Isaías 8 - Bible in Tzotzil de Chenalhó with Deuterocanon

Oy lec smelol sbi jun xnich'on li Isaiase

¹ Li Muc'ul Diose jech laj yalbun: “Tsaco junuc muc'ta pech'pech' te'. Jech xats'iba: ‘Maher-salal-hasbaz’, xi xats'iba. Lec xbejlajet xats'iba ti c'u cha'al lec c'un ta q'uelele.

² Ic'o batel ta testigo sventa chapat o avo'nton li pale Urías xchi'uc Zacarías xnich'on Jeberequiase”, xiyutun.

³ Ts'acal c'alal la jchi'in li j'alc'op ants, ja' li cajnile, lic xchi'in yol, ivoc' jun querem. Li Muc'ul Diose jech laj yalbun: “Maher-salal-hasbaz xavac'be sbi.

⁴ C'alal mu to sna' yalel ‘tati, yaya’ li olole, li lum Damasco xchi'uc Samariae chich' loq'uesbel batel scotol li c'usitic te oye. Li sc'ulejale ja' chich' batel scotol li ajvalil ta Asiriae”, xiyutun.

⁵ Jech laj yalbun yan velta li Muc'ul Diose:

⁶ “Ta sventa ti ja' xa jun yo'ntonic xchi'uc Rezín xchi'uc xnich'on Remalías li achi'iltac ta scoj xi'ele, ja' mu'yuc xa stu yu'unic o li vo' te ta Siloe ti lec no'ox xlamamet chloq'ue.

⁷ Ja' yu'un ta jmuquic ta pimil nab, vu'un li Muc'ul Diosune; ta jmuquic ta stsatsal yip li uc'um Eufratese. Le'e ja' sc'oplal c'usi chtal spas xchi'uc scotol stsatsal li ajvalil ta Siriae, yu'un ta xtal xchi'uc scotol yip li uc'um yu'une; ta xmal loq'uel c'alal ta sti'ti' li uc'ume.

⁸ Ta xjelov c'alal ta Judá, ta xmuc ta nab ec li Judae; ta xc'ot c'alal to ta snuq'uic. Ta xlich'an lec xic' jech chac c'u cha'al mut ti xlich'oj xchibal xiq'ue, ta smac scotol li avosilalique, pero li' oyun ta atojolic, vu'un li Emanuel jbie”, xi li Muc'ul Diose.

⁹ Cristianoetic ta jujun lum, tsobo abaic tal, li' chavich'ic tsalel; cristianoetic ta yantic namal banamil, chapano abaic achi'uc avabtejebic; li' no'ox chavich' acotolic.

¹⁰ Chapanic li c'usi chanopique, te no'ox macal chc'ot ta be; sibtasvananic, mu xc'ot ta pasel, yu'un li' oy ta jtojolcutic li Diose.

Ja' no'ox tsc'an ta jxi'tic stuc li Muc'ul Diose

¹¹ Li Muc'ul Diose tsots la stsacun ta sc'ob, tsots la staq'uiun ti mu me jts'aclinic batel li cristianoetic le'e, jech laj yalbun:

¹² “Mu me xavalic ti oy c'usi chapanbil ta mucul jech chac c'u cha'al chalic li achi'iltaque, xchi'uc mu me xaxi'ic, mu me xaniquic yu'un ec li c'usi chi'ic yu'une.

¹³ Ja' no'ox stuc Ch'ul Dios xavilic li Muc'ul Dios ti ech'em svu'ele. Ja' no'ox xavich'ic ta muc'; ja' no'ox xaxi'ic yu'un.

¹⁴ Yu'un ja' xu' chc'ot jech chac c'u cha'al ton sventa te ac'o sbosi yacanic, jech chac c'u cha'al ch'entic sventa te ac'o yalicuc o ta lum li cha'voc' israeletique. Ja' syacubilic, ja' xch'ajanulic chc'ot li boch'otic te nacajtic ta Jerusalene

¹⁵ Jech ep boch'o te tsbosi yacanic, chyalic o ta lum, te chchamic o. Ep boch'otic te yacal chc'otic, jech te xtoblajet chcomic o”, xiyutun.

La staq'ui yajchanc'optac li Isaiase

¹⁶ Chabio me lec ta avo'ntonic li chanubtasel chacalboxuque; naq'uic lec li bijubtasel chacac'boxuc, vo'oxuc li cajchanc'opoxuque.

¹⁷ Li vu'une ja' jpatoj o co'nton ta stojol li Muc'ul Diose; ac'o me la snac' sat ta stojol li smomnich'nab Jacobe, pero jch'unoj o ti ja' chiscoltaune.

¹⁸ Li vu'un xchi'uc li jchi'iltac yac'ojbun jventain Muc'ul Diose, vu'uncutic svinajebuncutic ti oy c'usi tspas ta stojol Israel li Diose, ja' li Dios te nacal ta vits Sione.

¹⁹ Me oy boch'o jech chayalboxuque: “Bat jac'beic li j'ic'ch'ulelaletique xchi'uc li jt'unuletic ti mucul svislajet chlo'ilajique”, me xayutoxuque, jech xatac'beic: “Li steclumal Diose ¿me mu ja'uc tsjac'beic Dios yu'unic li c'usi tsc'an tsna'ique? ¿Me smelol ja' tsjac'beic boch'otic chamenic c'usi mu sna'ic li boch'otic cuxajtique?”, utic.

²⁰ Tac'beic ta smantaltac Dios xchi'uc ta sc'op Dios; me mu jechuc chapasique, yu'un mu'yuc to sacuben osil ta atojolic.

²¹ Li cristianoetique buyuc no'ox xloc' x'ech'ic, toj abul sbaic, jvi'naletic. C'alal ep vi'nal cha'yique, chlic ilinicuc ta stojol li ajvalil yu'unique xchi'uc li Dios yu'unique, jech tsq'uelic muyel ta toyol.

²² C'alal tsq'uelic yalel ta banamile, ja' to chilic ti puru vocol, ti puru ic' osil xa oye, solel ic'uben chcom. Scotolic mucul chcomic o ta ic' osil.