Jeremías 1 - Bible in Tzotzil de Chenalhó with Deuterocanon

¹ Li'i ja' ic'opoj Jeremías xnich'on Hilcías. Li Jeremiase ja' jun xchi'ilic li paleetic te nacalic ta lum Anatot ta yosilal Benjamine.

² C'alal yoxlajunebal (13) jabil yochel ta ajvalilal ta Judá li Josías xnich'on Amone, ja'o ital c'opanatuc yu'un Muc'ul Dios li Jeremiase.

³ Jech noxtoc ital c'opanatuc yan velta ti c'alal ja'o tiq'uil ta ajvalilal ta Judá li Joacim xnich'on Josiase, xchi'uc c'alal to ta yo'bal u stsacoj xbuluchibal (11) jabil yochel ta ajvalilal ta Judá li Sedequías xnich'on Josías noxtoque. Ja'o ti c'alal yorail chucbil iloq'uic batel ta Jerusalén li judaetique.

I'ic'at yu'un Dios li Jeremiase

⁴ Li Muc'ul Diose ital sc'opanun, jech laj yalbun:

⁵ “C'alal mu'yuc to'ox chana'p ta yut xch'ut ame'e, t'ujbilot ono'ox cu'un; c'alal mu'yuc to'ox chavoq'ue, voc'bilot ono'ox cu'un sventa cha'och ta j'alc'op ta jujun banamil”, xiyutun.

⁶ Jech la jtac'be: “Ay, Cajval, Muc'ul Dios, mu to jna' xilo'ilaj, yu'un queremun to”, xcut.

⁷ Pero li Muc'ul Diose jech laj yalbun: “Mu xaval jech ti queremot toe, yu'un ti bu chajtacot batele persa te chabat, xchi'uc persa chavalbe ya'yic scotol li c'usitic chacalbote.

⁸ C'alal te oyot ta stojolique, mu me xaxi', vu'un chajcoltaot”, xiyutun.

⁹ Li Muc'ul Diose la xbech sc'ob, la spicbun que, jech laj yalbun: “A'yo ava'ay, li' ta xcac' ta ave li jc'ope.

¹⁰ Vu'un ta xcac'bot tsots avabtel ta stojol muc'tic ajvaliletic xchi'uc ta stojol jujun banamil sventa chavuq'ues, sventa chabul loq'uel, sventa chavules, sventa chayavnaijes, xchi'uc sventa chava'an, sventa chats'un lec”, xiyutun.

¹¹ Jech laj yalbun noxtoc: “¿C'usi chavil, Jeremías?”, xiyutun. “Ta xquil jec sc'ob almendro”, xcut.

¹² “Ta melel, ja' li c'usi laj avile, chcac' persa ti ac'o c'otuc ta pasel li c'usi chcale”, xiyutun.

¹³ Li Muc'ul Diose la sc'opanun xchibal velta, jech laj yalbun: “¿C'usi chavil?”, xiyutun. “Ta xquil jbej bin xbalbun ta voc, xi ta xmal loq'uel ta stuq'uil norte”, xcut.

¹⁴ Ja' yu'un li Muc'ul Diose jech laj yalbun: “Te ta stuq'uil norte ta xlic spuc sba tal tsots svocolic li jnaclumetic li' ta banamile.

¹⁵ Vu'un li Muc'ul Diosune ta xcal ta jamal ti ta jtac tal scotol li ajvaliletic ta nortee. Ta xtal spas scarpanaic te ta ti'coraltonetic ta Jerusalén xchi'uc ta sjoylejal li coraltone, xchi'uc ta scotol lumetic ta Judá.

¹⁶ Yu'un ta xcac'beic tsots svocolic ta scoj smulic, yu'un la scomtsanicun, ja' bat yich'ic ta muc' li yan diosetique; ja' bat xchiq'uic pom ta stojol li sdiosic ti spasoj ta sc'ob stuquique.

¹⁷ Lican, chapano lec aba; bat albo ya'yic scotol li c'usi chacalbote. Mu me xaxi' yu'unic, naca me toj ech'em ta xcac' nican ta xi'el te ta stojolic.

¹⁸ Li' ta orae ta jva'anot lec jech chac c'u cha'al jun lum setbil lec ta tsatsal coralton, jech chac c'u cha'al jbej oy pasbil ta tsatsal taq'uin, jech chac c'u cha'al coralton pasbil ta bronce taq'uin, yu'un ja' chava'an aba ta yalel li c'usi chc'ot ta pasel ta scotol li yosilal Judae; ja' li ajvaliletic yu'unique, li banquilaletique xchi'uc li paleetique, xchi'uc ta sjunul li jteclume.

¹⁹ Ta stsaquicot ta c'op, pero mu xastsalicot, yu'un te jchi'inojot, vu'un ta jcoltaot”, xiyutun li Muc'ul Diose.