiltic li Jeremiase, yu'un ta smantal Diose mu'yuc chal me oy ta xlaj sc'oplal ti oy paleetic chixchanubtasutique; mu'yuc ono'ox chlaj sc'oplal ti oy boch'o bijic sventa chisbijubtasutique, xchi'uc mu'yuc ono'ox chlaj sc'oplal ti oy j'alc'opetic chiyalbutic c'usi chal Diose. La', jnopbetic smul li Jeremiase; jyayijestic ta sventa jc'optic. Mu jtuc'ulanbetic li c'usi chale”, xiic.

La sc'opan Dios li Jeremiase

¹⁹ Muc'ul Dios, a'ibun li c'usi chcale. A'yo ava'ay c'usi chalic ta jtojol li cajcontrataque.

²⁰ ¿Me ja' stojol jvocol yu'unic ti lec c'usi jpasoj ti chopol c'usi chispasbicune? yu'un joc'bil xa jch'enal yu'unic. Na'o me ava'ay ti c'alal la jva'an jba ta atojole, lec c'usi la jc'anbot ta sventaic; la jc'anbot ti ac'o xa lajuc sc'ac'al avo'nton ta stojolique.

²¹ Ja' yu'un ac'o chamicuc ta vi'nal; ac'o lajicuc ta milel li yalab xnich'nabique. Li yajnilique ac'o comicuc ta me'nal; ac'o mu'yucuc yol chcomic. Li viniquetic yu'unique ac'o chamicuc; li queremetic yu'unique ac'o milaticuc ta espada.

²² Ac'o vinajuc ti x'avlajetic no'ox te ta snaic ti c'alal chatacbe tal ta anil soldadoetic ta stojolique, yu'un sjoc'ojbicun xa jch'enal, xchi'uc yac'oj xa xch'ojonic sventa chisyaquicun.

²³ Pero li vo'ote, Muc'ul Dios, ana'oj scotol c'u x'elan chapal yu'unic ti chismilicune. Mu me teuc no'ox xats'icbe li c'usi chopol tspasique; mu me xch'ay ta avo'nton li smulique. Ac'o yalicuc ta lum ta atojol; ac'bo xcuchic sc'ac'al avo'nton ti c'alal sta yorail cha'iline.