Jeremías 17 - Bible in Tzotzil de Chenalhó with Deuterocanon

Li Judae te ts'ibabil o ta yo'nton li mulile

¹ “Judá, li amule te ts'ibabil ta avo'nton; joch'bil lec ta pech'pech' ni' taq'uin, joch'bil lec ta sni' diamante ton. Ts'ibabil noxtoc ta xulubtac scajleb matanaletic avu'un.

² Jech te tsna'ilanic o avu'unic ec li anich'nabtaquic c'u x'elan li scajleb matanaletic apasojic ta sventa li dios Asera, te ta yolon te'etic, xchi'uc ta vitsetic,

³ xchi'uc ta tseltseltic ti bu oy li vits cu'une. Scotol li ac'ulejale ta xcac' batuc ta pojel ta scoj amul, ta scoj li toyol c'opojebaletic avu'un ta vitsetic ta scotol avosilale.

⁴ Ta xcac' acomtsan li banamil cac'ojbote, yu'un ja' chbat tunan yu'un avajcontra te ta yan banamil ti mu xavotquine, yu'un laj avac' tsanuc sc'ac'al co'nton jech chac c'u cha'al c'oc' ti mu xtu'p oe”, xi li Muc'ul Diose.

⁵ Jech chal noxtoc li Muc'ul Diose: “Ac'o bat stoj li boch'o tsvoc' sba loq'uel ta jtojol, ti ja' no'ox tspat yo'nton yu'un cristianoe, ti ja' te batem yo'nton tsc'an coltael yu'une.

⁶ Ja' jech chac c'u cha'al jpets ch'ix chch'i ta xocol banamil ti mu'yuc ventainbile, ti ta tontic, ta yi'tic no'ox ch'iem, ti mu'yuc boch'o te nacale.

⁷ “Yan li boch'o ja' no'ox chch'un ti chcoltaat yu'un Muc'ul Diose, ti ja' no'ox ta spat yo'nton yu'une, toj jun no'ox yo'nton, toj lec chbat o.

⁸ Ja' jech chac c'u cha'al jpets te' ts'unbil ta ti' uc'um, ti lec chac' batel yisim ta yut vo'e. C'alal ta xc'uxub tal c'ac'ale, mu'yuc c'u cha'al sba cha'ay, lec yox o li yanale. C'alal ta xlic q'uepelaltique, mu'yuc ta slusib, mu'yuc ta xpaj ta satinel.

⁹ “Li o'ntonale toj chopol, ja' no'ox ven jlo'lavanej ta scotol. ¿Me oy boch'o xa'ibe smelol le'e?

¹⁰ Vu'un li Muc'ul Diosune, xcotquin c'u x'elan yut yo'nton, jna'oj c'usi tsnop li cristianoe, yu'un jech ta xcac'be stojolic jujun li c'usi tspasique xchi'uc ti c'u x'elan yabtelique”, xi.

¹¹ Li boch'o muc ta lecuc c'u x'elan staoj sc'ulejale, ja' jech chac c'u cha'al x'ub ti muc stonuc stuc ta sluts'e. Ta o'lol xch'iel no'ox ta xlaj li sc'ulejale. Ta ts'acale, bol vinic no'ox chcom.

¹² Li ch'ulnae ja' xchotleb ajvalil c'otem, toj jun yutsil, yu'un toj ven lec ono'ox sc'oplal ta sliqueb.

¹³ ¡Muc'ul Dios, vo'ot smuc'ulot yo'nton Israel! Scotol li boch'o ta scomtsanicote ta xyalic ta q'uexlal. Li boch'otic ta svoc' sbaic ta atojole ta lumtic no'ox chich' ts'ibabel sbiic, yu'un la scomtsanic li lequil nio' ti mu x'ul oe.

La sc'an coltael ta stojol Dios li Jeremiase

¹⁴ Muc'ul Dios, poxtaun, jech ta xcol li jchamele; coltaun, jech colem chicom, yu'un vo'ot no'ox quich'ojot ta muc'.

¹⁵ Jech chiyalbicun li cristianoetique: “¿Bu oy li c'usi yaloj Muc'ul Diose? ¡Ac'o c'otuc ta pasel ta ora!”, xiic.

¹⁶ Mu'yuc jech jc'anojbot me xu' chavac'be stoj smulic; mu'yuc la jc'an ti ac'o sta tsots svocolique. Xana' lec ti mu'yuc jech co'ntone; li c'usi loq'uem ta quee, te oy ta atojol.

¹⁷ Mu me xac'ot jech chac c'u cha'al jsibtasvanej ta jtojol, yu'un vo'ot jpojubbailot ti c'alal oy jvocole.

¹⁸ Ja' q'uexlaltaso li boch'otic chiscontrainune; mu me vu'cun xaq'uexlaltasun. Mu me vu'cun xixi', ja' ac'o xi'icuc. Ja' xavac'be tsots svocolic; ac'o lajicuc o ta muc'ta vocolajel.

Sc'oplal sc'ac'alil chcux yo'ntonic

¹⁹ Jech laj yalbun li Muc'ul Diose: “Batan, bat va'an aba te ta yochebal lum yu'un li achi'iltaque, ja' ti bu sloq'uebic yochebic li ajvaliletic ta Judae. Jech xapas noxtoc ta scotol yochebaltac li lum Jerusalene.

²⁰ Jech xavalbe ya'yic: ‘Ajvaliletic ta Judá xchi'uc acotolic jnaclumetic ta Jerusalén ti cha'ochic batel li' ta ti'coraltone, a'yo ava'yic c'usi chal li Muc'ul Diose.

²¹ Jech ta xal: Q'uelo me abaic, mu me xa'icatsinic ta sc'ac'alil chacux avo'ntonique; mu me xacuchic ochel avicatsic li' ta ti'coraltonetic ta Jerusalene.

²² Mu me xacuch loq'uel avicatsic te ta anaic ti c'alal sc'ac'alil chacux avo'ntonique; mu me xapasic jchopuc abtel. Ich'ic ta muc' li sc'ac'alil chacux avo'ntonic, jech chac c'u cha'al laj ono'ox calbeic li amoltot ayame'ic ta vo'onee.

²³ Pero li stuquique muc xch'unbicun, muc xchiquintaic; la stsatsubtas yo'ntonic, jech muc stuc'ulanic, muc sc'anic taq'uiel.

²⁴ ‘Ja' yu'un jech chacalboxuc: Me chach'unbicun c'usi chcale, me mu xacuch ochel avicatsic ta ti'coraltonetic li' ta Jerusalén ta sc'ac'alil chacux avo'ntonique, me chavoc'bicun o li sc'ac'alil chacux avo'ntonique, xchi'uc me mu'yuc chapasic jchopuc abtele,

²⁵ oy ajvaliletic o avu'unic ti chchotiic ta xchotleb li Davide. Cajajtic ta careta xchi'uc ta ca' li' xloc' x'ochic o ta sti' li coraltonetic yu'un Jerusalene; chi'inbilic yu'un banquilaletic xchi'uc jnaclumetic li' ta Judá xchi'uc ta Jerusalén. Jech oy yajval o li Jerusalene.

²⁶ Li' ta xlic talicuc li achi'iltaquic ta scotol lumetic ta Judá ti te oyic ta spat xocon Jerusalene, xchi'uc ta yosilal Benjamín, ta stenlejaltic, ta toyolaltic, xchi'uc ta Negueve. Ta xtal yaq'uic chic'bil matanal, milbil matanal te ta ch'ulna cu'un. Xchi'uc ta xich'ic tal yantic matanal ti co'oltic sba c'u cha'al trigoe, xchi'uc pom, xchi'uc yan matanal sventa chistojbicun ta vocol.

²⁷ Pero me mu xach'unic ti tsc'an chavoc'bicun o li sc'ac'alil chacux avo'ntonique, ti tsc'an mu xacuchic ochel avicatsic ta sti' li coraltonetic ta Jerusalene, ta jtsanbe sc'ac'al li ti'coraltonetique xchi'uc scotol li naetic ta Jerusalene, me jutuc mu xtu'p o’, uto”, xi li Muc'ul Diose.