Isaías 9 - Bible in Tzotzil de Chenalhó with Deuterocanon

Sc'oplal c'alal chvoc' xchi'uc c'alal tspas mantal li Boch'o sc'oplal chtale

¹ Ta ba'yuque Dios la sbic'tajes li Galilea te ta yosilal Zabulone, xchi'uc li Neftalí ti nopol xil sbaic xchi'uc li yanlum cristianoetic ti mu'yuc yich'ojic ta muc' Diose, ti te xlic batel ta jot uc'um Jordán c'alal to ta ti'nabe. Pero ts'acal to laj yac' lec ta ich'el ta muc'.

² Li cristianoetic ti chanovic to'ox ta ic' osile laj xa yilic saquil osil; li boch'otic nacajtic to'ox ta ic'al osile xojoban xa luz ta stojolic.

³ Muc'ul Dios, laj avac' muc'ta patub o'ntonal, laj avac' ep xcuxetel o'ntonal; toj xcuxet no'ox yo'ntonic ta atojol, jech chac c'u cha'al toj xcuxet yo'ntonic ta yorail tuch' trigoaltic, jech chac c'u cha'al toj xcuxet yo'ntonic c'alal tsvoc'be sbaic li c'usitic la spojbeic yajcontraique.

⁴ Yu'un vo'ot laj aloq'uesbe li alal icatsil xcuchojique; laj acoltaic ta sventa li tsots uts'intael chich'ique. Laj aloq'uesbe li tsots vocol ch-ac'batique, ja' jech laj alajesbe sc'oplal jech chac c'u cha'al laj avules li madianetique.

⁵ Li snatil xonobic soldadoetic slapojic tal ta pasc'op ti xpojlajet no'ox tal yu'unique, xchi'uc li sc'u'ic bonajtic ta ch'ich'e, chich' chiq'uel, chich' ulesel o ta c'oc'.

⁶ Yu'un ivoc' jun querem ta jtojoltic; lij'ac'bat jun nich'onil. Ja' ac'bil tsots yabtel sventa tspas mantal; ja' jech sbi ch-ac'bat: Ech'em Yutsil, Jbijubtasvanej, Tsatsal Dios, Totil Sbatel Osil, J'ac'-Jun-O'ntonal, xi sbi chc'ot.

⁷ Li yabtel ta muc'ta ajvalilale, xchi'uc ti chac' jun o'ntonale mu'yuc spajeb o. Ja' chlic chotluc ta xchotleb li ajvalil Davide; ja' chlic sventain scotol. J'ech'el lec nacal chcom o, tsmeltsan lec scotol; chchapan lec, tstuq'uibtas lec, jech tspas li' ta ora xchi'uc c'alal to ta sbatel osil. Ja' jech tspas ta sventa ti bats'i lec yo'nton li Muc'ul Dios ti tspas ta mantal scotol te ta vinajele.

Ilic sc'ac'al yo'nton ta stojol Israel li Muc'ul Diose

⁸ Li Cajvaltique la stac tal mantal ta stojol li Israel banamile, ja' li smomnich'nabtac Jacobe.

⁹ Li smomnich'nab Efraín nacalic ta Samariae cha'yic scotolic. Pero jech chlic yalic ta stoyobbailic:

¹⁰ “Ac'o me ijin yalel li ladrilloetique, pero jcha'pastic lec ta anbil tonetic; ac'o me la sebic li ts'amte'etic ti puru sicómoro te'etique, cac'tic puru ch'ut te'etic”, xiic.

¹¹ Pero li Muc'ul Diose ja' ta stijbe tal li yajcontraic Rezine yu'un ac'o tal contrainaticuc; ta stsobbe tal scotol li yajcontraique.

¹² Chliquic tal ta sloq'ueb c'ac'al, ja' li siriaetique; chliquic tal ta smaleb c'ac'al, ja' li filistaetique. Jxoxel no'ox ta eil chac'beic li Israele. Pero mu ono'ox xpaj o sc'ac'al yo'nton li Muc'ul Diose; te to staoj yav sye'oj o sc'ob.

¹³ Pero li israeletique muc sutic tal ta stojol li Dios ti ja' chac' jtoj jmultique; muc ja'uc la sa'ic li Muc'ul Dios ti ech'em svu'ele.

¹⁴ Ja' yu'un li Muc'ul Diose la sc'ocbe sjol xchi'uc sne ya'yel li Israele, ja' jech la spasbe noxtoc jech chac c'u cha'al boch'o tsjecbe yalel sc'obc'ob te', xchi'uc ti tslilin ta bojel c'alal ta ajtic ta jun no'ox c'ac'ale.

¹⁵ (Li sjole ja' smelol li moletic xchi'uc li banquilaletic yu'unique; li snee ja' smelol li j'alc'opetic ti puru epalc'op c'usi chalique.)

¹⁶ Yu'un li jpasmantaletic yu'unic li jun lum le'e ja' no'ox chch'ayesvanic ta be; jech ec li boch'o ja' la sc'anic tojobtasel yu'une ich'ayic o ta be.

¹⁷ Ja' yu'un li Muc'ul Diose muc xc'uxubin li queremetic yu'unique; mu'yuc abul sba laj yil li me'on ololetic xchi'uc li me'on antsetique. Yu'un scotolic toj chopolic, bolibenic ta jyalel; scotolic puru chopol c'usi chloc' ta yeic. Pero li Muc'ul Diose muc ono'ox x'ech' o li sc'ac'al yo'ntone; te to staoj yav sye'oj o sc'ob.

¹⁸ Yu'un li xchopolilique ja' jech chac c'u cha'al c'oc' ti chchic' scotol ch'ixtic xchi'uc yantic chopol ch'ixetique, ti xc'ulet no'ox batel ta toyolaltique, ti sts'otet no'ox muyel xch'ayilal jech chac c'u cha'al sutub iq'ue.

^19-20 Li Muc'ul Dios ti ech'em svu'ele ta sc'ac'al yo'nton tstsanbe li yosilalique; li cristianoetique ja' xa sjobelal c'oc' chc'otic. Te xa chlic sti'be sbec'tal xnich'on stuquic, me jutuc mu'yuc xa abul sba chilic li xchi'ilique. Oy boch'o mu xnoj o, ac'o me sucbe no'ox li ve'ele; oy yantic ac'o me chve', pero te no'ox chvi'najic o.

²¹ Li Manasese tscontrain li Efraine; li Efraine chac'be ec li Manasese. Jech noxtoc xcha'chopalic chbat scontrainic li Judae, pero mu ono'ox xpaj o sc'ac'al yo'nton li Muc'ul Diose; te staoj yav sye'oj o sc'ob.