Jeremías 15 - Bible in Tzotzil de Chenalhó with Deuterocanon

I'albatic ti chtal svocolique

¹ Jech laj yalbun noxtoc li Muc'ul Diose: “Ac'o me ja' chtal sva'an sbaic ta jtojol li Moisés xchi'uc Samuele, mu'yuc ono'ox ta xlecub co'nton ta stojol li achi'iltac li'i. Ac'o loq'uicuc o ta jtojol, ac'o baticuc o.

² Me jech chavich' jac'bele: ¿Bu chibatcutic u?, me xayutoxuque, jech xavalbe: jech chal li Muc'ul Diose: ‘Li boch'o sc'oplal chcham ta chamele, chcham o ta chamel; li boch'o sc'oplal chcham ta espadae, chcham o ta espada; li boch'o sc'oplal chcham ta vi'nale, chcham o ta vi'nal; li boch'o sc'oplal chucbil chbat ta yan banamile, jech chucbil chbat o’, uto.

³ “Vu'un li Muc'ul Diosune, ta jtacbeic tal chanchop vocoletic: ta xlajic ta milel ta espada, ta xlajic ta ti'el ta ts'i'etic, ta xlajic ta ti'el ta xulemetic, xchi'uc ta xlajic ta ti'el ta jti'val chonbolometic.

⁴ Scotol li ajvaliletic ta banamile ta xcac' xi'icuc ta scoj smul, ta scoj c'usi la spas te ta Jerusalén li Manasese, ja' li ajvalil ta Judá xnich'on Ezequiase.

⁵ “¿Me yu'un oy to boch'o chaxc'uxubinot, Jerusalén? ¿Me yu'un oy to boch'o chat yo'nton avu'un? ¿Me yu'un oy to boch'o tsjac' c'u yu'un ti mu xa junuc avo'ntone?

⁶ Li Muc'ul Diose jech chal: Vo'ot laj acomtsanun, laj ava'lupatinun comel. Ja' yu'un li' ta orae ta jye' jc'ob ta aba, ta xcac'bot tsots avocol, yu'un i'ech' xa co'nton avu'un.

⁷ Ja' yu'un li jnaclumetique ta jvij batel jech chac c'u cha'al solil trigo, ta jloq'ues o batel ta scotol lumetic ta avosilal; mu'yuc yalab xnich'nab ta jcomtsanic, ta xcules o ta j'ech'el, yu'un mu sc'an scomtsanic li chopol be stamojique.

⁸ Ta xcac' epajuc me'on antsetic avu'un jech chac c'u cha'al yi' ta ti'nab. Ta o'lol c'ac'al ta jtacbe tal jmilvanej ta stojolic li me'iletique xchi'uc li yalabique. Ta anil no'ox ta jtac tal tsots at-o'nton xchi'uc xi'el te ta lum.

⁹ Li me'iletic ti oy vucub yolique, ta xlic alubicuc, ta x'ayin ep svocolic. Ta xlic yalicuc o ta q'uexlal, ta na'leel. Li sac osil to'ox chilique, ta xc'ataj ta ac'ubal. Me oy to boch'o chcom yu'unique, ta xcac' lajicuc ta milel yu'un yajcontraic”, xi li Muc'ul Diose.

Tsots i'avan ta scoj vocol li j'alc'op Jeremiase

¹⁰ ¡Toj abul jba yaya, yu'un ja' no'ox lavoq'uesun ta sventa liquesej c'op, xchi'uc ta sventa ta jcontrain scotol li cristianoetic ta banamile! Mu'yuc bu jq'uexoj taq'uin, xchi'uc mu'yuc cac'oj ta q'uexel jtaq'uin, pero scotol cristianoetic chixchopolc'optaicun.

¹¹ Muc'ul Dios, me mu'yuc c'usi lec jpasoj ta atojole, me mu'yuc la jc'anbot vocol ta atojol c'alal oy svocolic, c'alal abul sbaic li cajcontrataque, ac'o c'otuc ta pasel li c'usi chopol chalic ta jtojole.

Li Diose laj yal ti chtal svocol li israeletique

¹² “¿Me oy to boch'o xu' yu'un ta sc'as li tsatsal taq'uin, li bronce taq'uin chlic tal ta nortee?

¹³ Israel, ta scotol li ac'ulejal xchi'uc li c'usi oy avu'une, xchi'uc scotol li c'usi oy ta avosilale, ta xcac' ta sc'ob avajcontra ta scoj amul. Me jutuc mu'yuc chavich' tojbel.

¹⁴ Ta jtic'ot ta mozoil yu'un avajcontra te ta banamil ti bu mu xavotquine, yu'un solel tsanem ta jyalel li sc'ac'al co'ntone, jech chaxchic'oxuc”, xi li Diose.

Laj to sc'anbe vocol Dios li j'alc'op Jeremiase

¹⁵ ¡Muc'ul Dios, li vo'ote ana'oj scotol, na'un to me, la' me coltaun. La' pacbun sutel li cajcontrataque! Mu me teuc no'ox xats'icbe li c'usi tspasique, yu'un xu' chismilicun ti me te no'ox ch'an xachie. Xana' ti ja' ta scoj jc'anojot ti chquich' ilbajinele.

¹⁶ C'alal lac'opanune, xco'laj xchi'uc la jve' ya'yel li ac'ope; ja' mero spatubil co'nton, xcuxetel co'nton ic'ot. Avu'unun o, vo'ot li Muc'ul Diosot ti chapas ta mantal scotol te ta vinajele.

¹⁷ Mu'yuc ono'ox la jchi'in li boch'otic batem ta yo'ntonic c'usi lec cha'ay stuquique, ti ja' no'ox tsa'ic c'u x'elan xcuxet yo'ntonique. C'alal laj avic'un ta j'alc'ope, jtuc no'ox oyun o, yu'un laj avac' quilinta li c'usi chopole.

¹⁸ ¿C'u yu'un ti mu x'ech' o li jvocole? ¿C'u yu'un mu sbalin poxtael, mu xcol o li jtuch'emale? Ja' jech laj apas aba ta jtojol jech chac c'u cha'al bevo'tic ti ch-ul ya'lele.

¹⁹ Jech la stac'bun li Muc'ul Diose: “Me chasutes avo'nton ta jtojole, chaquic'ot o sventa li' chatun cu'un. Me chapajes aba ta bic'tal vulvunele, me ja' no'ox chaval li c'usi leque, vu'un ta jventa chac'opoj, vo'ot queot chac'ot. Jech ta sutes yo'ntonic ta atojol li achi'iltaque; muc vo'ocot chabat ta stojolic.

²⁰ Ta jva'anot jech chac c'u cha'al coralton pasbil ta bronce taq'uin ta stojolic li jteclumale, ta stsacoxuc ta pleito pero mu'yuc chastsalicot, yu'un vu'un chajchi'inot, chajchabiot, chajpojot, vu'un li Muc'ul Diosune.

²¹ Ta jpojot loq'uel ta sc'ob li boch'otic chopolique; ta jcoltaot loq'uel ta sc'ob li j'uts'intavanejetique”, xi li Muc'ul Diose.