Jeremías 13 - Bible in Tzotzil de Chenalhó with Deuterocanon

Senyail ta sventa ti mu'yuc stuic ta stojol Dios li israeletique

¹ Li Muc'ul Diose jech laj yalbun: “Bat mano jlicuc chuquil pasbil ta lino no. Chuco o ach'ut, pero mu me x'ach' ta vo' avu'un”, xiyutun.

² Jech bat jman li chuquil jech chac c'u cha'al laj yalbun Muc'ul Diose; la jchuquin.

³ Ital sc'opanun xchibal velta li Muc'ul Diose, jech laj yalbun:

⁴ “Tituno li achuc laj amane, batan ta uc'um Éufrates; te xanac' comel ta jap tontic”, xiyutun.

⁵ Jech te libat ta uc'um Éufrates; te la jnac' comel li jchuc jech chac c'u cha'al laj yalbun li Muc'ul Diose.

⁶ C'alal i'ech' xa'ox jayibuc c'ac'ale, jech laj yalbun noxtoc li Muc'ul Diose: “Bat ich'o tal li achuc ti laj calbot te chanac' comel ta uc'um Eufratese”, xiyutun.

⁷ Jech te libat ta uc'um Éufrates; la jtsac loq'uel li jchuque, pero c'a'em xa, me jutuc mu'yuc xa slequil.

⁸ Ts'acal ital sc'opanun noxtoc li Muc'ul Diose, jech laj yalbun:

⁹ “Jech chcal vu'un li Muc'ul Diosune: Ja' jech ta jc'a'esbe stoyobbailic li Judá xchi'uc Jerusalene.

¹⁰ Li chopol cristianoetic li'i, ti mu sc'an xa'ibicun jc'ope, ti ja' lec cha'yic o spasel li c'usi lec cha'ay stuquique, ti ja' bat yich'ic o ta muc', bat tunicuc yu'un, bat squejan sbaic ta stojol li yantic diosetique, ja' jech ta xc'otic jech chac c'u cha'al li achuc li'i ti mu'yuc xa c'usi stu oe.

¹¹ Jech chac c'u cha'al lec nabal ta xch'ut xchuc li jun vinique, ja' jech lec la jnaban ta jtojol li lum Israel xchi'uc li lum Judae, yu'un jech chc'otic ta jteclumal, jech xu' chpuc batel jc'oplal, jlequilal, xchi'uc jech xu' chi'ich'at ta muc' ta sventaic caloj, pero muc xixch'unbicun”, xi li Muc'ul Diose.

Yan senyail c'op ta sventa ti ta to xtal svocol israeletique

¹² “Jech xavalbe ya'yic noxtoc li achi'iltaque: ‘Jech chal li Muc'ul Diose, ja' li Dios yu'un Israele: Scotol li binetique xu' chich' nojesel ta pasem ya'lel ts'usub’, uto. Jech ta stac'boxuc: ‘¿Me yu'un mu jna'cutic ti scotol binetic xu' chich' nojesel ta pasem ya'lel ts'usube?’, xayutoxuc.

¹³ Li vo'ote jech xatac'be: ‘Jech chal li Muc'ul Diose: Ta xcac' yacubuc scotolic ta pasem ya'lel ts'usub li boch'otic li' nacalic ta banamile xchi'uc li ajvaliletique, ja' li smomnich'nab David ti sc'oplal ja' chchotiic ta spasubmantale, xchi'uc li paleetique, xchi'uc li j'alc'opetique, xchi'uc scotol li jnaclumetic ta Jerusalene.

¹⁴ Ta jlilin scotolic jech chac c'u cha'al bin ti chich' cheq'uiel ta yan bine. Ta xcac' slilin sba stuquic c'alal ta totiletic, c'alal ta nich'naletic. Mu'yuc ta jts'icbe o smulic, mu'yuc bu abul sba chquilic, mu'yuc bu chc'uxubajic o ta co'nton; j'ech'el ta xculesic o’, uto”, xiyutun li Muc'ul Diose.

Taq'uiel ta sventa israeletic

¹⁵ Israeletic, mu me xatoy abaic, yu'un laj xa sc'opanoxuc li Muc'ul Diose; a'ibeic lec li sc'ope.

¹⁶ Ich'ic ta muc' li Muc'ul Diose, ja' li Dios avu'unique, yu'un yo'to mu'yuc chac' taluc ic' osil ta atojolic, yo'to mu'yuc chabosi avacanic ta ic'al osil te ta vitsetic, xchi'uc yo'to mu'yuc ta sc'atajes ta ven ic'al osil li sac osil amalaojic chtale.

¹⁷ Pero me mu xach'unique, ep chi'oc' ta mucul avu'unic. Ta xloc' ep ya'lel jsat; ta xc'uxub jsat ta oq'uel ta scoj li atoyobbailique, yu'un li xchijtac Muc'ul Diose ta xich'ic chuquel batel.

Ic'opoj Dios ta sventa li ajvalile

¹⁸ “Jech xavalbe ya'ay li ajvalile xchi'uc li sme'e: ‘Biq'uit xavac' abaic; mu xa me xachotiic ta achotlebic; chotlanic xa no'ox ta lumtic, yu'un li acoronaic sventa ich'biloxuc o ta muq'ue yalem xa ta banamil.

¹⁹ Li lumetic ta Negueve setubilic xa; mu'yuc xa boch'o xu' chjelovic te. Scotol li judaetique ibatic xa ta yan banamil; chucbil ibatic, mu'yuc boch'o icom o.

²⁰ Toyo asatic, q'uelo avilic li boch'otic le' xtalic ta nortee. ¿Bu oy li chijetic ti la'ac'bat aventainic ti toj c'upilic sbae?’, uto”, xi li Muc'ul Diose.

Li israeletique i'albatic ti ta xich'ic chuquel batel ta yan banamile

²¹ “Jerusalén, ¿c'usi chapas me ta xlic sventainot li cristianoetic ti vo'ot atuc laj anopes ti lec xa chavil aba achi'uque? ¿Me mu'yuc ta xlic avocol jech chac c'u cha'al jun ants ti c'alal yorail xa chcuxe?

²² Me ts'acal jech chanop ta avo'ntone: ¿C'u yu'un jech ic'ot ta pasel ta jtojol?, me xachie, tsc'an chana' ti ta scoj ti i'ech' ta bis avu'un li amule; ja' yu'un ti laj avich' t'ananele, ti laj avich' uts'intabel abec'tale.

²³ ¿Me xu' yu'un ta sacubtas snuculil li ic'al vinique? ¿Me xu' yu'un ta xch'ayes spintoal li jti'val bolome? Ja' no'ox jechoxuc ec li vo'oxuque, ¿me xu' avu'unic spasel c'usi lec ti c'alal ja' nopen xava'yic o spasel c'usitic chopole?

²⁴ Ja' yu'un ta jpucoxuc batel ta ic' ti chtal ta xocol banamile, jech chac c'u cha'al chcuchat batel ta ic' li solil trigoe.

²⁵ Ja' xa amoton o ti jech chajpasbote, yu'un laj ajipun ta avo'nton; ja' laj apat avo'nton yu'un li sloc'obal diosetique.

²⁶ Ja' no'ox jech ec li vu'une ta jvalc'un muyel ac'u' c'alal to ta asat; ta xcac'ot ta q'uexlal,

²⁷ ja' ti jun avo'nton laj asa' amule, ti ven q'uexlal sba c'usi laj apas ta te'tique, xchi'uc ti laj apas muliletic te ta vitsetique. ¡Ay, toj abul aba, Jerusalén! ¿Me chac'an to chalecube? ¿Baq'uin to chalecubtas aba?”, xi li Diose.