Isaías 65 - Bible in Tzotzil de Chenalhó with Deuterocanon

Ta x'ac'bat stoj smulic yu'un Dios li jbajmantaletique

¹ Li Muc'ul Diose jech chal: “Li boch'otic mu'yuc ono'ox ta yo'nton oy c'usi chisjac'bicune, ja' italic ta jtojol; li boch'otic mu'yuc ono'ox ta yo'nton chisa'icune, ja' la staicun; li boch'otic mu'yuc ono'ox tsc'anic vocol ta jtojole, jech laj calbeic: ‘Li' me oyune’, xcutic.

² Scotol c'ac'al te jbechoj o jc'ob chquic' li jbajmantal cristianoetique, yu'un ja' stamojic batel li chopol bee; ja' tspasic o batel li c'usi tsnop stuquique.

³ Ja'ic jun ta lum ti ta jsat tspasic li c'usi chisa'bicun o sc'ac'al co'ntone. Jech noxtoc tsmilbeic smoton sdiosic ta ts'unubaltic; chchiq'uic pom ta scajleb ti pasbil ta ladrilloetique.

⁴ Te chcomic ta yut muquinaltic; te chcomic sjunul ac'ubaltic ti bu nac'alaltique. Ja' jti' bec'tal chitometic noxtoc. Li sbinique noj ta scaltoal c'usitic mu stac' ti'el.

⁵ Jech chalbe li xchi'ilique: ‘Te no'ox oyanic, mu xtal apiquicun, yu'un li vu'une ts'u'iltasbilun lec ta jyalel, mu xu' chtal apiquicun’, xutic. Li cristianoetic le'e ja' jechic chca'ay jech chac c'u cha'al ch'ayil ch-och ta jni'; ja' jechic noxtoc jech chac c'u cha'al c'oc' ti scotol c'ac'al te chchic'vanic oe.

⁶ Pero ta sventa ti te ts'ibabil ta jtojol li smulique, ja' yu'un muc teuc no'ox jmeyoj jc'ob chicom. Ta persa ta xcac'be stojol li yabtelique; ta persa ta xcac'be lec ya'yic.

⁷ Ta xcac'be stojol li smulique xchi'uc li smul stot sme'ique, yu'un ja' la xchiq'uic pom ta vitsetic; la xchopolc'optaicun te ta bic'tal vitsetic. Ja' yu'un ta jbisbeic lec li yabtelique, jech lec ts'acal stojol ta xcac'beic”, xi li Muc'ul Diose.

Laj yal ti chac' ep bendición li Diose

⁸ Jech chal noxtoc li Muc'ul Diose: “C'alal oy to ya'lel li jchoj sat ts'usube, jech chich' alel: ‘Mu to xajip batel, yu'un oy to c'usi lec yich'oj’, xiic. Ja' no'ox jech ta jpas ta stojol ec li cajtuneltaque; mu'yuc ta xcules o scotol.

⁹ Ta to jcomtsanbe li smomnich'nabtac Jacobe; ta to xcac'be yu'uninic judaetic li toyolal te'etic cu'une. Li boch'otic t'ujbilic cu'une ta xcac'be yu'uninic o li yosilalique; li cajtuneltaque te ta xcac' naquiicuc o.

¹⁰ Li stenlejaltic Sarone ta xlic nojuc ta chijetic; li stenlejal Acore ta xlic nojuc ta vacaxetic, ja' yu'unic chc'ot li jteclumal ti chlic sa'icune.

¹¹ Yan vo'oxuc ti acomtsanojic o li Muc'ul Diose, ti lach'ay o ta avo'ntonic li ch'ul vits cu'une, ti laj avac'beic ve'lil xchi'uc ya'lel ts'usub smotonin li dios Gad xchi'uc Meníe, ti ach'unojic ti ja' chac' c'usitic lec ta jtatique,

¹² mu'yuc lec c'usi chataic; ta xcac' milatanic ta espada acotolic. Laj quic'oxuc, pero muc xatac'ovic; la jc'opanoxuc, pero muc xatuc'ulanic. Ja' laj apasic li c'usi mu jechuc caloje; ja' laj ac'anic li c'usi mu lecuc chquile”, xi li Muc'ul Diose.

¹³ Ja' yu'un jech chayalboxuc li Cajvaltic Diose: “Li cajtuneltaque ta sta lec sve'elic; yan li vo'oxuque chavich' avocolic ta vi'nal. Li stuquique oy c'usi lec chuch'ic; yan li vo'oxuque chtaquij avo'ntonic. Li stuquique xcuxet no'ox yo'ntonic; yan li vo'oxuque chayalic o ta q'uexlal.

¹⁴ Li stuquique xcuxet no'ox yo'ntonic; solol no'ox yo'nton chq'uejinic. Yan li vo'oxuque cha'avanic, cha'oq'uic ta scoj avocolic, xchi'uc ta scoj ti toj abul aba chava'yique.

¹⁵ Ta xcac' ti chopol chcom abiic ta stojol li boch'otic t'ujbilic cu'une, vu'un jtuc ta xlic culesoxuc. Yan li cajtuneltaque ta xcac'be ach' sbiic.

¹⁶ Me chlic sc'anic bendición te ta yosilalique, ja' no'ox tsc'anic ta jbi vu'un ti melel c'usi chcale. Me oy c'usi chal ta jamal tspas te ta yosilalique, ja' no'ox chist'abbun jbi vu'un ti mu jna' jel co'ntone. Yu'un li tsots vocol te to'ox oye chch'ay ta o'ntonal scotol; tsacch'ay xa batel ta jsat.

Sc'oplal ach' vinajel, ach' banamil

¹⁷ “A'yo ava'yic, ta xcac' ayinuc ach' vinajel banamil. Li poco'e mu'yuc xa boch'o ta sna' o; mu'yuc xa boch'o ta snopilan o.

¹⁸ Cuxetuc no'ox avo'ntonic, ac'aluc no'ox avo'ntonic sbatel osil ta sventa li c'usi ach' ta xcaq'ue, yu'un vu'un jtuc ta xcac' tal xcuxetel o'ntonal te ta Jerusalén, jech xcuxet no'ox yo'nton li boch'otic te chnaquiique.

¹⁹ Jech xcuxet no'ox co'nton yu'un ec li lum Jerusalene; jun no'ox co'nton yu'un li jteclumale. Mu'yuc xa boch'o ch-oc' yu'unic; mu'yuc xa boch'o ch-avan yu'unic ta scoj svocolic.

²⁰ Me junuc olol mu'yuc chcham ta yololal; me junuc mol mu'yuc chcham ti c'alal mu'yuc tsta sjabilale. Me oy boch'o chcham ta vo'vinic (100) sjabilale, ‘Querem to icham’, xiic. Me oy jun mol ti chcham c'alal mu'yuc yich'oj vo'vinic (100) jabile, ‘Tuch'bil yorail icham’, xiic.

²¹ Chlic spas lec snaic, chlic naquiicuc stuquic; chlic sts'unic lec sts'usubic, ta slo'beic sat stuquic.

²² Mu alticuc tspas lec snaic, mu yanuc boch'o te chnaqui; mu alticuc tsts'un lec sts'usubic, mu yanuc boch'o tslo'be sat. Ja' jech sjalil chcuxiic jech chac c'u cha'al sjalil cuxul jpets te'. Li boch'otic t'ujbilic cu'une ta to sc'upinic lec li yabtel yoc sc'obique.

²³ Mu'yuc bu altic chac' svocolic ta abtel; muc ja'uc no'ox ch-alaj chnich'najic sventa chich' vocol, yu'un ja' snitililtac li boch'otic cac'ojbeic o bendicione, ja' jech yich'ojic bendición ec li smomnich'nabtaquique.

²⁴ C'alal mu'yuc to chisc'anbicun vocole, jtac'ojbeic xa'ox li sc'opique. C'alal ja' to chisc'opanicune, ca'yojbeic xa'ox li sc'opique.

²⁵ Li oq'uil xchi'uc ch'ium chijetique jmoj chve'ic batel; li leone chlic slo' jobel jech chac c'u cha'al vacax; li quiletel chonetique mu'yuc xa xi'bal sbaic. Me jutuc mu'yuc vocol, mu'yuc c'usi chopol te yo' bu li ch'ul vits cu'une”, xi li Muc'ul Diose.