Jeremías 10 - Bible in Tzotzil de Chenalhó with Deuterocanon

Li israeletique i'albatic ti mu'yuc c'usi xu' yu'un li yantic diosetique

¹ Smomnich'nabtac Israel, a'yo ava'yic c'usi chal ta aventaic li Muc'ul Diose.

² Jech chal: “Mu me ja'uc xachanic c'usi tspasic li yantic banamile; mu me xaxi'ic yu'un c'usitic senyail chc'ot ta pasel ta vinajel, jech chac c'u cha'al ta xi'ic yu'un li yantic banamiletique.

³ Yu'un ti c'u x'elan stalelic, li c'usi chch'unic li yanlumetique mu'yuc stu o. Jbej te' ta xtuch'ic; ta xaanic lec li boch'o lec sna' yaanele.

⁴ Ts'acal chlic xpixic lec ta saquil taq'uin, ta c'anal taq'uin ti c'u cha'al lec c'upil sba chc'ot yu'unique. Ta sbajic lec ta lavux xchi'uc ta martillo ti c'u cha'al lec tsinil chc'ote.

⁵ Va'alic xa yilel jech chac c'u cha'al xutax ta ovolaltic, pero mu xc'opojic, mu xanovic; q'uechbil ta xanov yu'unic. Mu me xaxi'ic yu'un le'e; mu'yuc c'usi xu' chopol tspas, me ja'uc c'usi lec, mu xu' yu'un noxtoc”, xi li Muc'ul Diose.

⁶ Muc'ul Dios, mu'yuc boch'o yan xco'laj jech chac c'u cha'al li vo'ote. Li vo'ote toj ech'em amuc'ul, toj muc' ta a'yel li abie, toj ech'em stsatsal.

⁷ ¿Me oy boch'o mu'yuc ta xi' avu'un, vo'ot li Muc'ul Ajvalilot yu'un scotol jujun banamile? Vo'ot no'ox atuc xi'bilot o. Ta scotol li boch'o bijic xchi'uc li ajvaliletic li' ta banamile mu'yuc boch'o xco'laj jech chac c'u cha'al li vo'ote.

⁸ Li stuquique bol cristianoetic no'ox c'otemic, mu'yuc sbijilic, yu'un mu xbijubtasatic jutuc yu'un li c'usitic pasbil ta te'e.

⁹ Li sdiosique pasbil no'ox ta tojol saquil taq'uin liquem tal ta Tarsis, xchi'uc pasbil no'ox ta c'anal taq'uin liquem tal ta Ufaz. Ja' yabtelic li boch'o lec sna'ic spasele xchi'uc li j'unijesej taq'uinetique. Yax'elanic sc'u' yac'ojbeic, xchi'uc tsojtsojtic sba. Scotol le'e ja' no'ox spasojic li boch'otic lec chanemic ta sjalele.

¹⁰ Yan li Muc'ul Diose ja' bats'i Dios o ta melel. Li stuque ja' bats'i cuxul Dios o; ja' Ajvalil ta sbatel osil. C'alal ta x'iline, ta xnic banamil yu'un; li jujun banamile mu xcuch yu'unic li sc'ac'al yo'ntone.

¹¹ Israeletic, jech xavalbeic li boch'o mu'yuc yich'ojic ta muc' cuxul Diose: “Li diosetic ti mu ja'uc la spasic li vinajel banamile, ta sacch'ayic li' ta sba banamil; me junuc mu'yuc ta xcomic li' ta yolon vinajel”, utic.

Q'ueoj ta sventa yich'el ta muc' Dios

¹² Li Muc'ul Diose ta svu'el la spas li banamile; ta sbijil la xchapan, la snacan lec li osil banamile, xchi'uc ta sventa sbijil la xlich'an batel li vinajele.

¹³ Ta sc'op no'ox ta xbac' li chauque, jech ta stsob sba li epal vo' ta vinajele; ja' ta xac' muyuc li toquetic oy ta jujujot sti' banamile. Ja' ta xac' noxtoc li sacsevuletic c'alal chac' vo'e. Ja' ta sloq'ues tal noxtoc li iq'uetic ti bu tsobol yu'une.

¹⁴ Scotol li cristianoetique mu'yuc sbijilic, bol c'otemic o. Li boch'o ta spasic sloc'obal diosetique ta xyalic ta q'uexlal, yu'un puru lo'lael li c'usi tspasique, yu'un mu cuxuluc.

¹⁵ Mu'yuc stu, altic no'ox li yabtelique. C'alal tsta yorail tstoj smulic yu'un Diose, ta xchamic o.

¹⁶ Mu jechuc li Dios yu'un Jacobe, yu'un li stuque ja' spasoj scotol li c'usitic oye. Li Israele st'ujoj sventa chu'unin o. Ja' Muc'ul Dios tspas ta mantal scotol te ta vinajel, xi sbi.

Laj yich' albel ti chtal yich' contrainel li Judae

¹⁷ Lum, vo'ot ti setubilot yu'un avajcontrae, tsobo scotol li c'usitic oy avu'une.

¹⁸ Yu'un jech yaloj li Muc'ul Diose: “Li jnaclumetic li' ta avosilale ta jip batel ta jimich' ta namal banamil; ta xcac'be tsots svocolic, yu'un jech ac'o snop ya'yic”, xi.

¹⁹ ¡Ay toj abul jba, toj tsots li jvocole! Li jyayijemale mu xa stac' poxtael. La jnop ti tsts'ic cu'un li tsatsal vocol le'e.

²⁰ Li jcarpanae jinesbil xa, li yaq'uiltaque ituch'an xa; li jnich'nabtaque laj xa scomtsanicun, mu xvinaj bu ibatic. Jech mu'yuc xa boch'o xu' chcha'va'an yan velta li jcarpanae; mu'yuc xa boch'o xu' sjoc'anbe li spoc'altaque.

²¹ Yu'un li jchabichijetique muc bijicuc; muc ja'uc la sa'ic li Muc'ul Diose. Jech mu'yuc lec ibatic o; scotol li xchijtaquique la spuc sbaic batel.

²² A'yo ava'yic, nom to xvinaj xvochetic tal; viquil ch'avalic tal li cristianoetic ta nortee. Ja' xa chtal syavnaijesic scotol li lumetic ta Judae; puru sna xa oq'uiletic chc'ot yu'unic.

²³ Muc'ul Dios, jna'oj ti muc sventainojuc stuc yorail li cristianoe, ti mu xu' yu'un tspas mantal stuc li c'usi chc'ot ta pasel ta stojole.

²⁴ Muc'ul Dios, tuc' no'ox xataq'uiuncutic; mu me ta sc'ac'aluc avo'nton xavac'buncutic, yu'un jech mu xi'ulcutic o avu'un.

²⁵ Ja' te xamal batel sc'ac'al avo'nton ta stojol li lumetic ti mu xayotquinicote, xchi'uc ta stojol li jujun banamil ti mu'yuc chasc'anbicot vocole, yu'un ja' la sti'ic ya'yel li smomnich'nabtac Jacobe; laj yulesic o, la syavnaijesbeic o li slumalique.