Jeremías 11 - Bible in Tzotzil de Chenalhó with Deuterocanon

Li israeletique muc xich'ic ta muc' li c'usi chapanbil yu'un Diose

¹ Li Muc'ul Diose ital sc'opanun yan velta, vu'un li Jeremiasune, jech laj yalbun:

² “A'yo ava'ay lec c'usi chal li c'usi chapanbil cu'un li'i. Albo ya'yic li jnaclumetic ta Judá xchi'uc ta Jerusalene.

³ Jech xavalbe: ‘Jech chal li Muc'ul Dios yu'un Israele. Chopol chcom o li boch'o mu xich' ta muc' c'usi chal li c'usi chapanbil cu'une.

⁴ Ja' li c'usi jchapanoj ono'ox ta sventaic li amoltotic c'alal la jloq'uesic tal ta Egipto banamile, ja' li lum ti xco'laj xchi'uc horno sventa yunijesbil taq'uine. Jech laj calbeic: A'ibicun li jc'ope, ch'unic li c'usi chacalboxuque; pasic me scotol, jech jteclumaloxuc chac'otic o, jech vu'un Diosun chic'ot o avu'unic ec.

⁵ Yu'un jech j'ech'el chc'ot o ta pasel c'usi laj cal ta jamal ta stojol li amoltot ayame'ique; ja' ti j'ech'el chcac'beic o li banamil ti bu ta xloc' ep ya'lel xchu' vacax xchi'uc pome, ja' li banamil ti li' xa avich'ojic ta orae’, uto”, xiyutun li Muc'ul Diose. Jech la jtac'be: “Jechuc, Muc'ul Dios”, xcut.

⁶ Ja' yu'un jech laj yalbun: “Li c'usi chacalbot li'i, puco batel ta scotol li lumetic ta Judá xchi'uc ta xoraltic ta Jerusalene, jech xavalbe ya'yic: ‘A'yo ava'yic c'usi chal li c'usi chapanbil cu'un li'i; pasic me.

⁷ Ja' ti laj ono'ox calbe tal lec ya'yic li amoltot ayame'ic ta vo'one c'alal la jloq'uesic tal ta Egiptoe. Lec laj calbe tal ya'yic ti ac'o xch'unique; mu'yuc jquechanoj o yalel c'alal to tana, jech laj calbeic: Ja' me xach'unic li c'usi chacalboxuque xcutic ono'ox.

⁸ Pero muc xch'unic, muc xich'ic ta muc'; solel ta jujuntal ja' bat spasic li c'usi chopol la snop ta yo'nton stuquique. Muc ja'uc la xch'unic c'usi chal li mantal laj calbeique. Ja' yu'un laj cac' taluc ta stojolic li vocol jech chac c'u cha'al chal li c'usi chapanbil cu'un ti muc xch'unique’, uto”, xiyutun li Muc'ul Diose.

⁹ Li Muc'ul Diose jech laj yalbun noxtoc: “Li jnaclumetic ta Judá xchi'uc ta Jerusalene ta xa sc'an tstsob sbaic ta jcontrainel.

¹⁰ Ja' xa bat xcha'tambeic xchopolil li smoltot syame'ic ta vo'one ti muc xch'unic c'usi laj calbeique; ja' bat yich'ic ta muc' li yantic diosetique, ja' itunic yu'un. Li smomnich'nabtac Israel xchi'uc Judae la soquesic li c'usi chapanbil cu'un ta sventa smoltot syame'ique.

¹¹ Ja' yu'un ta jtacbe tal tsots vocol ta stojolic; mu c'u xut tspoj sbaic o loq'uel. Ac'o me ta sc'anbicun to vocol, pero mu'yuc chca'ibe sc'opic.

¹² Jech te chbat sc'anbeic vocol li diosetic ti chchic'beic pom ta stojole, pero mu xu' yu'un ta xcoltaatic ti c'alal tsta yorail chtal svocolique.

¹³ Yu'un li Judae toj ep diosetic yu'un jech chac c'u cha'al li lumetic ta yosilale. Li Jerusalene toj ep scajleb matanaletic yu'un jech chac c'u cha'al li xoraliltaque, yu'un ja' te ta xchic' pom ta stojol li dios Baale.

¹⁴ Li vo'ote Jeremías, mu me xac'opanun ta sventa li jun ta lum li'i; mu me xac'anbun vocol ta stojolic, yu'un mu'yuc ta xca'ay ac'opic me chac'anbicun vocol ti c'alal yorail oy svocolique.

¹⁵ “¿C'usi tal spas ta jch'ulna li Israel ti lec to'ox jc'anoje, yu'un toj chopol c'usitic tspas? ¿Me yu'un tscuy ti xu' chmac o svocol ti chiyac'bun milbil matanal ta sventa mulile? ¿Me tscuy ti xu' chcol o jeche?

¹⁶ Ja' to'ox jech sbi cu'un: Yaxal oliva, toj lec c'upil sba c'otem xchi'uc sat, xi to'ox sbi cu'un. Pero li' ta orae ta stsatsal chauc ta jchic'; ta jc'asanbe scotol li sc'obc'obe.

¹⁷ “Vu'un li Muc'ul Diosun ti ta jpas ta mantal scotol te ta vinajele; vu'un la jts'un li Israel xchi'uc Judae. Laj xa cal ti chcac'be tal svocolique, ja' ta scoj smul li smomnich'nabique, yu'un la sa'bicun sc'ac'al co'nton ta sventa ti ja' ta xchiq'uic pom ta stojol li dios Baale”, xi li Muc'ul Diose.

La xchapanic ta mucul c'u x'elan tsmilic li Jeremiase

¹⁸ Li Muc'ul Diose laj yac'bun jna' ti tsc'an chismilicun li cajcontrae. Ja' la sjambun jsat, yu'un jech ac'o quil li c'usi tsc'an tspasique.

¹⁹ Li vu'une ja' jechun jech chac c'u cha'al jcot ch'ium chij ti mu'yuc smul ti ch-ic'at batel ta milele, yu'un muc la jna' me oy c'usi chopol tsc'an tspasbicun, jech chalic: “Jts'etic loq'uel xchi'uc sat li jpets te' li'i; jiptic o loq'uel li' ta cosilaltic ti bu nacalutique, yu'un jech mu'yuc xa boch'o tst'ab ta alel o”, xiic.

²⁰ Pero li vo'ote Muc'ul Dios, vo'ot ti chapas ta mantal scotol te ta vinajele, vo'ot li tuq'uil jchapanvanejote, vo'ot ti xavotquinbe c'alal to ta yut yo'nton li cristianoetique, ac'bun quil c'u x'elan chapacbe sutel li cristianoetic le'e, yu'un vo'ot no'ox cac'ojbot ta ac'ob scotol li jvocole.

²¹ Li Muc'ul Diose jech chalbe li cristianoetic ta Anatot ti tsc'anic ac'o chamcune, ti tsots chispajesicun ti mu me xic'opoj ta sventa li Muc'ul Diose:

²² “A'yo ava'yic, ta xcac'boxuc atoj amulic. Li queremetique milbil ta xchamic ta espada; li bic'tal querem tsebetic avu'unique ta xchamic ta vi'nal.

²³ Mu'yuc xa boch'o chcom avu'unic, yu'un tsta yorail ta xcac'boxuc atoj amulic, vo'oxuc ti te nacaloxuc ta Anatote”, xi li Diose.