Jeremías 12 - Bible in Tzotzil de Chenalhó with Deuterocanon

Ep c'usitic la sjac', laj yal ta stojol Dios li Jeremiase

¹ Muc'ul Dios, mu smeloluc ti ta jtsaquilanot ta lo'ile, yu'un tuc' scotol li c'usi chapase, pero oy c'usi ta jc'an ta jac'bot. ¿C'u yu'un ti ja' toj lec c'usi tstaic li boch'otic chopolique? ¿C'u yu'un ti lec chbat yu'unic scotol li jlo'lavanejetique?

² Vo'ot laj ats'un, jech iyal lec yisimic, ich'iic, xchi'uc isatinic. Li vo'ote nopol oyot ta yeic, pero li stuquique nom oyot ta yo'ntonic.

³ Yan li vu'une lec xavotquinun, Muc'ul Dios. Aviloj, ana'oj lec c'u x'elan co'nton ta atojol. Li cristianoetic li'i ac'o ta milel jech chac c'u cha'al chijetic, ti chucbil xa sventa chich'ic milele. Ac'bo senyailic ti chapal xa chchamique.

⁴ ¿C'u to sjalil jech comen ta xocol banamil li cosilalcutique, ti taquijem scotol li vomol a'maletique? Li chonbolometic xchi'uc mutetique ichamic xa ta scoj smulic li boch'o li' nacalique, ja' ti mu xavil scuyojic li c'usi tspasique.

Itac'bat sc'op yu'un Dios li Jeremiase

⁵ “Me toj lubel chava'ay chanuts ta anil li boch'otic chanov ta yacanique, ¿c'u x'elan xu' avu'un chatsal li boch'otic cajajtic ta ca'e? Me mu junuc avo'nton chava'ay ti bu mu'yuc vocole, ¿c'u x'elan xu' chajelov ta pimilaltic te ta ti' uc'um Jordane?

⁶ Yu'un c'alal ta avuts' avalaltac xchi'uc achi'iltac ta voq'uel chascontrainicot; solel viquil ch'avalic no'ox, chayaptaicot tal ta apat. Me lec chasc'opanoxuc chavile, mu me xapat avo'nton yu'un”, x'utat li Jeremiase.

Li Diose toj abul sba cha'ay ti chopol c'usi chc'ot ta stojol li yu'untaque

⁷ “Laj xa jcomtsan li jnich'nabtaque; laj xa jip ta co'nton li cu'untac to'oxe. Laj xa caq'uic ta sc'ob yajcontraic li jun ta lum ti lec to'ox jc'anoje.

⁸ Li cu'untac to'oxe ja' xa jechic chquil jech chac c'u cha'al león ta toyolaltic, yu'un solel xlaquetic no'ox ta jtojol, ja' yu'un la jip comel.

⁹ Li cu'untaque ja' jechic jech chac c'u cha'al mut ti ep ta cap sc'uc'umale, ti chtal ti'atuc yu'un yantic xchi'iltac ta mutale. Ac'o stsob sbaic tal scotol li jti'val chonbolometique; ac'o tal sti'ic scotolic.

¹⁰ Epal banquilal jcontrainvanejetic laj yulesic scotol li ts'usubaltic cu'une; solel la xpech'ilanic comel ta teq'uel li cosile. Xco'laj xchi'uc xocol banamil icom yu'unic li jc'upil osile.

¹¹ Solel jeche' xch'ijan icom o; xco'laj xchi'uc xocol banamil laj quil. Sjunul banamil soquem icom o; mu'yuc to boch'o abul sba chil ti c'u x'elan icome.

¹² Ta scotol vitsetic ta xocol banamile te iloc'an tal jmilvanejetic, yu'un vu'un li Muc'ul Diosune xu' cu'un ta jmil scotol cristianoetic c'alal ta jujujot sti'iltac banamil, jech mu'yuc boch'o jun yo'nton chcom.

¹³ Laj to sts'un strigoic, pero puru ch'ix la staic; altic i'ech' o scotol li yabtelique. Toj q'uexlal sba cha'yic ti mu'yuc c'usi lec iloc' yu'unic ta scoj ti tsots ilinemun ta stojolique”, xi li Muc'ul Diose.

Oy c'usi laj yal Dios ta sventa yantic lumetic ti sts'aquinojan sbaic xchi'uc Israele

¹⁴ Li Muc'ul Diose jech chal ta sventa li chopol lumetic te sts'aquinojan sbaic xchi'uc Israele, ja' li lumetic ti la soquesic li banamil ti laj cac'be jteclumale: “Ta to xlic jloq'uesic batel ta yosilic; ta jbulic o loq'uel te ta stojol li smomnich'nabtac Judae.

¹⁵ C'alal loq'uemic xa'ox batel cu'une, ta to xlic c'uxubajicuc ta co'nton, yu'un ta xcac' suticuc batel ta yosil sbanamil ti bu slumal jujunique.

¹⁶ Pero me ja' chlic xchanic jech chac c'u cha'al tspasic li jteclumale, me vu'un chlic st'abbicun jbi jech chac c'u cha'al la xchanubtasic ta st'abbel sbi sdiosic Baal ec li jteclumale, me jech lic yalique: ‘Ta melel ja' no'ox stuc cuxul li Diose’, me xiique, lec chbatic ta stojol li jteclumale.

¹⁷ Yan me mu sc'an xch'unique, ta xlic jloq'uesic batel; solel ta jbulic o loq'uel c'alal ta yibelic, ta xculesic o ta j'ech'el”, xi li Muc'ul Diose.