Jeremías 14 - Bible in Tzotzil de Chenalhó with Deuterocanon

Sc'oplal muc'ta q'uepelal

¹ Li Jeremiase ital c'opanatuc yu'un li Muc'ul Diose, yu'un chtal q'uepelaltic. Jech i'albat:

² “Li Judae chat yo'nton, choc'ta sba; li lumetic yu'une oyic xa ta at-o'nton; li cristianoetique mochajtic xa ta lumtic chat yo'ntonic; li Jerusalene x'avet no'ox ta scoj svocol.

³ Li jc'ulejetique la staquic batel ta lup vo' li smozoique; ibatic ta bic'tal nabetic, pero mu'yuc la staic tal. Toj q'uexlal sba laj ya'yic, toj ven chopol laj ya'yic; solel smacoj xa sjolic sutel tal.

⁴ Solel ijatan xa banamil ta scoj ti mu'yuc chac' o vo'e. Ep svocol cha'yic li jloc banamiletique; xpixojan xa sjolic.

⁵ Li te'tical me' chijetique laj yicta comel yolic ti ja' to ivoc' yu'unique, yu'un mu'yuc xa bu sta sve'elic.

⁶ Li te'tical buroetique ibatic ta vitsetic, ch'an xa xi te cotol chich'ic ic' jech chac c'u cha'al oq'uiletic; ch-ic'ub xa banamil chilic, yu'un mu'yuc xa bu sta sve'elic”, xi li Muc'ul Diose.

Li Jeremiase la sc'anbe vocol Dios ta sventa xchi'iltac

⁷ Muc'ul Dios, ac'o me jmulcutic xa no'ox chac' ta ilel ti ta melel toj chopoluncutique, pero li vo'ote paso avabtel ta sventa ac'o ich'atuc ta muc' li abie, yu'un toj ep xa li jtoyobbailcutic ta atojole; ep jtaoj jmulcutic ta atojol.

⁸ Spatubilot yo'nton Israel, vo'ot li jchabivanejot yu'un ti c'alal oy svocole, ¿c'u yu'un ti xco'laj xchi'uc yanlum apasoj aba li' ta cosilalcutique ti xco'laj no'ox xchi'uc j'ech'el be vinicot chapas aba, jech chac c'u cha'al li boch'o ja' no'ox ta xch'aman na chvaye?

⁹ ¿C'u yu'un ti ja' jechot jech chac c'u cha'al jun vinic mu c'usi xu' yu'une, xchi'uc jech chac c'u cha'al jun soldado ti mu xu' yu'un ta xcoltavane? Ta melel li' oyot ta jtojolcutic, Muc'ul Dios; vu'un ta jventacutic ti chich' alilanel li abie, ja' yu'un, mu me xacomtsanuncutic.

¹⁰ Li Muc'ul Diose jech chal ta sventa li israeletique: “Li jun lum li'i ja' no'ox lec cha'yic ti buyuc no'ox xloc' x'ech'ique; me jutuc mu'yuc bu chcuxic o, Jech mu'yuc lec chquilic ti jech tspasique. Li' ta orae ta jvules ta co'nton li c'usi chopol spasojique; ta xcac'be stoj smulic”, xi li Muc'ul Diose.

¹¹ Jech laj yalbun noxtoc li Muc'ul Diose: “Mu me xac'anbun vocol ta sventa slequilalic li jun lum li'i.

¹² Ac'o me chicta yiximic, pero mu'yuc ta xca'ibe sc'opic. Ac'o me chac'bicun ep chic'bil matanal xchi'uc yantic jmoton, mu'yuc ta jtsacbeic. Yo'to chcaq'uic ta milel ta espada, ta vi'nal, xchi'uc ta tsatsal chamel”, xi li Muc'ul Diose.

¹³ Jech la jtac'be: “¡Ay, Cajval Muc'ul Dios! Li j'alc'opetique laj yalic ti mu'yuc chtal milel ta espadae, ti mu'yuc chtal vi'nal ta jtojolcutique, ti ja' no'ox chavac'bun lec jun co'ntoncutique, ti mu'yuc c'op li' ta cosilalcutique”, xcut.

¹⁴ Jech laj yalbun li Muc'ul Diose: “Li j'alc'opetique ja' no'ox ch-epalc'opojic ti c'alal jech chalic ta jventae. Muc tacbilicuc cu'un, muc ta jmantaluc ti jech chalique; mu'yuc bu la jc'opanic. Puru epalc'op li c'usi chalique; jech no'ox chloc' ta sjolic. Puru lo'lael, mu'yuc stu li c'usi chalique.

¹⁵ Vu'un li Muc'ul Diosune, ja' jech chcal ta sventa li j'alc'opetic le'e, ti ch-epalc'opojique, ti tscuyic ti vu'un laj cal ti mu'yuc ta xtal milel ta espada xchi'uc vi'nal li' ta banamile: ‘Ta xcac' lajicuc ta milel ta espada xchi'uc ta vi'nal’.

¹⁶ Li cristianoetic ti jech ay yalbeique ta xlajic ta milel ta espada, ta xchamic ta vi'nal xchi'uc yajnil xnich'nabic ec. Te no'ox busul chcomic ta xoraltic ta Jerusalén; mu'yuc boch'o chtal smuquic, yu'un jech ta xcac'be stoj li smulique.

¹⁷ Jech xavalbe ya'yic li achi'iltaque: ‘Ac'o loc'uc ya'lel jsat ta c'ac'al ta ac'ubal ta sventa li jteclumale. Mu me xpaj o ta loq'uel li ya'lel jsate yu'un toj tsots li vocol chtal ta stojolique. Chtal tsots majel ta stojolic ti mu stac' poxtael oe.

¹⁸ C'alal me chiloc' ta osilaltique, te chquil animaetic chamenic ta espada. C'alal chi-och ta yut lume, te chquil ti alubenic xa ta vi'nal noxtoque. Yu'un c'alal ta j'alc'opetic ta paleetic, buyuc no'ox ibatic, solel mu sna'ic li c'usi tspasique’, uto”, xiyutun li Muc'ul Diose.

Li j'alc'op Jeremiase ic'opoj ta stojol Dios

¹⁹ Cajval, ¿Me sbatel osil chabaj o li Judae? ¿Me j'ech'el mu'yuc xa stu o ta avo'nton li Sione? ¿C'u yu'un ti toj ech'em no'ox laj ayayijesuncutic ti mu xa stac' poxtael oe? La jmalacutic coltael, pero mu'yuc c'usi lec la jtacutic. La jmalacutic poxtael, pero ja' no'ox ital tsots xi'el.

²⁰ Muc'ul Dios, laj xa cotquincutic li jbolilcutique xchi'uc xchopolil li jmoltot jyame'cutique; ep jtaoj jmulcutic ta atojol.

²¹ Ti c'u cha'al ac'o ich'biluc o ta muc' li abie, mu me xabajuncutic; mu me xasoquesbe o sc'oplal li Jerusalén ti bu oy achotleb sventa chapas mantale, ti jun no'ox yutsile. Na'o me li c'usi achapanoj ta jtojolcutique; mu me xasoques.

²² ¿Me yu'un xu' chaq'uic tal vo' li yantic diosetique? ¿Me yu'un xu' chac' tal vo' stuc li vinajele? Mu'yuc, vo'ot no'ox atuc chavac' talel vo', vo'ot li Muc'ul Diosot cu'uncutique. Yu'un vo'ot chapas scotol, ja' no'ox ta jmalacutic li c'usi chapase.