Jeremías 16 - Bible in Tzotzil de Chenalhó with Deuterocanon

I'albat mantal yu'un Dios li Jeremiase

¹ Li Muc'ul Diose ital sc'opanun jech laj yalbun:

² “Mu me xasa' avajnil, mu me xvoc' aquerem atseb li' ta avosilalique.

³ Vu'un li Muc'ul Diosune jech chcal ta sventa li bic'tal querem tsebetic chvoc' li' ta avosilalique, xchi'uc ta sventa li totil me'iletic ch-alaj chnich'najique.

⁴ Ta xchamic ta xc'uxul tsatsal chamel, ta milel, xchi'uc ta vi'nal. Mu'yuc boch'o chc'uxubaj yo'nton ta stojolic; mu'yuc boch'o tsmuc chpixic. Te no'ox busul chc'a'ic ta banamil jech chac c'u cha'al stso' chonbolometic. Li sbec'talique chtal ti'baticuc ta xulemetic xchi'uc ta chonbolometic ta te'tic”, xiyutun.

⁵ Jech laj yalbun noxtoc li Muc'ul Diose: “Mu me xabat ta jbejuc na ti bu ta xat yo'ntonic ta x'oq'uique; mu me xbat apatbe yo'ntonic, yu'un li lum le'e laj xa jpojbe li jun yo'ntonique xchi'uc li c'anel, li c'uxubinel cac'ojbeique.

⁶ C'alal ta biq'uit ta muc' ta xchamic te ta avosilalic; mu'yuc boch'o chtal smuquic, mu'yuc boch'o ta x'oc'taatic yu'un, mu'yuc boch'o ta sboj sbec'talic, xchi'uc mu'yuc boch'o ta xjux stsotsil sjol ta sventaic.

⁷ Jech noxtoc mu'yuc boch'o ta xac' lec ve'el ta sventa tspatbe yo'ntonic li boch'otic oy boch'o chcham yu'unique, xchi'uc mu'yuc boch'o chac' uch'bajel ta stojolic li boch'otic chcham stot sme'ique.

⁸ “Jech noxtoc mu me x'och ve'an te ta na yo' bu chaq'uic lec ve'ele, mu me co'oluc chotol xave' achi'uc.

⁹ Vu'un li Muc'ul Diosun ti ta jpas ta mantal scotol te ta vinajele, xchi'uc vu'un li Diosun yu'un Israele, jech chcal: Ta xcac' lajuc sc'oplal li' ta avosilalic li q'ueojetic sventa q'uine, sventa xcuxetel o'ntonale, xchi'uc ta sventa q'uin nupinele; ta to xavil ta asatic jech chc'ot ta pasel ti c'alal cuxuloxuc toe.

¹⁰ “C'alal chavalbe ya'yic li achi'iltaquique, jech chlic sjaq'uic: ‘¿C'u yu'un laj yac' mantal Muc'ul Dios ti chtal muc'ta vocol jech chac le'e? ¿C'usi chopol la jpastic? ¿C'usi jmul jtaojtic ta stojol li Muc'ul Dios cu'untique?’, xiic.

¹¹ Jech xavalbe: ‘Jech chal li Muc'ul Diose: Ja' ta scoj ti la scomtsanicun li amoltot ayame'ique. Ja' bat yich'ic ta muc' li yantic diosetique, ja' itunic yu'un; la squejan sbaic ta stojol. Vu'un la scomtsanicun; muc xich'ic ta muc' li mantaletic cu'une.

¹² Pero li vo'oxuque toj ech'em no'ox chopol c'usi laj apasic jech chac c'u cha'al li atot ame'ique. Yu'un ja' bat apasic c'usi tsc'an avo'nton atuquic jujunoxuc; ja' muc xach'unic li c'usi laj cale.

¹³ Ja' yu'un li vu'une ta jpucoxuc batel ta yan banamil ti bu mu'yuc ono'ox avilojique, xchi'uc ti mu'yuc ono'ox yilojic ec li amoltot ayame'ique. Te chatunic ta c'ac'al ta ac'ubal yu'un li yantic diosetique, jech mu'yuc ta jc'uxubinoxuc o’, uto”, xi li Muc'ul Diose.

¹⁴ Jech laj yalbun noxtoc li Muc'ul Diose: “Ta to xlaj sc'oplal ti jech chavalique: ‘Ja' ta sventa stsatsal Muc'ul Dios iloq'uic tal ta Egipto banamil li jmoltot jyame'tique’, ti xachiique.

¹⁵ Ja' xa no'ox jech chavalic: ‘Ja' ta sventa stsatsal Muc'ul Dios iloq'uic tal ta norte banamil ta yantic banamil yo' bu laj to'ox yich'ic puquel batel li smomnich'nab Israele’, xachiic. Yu'un ta to xquiq'uic sutel ta yosilalic ti bu cac'ojbeic ono'ox li amoltot ayame'ic ta vo'onee.

¹⁶ “A'yo ava'yic, ta jtac tal ep jtsacchoyetic sventa chastsacoxuc, xchi'uc ta jtac tal ep jnuts-ti'boletic sventa chasnutsoxuc te ta vitsetic, ta tseltseltic, xchi'uc ta japjap ch'entic.

¹⁷ Yu'un quiloj scotol li c'usitic chapasique; mu'yuc c'usi macal ta jsat, mu xu' chanac' amulic ta jtojol.

¹⁸ Chib velta lec ta xcac'boxuc atoj li amulique xchi'uc li c'usi chopol apasojique, yu'un laj abolibtasic cosil ta sventa yan diosetic ti mu cuxuluque, ti toj chopolique; jech inoj cosil ta sventa li c'usitic toj chopol chquile”, xi li Muc'ul Diose.

Li Jeremiase la sc'anbe vocol li Muc'ul Diose

¹⁹ Muc'ul Dios, vo'ot jtsatsalot, vo'ot jchabivanejot cu'un; vo'ot jnac'ubbailot ti c'alal oy c'usi toj xi'bal sbae. Ta xtalic ta atojol scotol li yantic cristianoetic ta jujujot sti'il banamile, jech chayalboxuc: “Ta melel epalc'op no'ox c'usi la xch'unic li jmoltotaccutique; li diosetique altic no'ox, mu'yuc c'usi stu o.

²⁰ ¿Me yu'un xu' ta spas sdios stuc li cristianoe? ¡Xu' yu'un ta spas, pero li diosetic ta spase puru lo'lael no'ox!”, xi chlic yalic.

²¹ Jech itac'ov li Muc'ul Diose: “Ja' yu'un ta jbel sc'oplal ta jchanubtasic, ta xcac'be yilic li jvu'el jtsatsale, jech chlic sna'ic ti ta melel vu'un Muc'ul Dios jbie”, xi.