Isaías 7 - Bible in Tzotzil de Chenalhó with Deuterocanon

Sba velta ic'opoj Isaías ta stojol Acaz

¹ C'alal ja'o ochem ta ajvalilal ta Judá li Acaz xnich'on Jotam, smomnich'on Uziase, tsc'an ox tspojic Jerusalén li Rezín ajvalil ta Siria xchi'uc li Peka ajvalil ta Israel, xnich'on Remaliase. Pero muc xu' yu'unic stsalel.

² Li a'yej le'e bat yalbeic li ajvalil Acaz xchi'uc yalab xnich'nabe, ja' li smomnich'nab David ta vo'onee: “Li Siriaetique jmoj chtalic xchi'uc li efrainetique”, xutic. C'alal laj ya'yique, iniquic ta xi'el scotolic jech chac c'u cha'al chnic muc'tic te' ta tsatsal ic'.

³ Ja' yu'un li Muc'ul Diose jech laj yalbe li Isaiase: “Loc'an batel achi'uc li anich'on Sear-jasube, bat nupo ta be li Acaze. Te xabat ta slajeb sbevo'al li tanque te ta cajal ta sbelal chuc'unajebale.

⁴ Jech xavalbe: ‘Q'uelo me aba, cuxuluc lec avo'nton; mu me xaxi'. Mu me xlo'ilaj avo'nton yu'un li chib xupet c'oc' ti xtomet loq'uel xch'ayilalique, ja' li Rezín xchi'uc li siria soldadoetic yu'une, xchi'uc li xnich'on Remalías ti tsanem sc'ac'al yo'ntonique.

⁵ Li siriaetic xchi'uc efrainetic xchi'uc li xnich'on Remaliase toj chopol c'usi xchapanoj chaspasbicot, jech laj yalic:

⁶ Bat cochentatic li Judae, bat jsetutic, jvoc'tic ta o'lol; ja' jtic'tic ta ajvalilal li xnich'on Tabeele, xiic.

⁷ Pero li Muc'ul Diose jech chal: Li c'usi snopojique j'ech'el mu xc'ot o ta pasel.

^8-9 Yu'un li lum Damascoe ja' muc'ta lum c'otem yu'un li Siriaetique; li Rezine ja' ajvalil yu'un li Damascoe; li Samariae ja' muc'ta lum c'otem yu'un li efrainetique. Li xnich'on Remaliase ja' ajvalil yu'un li Samariae, pero ta yan vo'ob xchanvinic (65) jabile muc xa ja'uc jun banamil chcom li Efraine. Ja' no'ox jech ec li vo'oxuque me muc j'ech'eluc ach'unojicun oe, mu'yuc lec va'al chacomic ec, xi li Muc'ul Diose’, uto”, xiyutun.

Li Isaiase laj yal ti tsta yorail chvoc' li Emanuele

¹⁰ Li Muc'ul Diose la sc'opan li Acaze, jech laj yalbe:

¹¹ “C'anbo junuc tsots senyail li Muc'ul Dios avu'une, me ta olon, me ta yutil to banamil, me ta cajal, me ta yutil to vinajel”, x'utat.

¹² Itac'ov li Acaze: “Mu'yuc ta jpas jech; mu jc'an jpasbe poroval yo'nton li Muc'ul Diose”, xi.

¹³ Jech lic yal li Isaiase: “A'yo ava'ay, vo'ot smomnich'onot li muc'ta ajvalil Davide. ¿Me mu xu' o chava'ay ti chavac'be svocol li jchi'iltactique? ¿Me chac'an chavac'be svocol noxtoc li Dios cu'une?

¹⁴ A'yo ava'ay, ja' stuc Muc'ul Dios ta xac'bot avil senyail: A'yo ava'ay, ta to xlic xchi'in yol jun tseb; ta svoq'ues jun querem, Emanuel ta xac'be sbi.

¹⁵ C'alal chlic xa sna' bu lec, bu chopol li quereme, ja' no'ox ya'lel xchu' vacax lec spatoj sba xchi'uc pom ta slajes.

¹⁶ C'alal mu to sna' st'ujel bu chopol bu lec li olole, j'ech'el mu'yuc xa yajval yosilalic li chib ajvaliletic ti chaxi' yu'une.

¹⁷ Pero li Muc'ul Diose oy c'usi yan tsots ta xac' taluc ta atojol, ta stojol ateclumal, xchi'uc ta stojol avuts' avalal ta sventa atot; mu'yuc ono'ox bu c'otem ta pasel jech, ja' to ti c'alal lic svoc' sba ta stojol Judá li Efraine”, xi. Ja' laj yac'be sna' c'usi chlic spas li ajvalil ta Asiriae.

¹⁸ C'alal me ic'ot li sc'ac'alil le'e, li Muc'ul Diose ta spiubta tal scotol li yajvaltac Egipto ti xco'laj xchi'uc xcochetique, xchi'uc li asiriaetic ti xco'laj xchi'uc xchanul muc'tic pome.

¹⁹ Scotolic chtal naquiicuc ta xch'ac-ch'aquil vitsetic, ta japjap ch'entic, xchi'uc ta ch'ixilaltic, xchi'uc ta scotol vo'etic.

²⁰ C'alal me la sta sc'ac'alile, li Muc'ul Diose ja' tstunes li ajvalil ta Asiriae, ja' jech chac c'u cha'al navaja xch'amanoj tal ta sjelovel muc'ta uc'um Eufrates; ja' chjuxbe o stsotsil sjolic xchi'uc yisimic li israeletique xchi'uc stsotsil scotol sbec'talic ti butic xa nac'ajtique.

²¹ C'alal ja'o yorail le'e, li boch'o tsts'ites jcot me' vacax xchi'uc cha'cot me' chije,

²² lec chac' ya'lel xchu' xvacax, te no'ox ta sta tatal ya'lel xchu' vacax sve'. Li boch'otic ta to xcolic comel ta milele ja' no'ox te ta sve'ic ya'lel xchu' vacax ti spatoj sbae xchi'uc spom muc'ta pom.

²³ C'alal ja'o jech c'otem ta pasele, li ts'usubaltic ti bu oy jmil (1,000) ta tec' ti ja' to'ox stojol jmil (1,000) ta sep saquil taq'uine, solel tspas ta ch'ixtic xchi'uc ta yantic ch'ixetic.

²⁴ Xchi'uc st'ilubte'ic, xchi'uc sflechaic ta x'ochic batel te ta banamil yu'un puru toyolal ch'ixetic, xchi'uc puru pimil ch'ixte'tic te ch'iemic.

²⁵ Ti bu vitstic jutuc ti ta asarona ono'ox la sloquique, mu xbatic te c'alal, yu'un chi'ic yu'un li ch'ixtic xchi'uc li ch'ixte'tique. Ja' xa no'ox chtun jutuc ta sventa ve'ub vacax xchi'uc ve'ub chijetic.