Isaías 64 - Bible in Tzotzil de Chenalhó with Deuterocanon

¹ Oyuc c'uxi xjat li vinajele, xu' chayal tal ti jechuque; xu' chnic avu'un vitsetic

² jech chac c'u cha'al vo' ti c'alal xbalbun ta voc ta o'lol c'oq'ue, yu'un jech ac'o sna'ic boch'oot li avajcontrataque, jech xu' chniquic ta xi'el ta atojol li jujun banamile.

³ C'alal laj apas c'usi toj xi'balic sba ti mu'yuc bu jmalaojcutic jeche, c'alal layal tale, tsots inic li vitsetic avu'une.

⁴ Mu'yuc ono'ox boch'o ya'yoj, mu'yuc ono'ox boch'o yiloj ti oy yan dios xu' yu'un tspas scotol jech chac c'u cha'al laj apas sventa chacolta li boch'otic jun yo'nton yich'ojicot ta muq'ue.

⁵ Li vo'ote chloc' anup ta be li boch'o xcuxet no'ox yo'nton tspasic c'usi tuq'ue, ti tsvules ta yo'ntonic c'usi oy ta avo'nton atuque. Ta melel ilinemot ta jtojolcutic, yu'un scotol c'ac'al la jsa' jmulcutic ta atojol. ¿Me yu'un xu' to chicolcutic ti jech la jpascutique?

⁶ Li vu'uncutique ja' jechuncutic jech chac c'u cha'al ic'ubal; li c'usi lec la jpascutic calojcutique ja' jech chac c'u cha'al poc' ti chich' cusel o ic'ubale. Li jchopolilcutique la xcuchuncutic batel jech chac c'u cha'al chcuchat batel ta ic' yanal te' ti taquin xae.

⁷ Me junuc mu'yuc boch'o tsc'an vocol ta atojol; mu'yuc boch'o chac' persa tsa' li coltael avu'une. Ja' yu'un laj anac' asat ta jtojolcutic; ja' laj avac' yu'uninuncutic o li jchopolilcutique.

⁸ Muc'ul Dios, vo'ot no'ox jtototcutic; li vu'uncutique patbiluncutic no'ox ta lum. Ja' vo'ot laj apatuncutic; vo'ot yabteluncutic ac'ob jcotolcutic.

⁹ Muc'ul Dios, mu toj ech'emuc xa'ilin ta jtojolcutic, mu teuc xanac' o ta avo'nton li jmulcutique. Avocoluc na'o me ti vu'un anich'nabuncutique.

¹⁰ Li ch'ul lumetic avu'une xco'laj xchi'uc xocol banamil comen; li Sione yavnaijem o ta j'ech'el; li Jerusalene jeche' xch'ijan icom o.

¹¹ Li ch'ulna cu'uncutic ti toj leque, ja' ti bu laj to'ox yich'icot ta muc' li jmoltot jyame'cutic ta vo'one, laj yulesic o comel ta c'oc'. Scotol li c'usitic oy cu'uncutic ti toj c'upilic sbae, soquem o scotol.

¹² Muc'ul Dios, ¿me mu'yuc c'usi chapas ta sventa ti jech la spasique? ¿Me te no'ox ch'anxachi o? ¿Me yu'un solel chabic'tajesuncutic o ta j'ech'el?