Isaías 66 - Bible in Tzotzil de Chenalhó with Deuterocanon

Chopol ch-ilat li boch'otic chich' ta muc' c'usi mu'yuc stue

¹ Li Muc'ul Diose jech chal: “Li vinajele ja' jchotleb; li banamile ja' stec'ub cacan. ¿C'u x'elan chapasbicun jna li vo'oxuque? ¿Bu xu' chapasbicun xcuxubil co'nton?

² Yu'un vu'un cabtel scotol li c'usitic oye; vu'un la jpas scotol. “Li boch'o oy ta co'ntone ja' li boch'o biq'uit chac sbaique, ti chat yo'nton yu'un smulique, xchi'uc ti chich'ic ta muc' li jc'ope.

³ Yan li boch'otic tsmilic tot vacax sventa jmoton scuyoj sbaique xco'laj xchi'uc tsmil jun cristiano. Li boch'o tsmil jcot chije xco'laj xchi'uc tsmil jcot ts'i'. Li boch'o chac' c'usitic chloc' yu'une xco'laj xchi'uc chac' ch'ich'al chitom. Li boch'o chchic' pome xco'laj xchi'uc tsc'opan c'usi cuybil ta dios. Yu'un ja' tspasic o li c'usitic tsc'an stuquique; ja' la sc'anic o li c'usitic toj chopole.

⁴ Ja' yu'un li vu'une ja' ta jt'ujbeic ec li c'usi sventa svocolique; ja' ta xcac'beic li c'usi ep ono'ox xi'elal cha'yique. Yu'un laj quiq'uic, pero muc xtac'ovic; la jc'opanic, pero muc stuc'ulanic. Ja' la spasic li c'usi mu jc'ane; ja' la st'ujic li c'usi mu'yuc lec chquile”, xi li Muc'ul Diose.

Chapanel xchi'uc c'uxubinel

⁵ Vo'oxuc ti avich'ojbeic ta muc' sc'op li Muc'ul Diose, a'yo ava'yic li c'usi yaloje: “Li avuts' avalalic ti chopol chayiloxuque, ti chasnutsoxuc batel ta scoj ti acuchojbicun jbie, jech chalic: ‘Ich'ic ta muc' quic li Muc'ul Diose; ta jc'an ta jq'uelcutic me chata xcuxetel avo'ntonic yu'un’, xiic. Pero ja' stuquic chyalic ta q'uexlal.

⁶ Chvinaj xch'ijlajet no'ox chbac' tal te ta lum; xc'ulet no'ox chbac' tal ta ch'ulna. Ep c'usi chbac' tal cu'un vu'un li Muc'ul Diosune, yu'un ja' chtal cac'be stojol li cajcontrataque.

⁷ “Li lum Sione mu'yuc to'ox xch'ut, pero ta ora no'ox i'alaj; mu'yuc to'ox chlic xc'uxul cha'ay, pero ivoc' xa'ox squerem.

⁸ ¿Me oy boch'o ya'yoj jech chac le'e? ¿Me oy boch'o yiloj jech chc'ot ta pasel? ¿Me oy bu chc'ot ta pasel ti ta anil no'ox chchapaj jun muc'ta lume? ¿Me oy bu jech ti ta ora no'ox ch-ayin yan banamile? Yan li lum Sione ja' to no'ox ilic li xc'uxul xch'ute, pero ta ora no'ox ivoc' ep yalab.

⁹ ¿Me xu' ta jpajes c'alal yorail chvoc', ti vu'un la jc'an ac'o voc'uque?”, xi li Muc'ul Diose ja' li Dios avu'unique.

¹⁰ Cuxetuc no'ox avo'nton achi'uquic li Jerusalene; tse'inan no'ox achi'uquic vo'oxuc ti lec ac'anojique; cuxetuc avo'nton achi'uquic vo'oxuc ti ep laj avoc'taique.

¹¹ Yu'un li stuque ja' jech chc'ot jech chac c'u cha'al jun me'il ti chac'be xchu' yole, ti jun yo'nton chcom c'alal lec noj xch'ut yu'une.

¹² Yu'un jech yaloj li Muc'ul Diose: “Vu'un ta xcac'be tal jun o'ntonal li lum Jerusalene; ja' jech ta jmalbe tal jech chac c'u cha'al uc'um. Ja' ta xcac'be scotol sc'ulejal li yantic banamile; ja' jech pulbil ta xcac'be jech chac c'u cha'al nojelal uc'um. Ja' xa chlic smac'linoxuc acotolic li lum Jerusalene; chaspetoxuc lec ta sc'ob, chascajanoxuc lec ta sba yo'.

¹³ Jech chac c'u cha'al jun me'il ti lec tspatbe yo'nton yole, ja' jech ta jpatboxuc avo'ntonic ec li vo'oxuque, xchi'uc chataic lec spatubil avo'ntonic te ta Jerusalén noxtoc”, xi li Muc'ul Diose.

¹⁴ C'alal chavilic scotol jech chc'ot ta pasele, xcuxet no'ox avo'ntonic; lec solol abec'tal chava'yic jech chac c'u cha'al ch-uninaj ts'i'lal. Yu'un li Muc'ul Diose chac' ta ilel svu'el ta stojol li yajtuneltaque; chac' ta ilel c'u x'elan sc'ac'al yo'nton ta stojol li yajcontrae.

¹⁵ A'yo ava'ay, li Muc'ul Diose ta xtal xchi'uc ep c'oc'; li caretaetic yu'une ta xtal jech chac c'u cha'al sutub ic'. Ja' ta xtal smal scotol li sc'ac'al yo'ntone; jech chac c'u cha'al yat c'oc' c'alal ch-utvan.

¹⁶ Ta melel, li Muc'ul Diose ta c'oc' ta xchapanvan; ta espada chalbe c'u x'elan smul scotol cristiano ta sbejel banamil; bats'i ep cristiano chchamic yu'un.

¹⁷ Li Muc'ul Diose jech chal: “Li boch'o chac' sbaic ta ts'u'iltasel, ta lecubtasel sventa ch-ochic batel ta stojol sdiosic te ta ts'unubaltique, ti te nabal chbatic ta spat li j'ic'vanejetique, ti tsti'ic chitom, xchi'uc ch'o, xchi'uc c'usitic yan mu stac' ti'ele, jmoj ta xcules o scotolic.

¹⁸ Yu'un vu'un xcotquinbe li yabtelique xchi'uc li c'usi tsnopique; tsta yorail tstsob sbaic tal scotol cristianoetic ta jujun banamil xchi'uc ta jujuchop sc'opic, yu'un chtal sq'uelic c'u x'elan jvu'el jtsatsal.

¹⁹ Ta xcac'be yilic jun senyail; oy to boch'o ta xcac' jatovicuc batel yu'unic. Ta xcac' baticuc ta yantic banamil: ta Tarsis, ta Fut, ta Lud, ti bu lec sna'ic spiquel flechaetique, xchi'uc ta jtaquic batel ta namal banamil ta ti'ti' nab ti bu mu'yuc ono'ox ya'yojbicun jc'oplale, ti mu'yuc ono'ox yilojic jlequilale. Ja' ta xcac' spucbicun batel jc'oplal ta stojol yantic banamiletic.

²⁰ Ja' ta xiq'uic tal scotol li achi'iltaquic ti te capalic batel ta yantic banamile; ta scajanic tal ta ca'etic, ta caretaetic, ta xq'uechic tal ta colalte'etic, ta mulaetic, xchi'uc ta camelloetic. Ja' jmoton chc'otic te ta Jerusalén ti bu ch'ul vits cu'une; Ja' co'ol chc'otic jech chac c'u cha'al yavil jmoton chaq'uic israeletic sventa chtun te ta ch'ulna cu'un ti lec ts'u'iltasbilique.

²¹ Xchi'uc ta xlic jt'ujic ta paleetic cu'un, xchi'uc ta levietic”, xi laj yal stuc li Muc'ul Diose.

²² Jech chal noxtoc li Muc'ul Diose: “Jech chac c'u cha'al sbatel osil te chcom o li ach' vinajel, ach' banamil ta xcac' tale; ja' jech mu xlaj sc'oplalic o ec li amomnich'nabique xchi'uc li abiique.

²³ Ta jujun u, ta jujun sc'ac'alil cuxub o'ntonal chtal squejan sbaic ta jtojol scotolic sventa chiyich'icun ta muc'.

²⁴ “Ta xtalic, ta xilic te telajtic sbec'tal scotol li boch'o la scontrainicune. Mu xcham o li xuvitalique, xchi'uc mu xtu'p o li c'oc' bu oyique. Scotol cristianoetic toj chopol ta q'uelel chilic”, xi li Muc'ul Diose.