Isaías 63 - Bible in Tzotzil de Chenalhó with Deuterocanon

Ja' stuc Muc'ul Dios tspacbe sutel li yajcontrae

¹ —¿Boch'o ti le' chlic tal ta Bosra, ja' li muc'ta lum yu'un Edom ti tsoj sc'u' slapoj tale, xchi'uc ti xleblajet no'ox tal li sc'u' spoq'ue, ti ep stsatsal xchi'uc svu'ele? —Ja' vu'un ti tuc' chichapanvane, ti xu' cu'un chicoltavane.

² —Pero ¿c'u yu'un ti tsoj ac'u'e? xco'laj xchi'uc laj apits' ya'lel ts'usub ta avacan yilel.

³ —Jech, vu'un jtuc la jpech' ta teq'uel li ts'usub sventa ta jpits'be ya'lele; mu'yuc boch'o la scoltaun ta junuc lum. Ilinemun ti c'alal la jt'us ta teq'uele; ta sc'ac'al co'nton la jpech' ta teq'uel. Ja' yu'un ep ich'ituj li xch'ich'ale; iyatin sliclijil li jc'u'e.

⁴ Yu'un jnopoj c'usi c'ac'alil ta jpacbe sutel li cajcontrae; laj xa sta sc'ac'alil cu'un ti chicoltavane.

⁵ Laj to jq'uel me oy boch'o chiscoltaun, pero mu'yuc; ich'ay co'nton c'alal laj quil ti mu'yuc boch'o chiscoltaune. Ja' yu'un ta jc'ob jtuc la jpas canal; ja' la sujun li sc'ac'al co'ntone.

⁶ Ta sventa sc'ac'al co'nton la jpech' ta teq'uel li lumetique; xco'laj xchi'uc yacuben icom xchi'uquic li sc'ac'al co'ntone. La jmalbe ta banamil li xch'ich'alique.

Slequil yo'nton Dios ta stojol Israel

⁷ Ta jc'an ta xcalilan c'u x'elan slequil yo'nton li Muc'ul Diose; ta xcalilanbe ep slequilal, yu'un toj ep li c'usitic la spas ta jtojoltique, xchi'uc toj ep slequil yo'nton ta jtojoltic vu'utic li israelutique. Toj lec c'usi la spas ta sventa slequil yo'nton, xchi'uc ta sventa ti toj c'uxutic ta yo'ntone.

⁸ Jech laj yal: “Le'e ja' jteclumal; ja' jnich'nab ti muc alticuc chislo'laicune”, xi. Ja' yu'un ja' Jcoltavanej ic'ot yu'unic.

⁹ Scotol li svocolic to'oxe ja' la svocolin stuc scotol; ja' stuc ital scolta, muc yanuc boch'o la stac tal. Ta sventa slequil yutsil yo'nton la scolta, laj yic' tal, la stoy liquel; ja' jech la spasilanbe o scotol ora.

¹⁰ Pero li stuquique la stoy sbaic ta stojol; laj yaq'uic ilinuc sjol yo'nton li ch'ul Diose, jech ic'atajic ta yajcontra, lic tsacaticuc ta c'op.

¹¹ Ts'acal it'ab ta yo'ntonic ti c'u x'elan icoltaatic ta sliquebe, ti ja' Moisés la scolta loq'uel tal li xchi'iltaque, ja' yu'un jech la sjaq'uic: “¿Bu oy li Dios ti la scolta loq'uel ta nab li Moisés ta vo'onee?, ja' li jchabichij yu'une, ti laj yac'be ta stojol li svu'ele,

¹² xchi'uc ti ta svu'el stsatsal la xchi'in ta yalel muyele, ti la svoc' li muc'ta nab ta stojol steclumal, yu'un jech ac'o yich' albel slequilal sbatel osile.

¹³ ¿Bu oy li boch'o laj yac' jelovicuc tal ta o'lol natil nab li steclumale, ti muc xac' jaxbujuc yacanic jech chac c'u cha'al ca' ti mu xjaxbuj yacan c'alal lec taquin banamile?

¹⁴ ¿Bu oy li boch'o laj yic' tal steclumal jech chac c'u cha'al chijetic ti ic'bil chyal bu lec stenlejaltique?”, xi tsjaq'uic. Ta melel ja' jech laj yic' batel ta stsatsal svu'el steclumal li Muc'ul Diose, jech chac c'u cha'al vacax ti chbat xcux yo'ntonic ta stenlejaltique. Ja' jech la spasbe li steclumale, yu'un jech ac'o vinajuc batel sc'oplal ti scotol xu' yu'une.

Sc'anel tsots coltael ta stojol Dios

¹⁵ Cajval, q'uelo tal avil te ta vinajel; otquino tal lec avil te ta ach'ul lequilal ti bu nacalote. ¿Bu oy li c'uxubinel avu'un xchi'uc li atsatsal avu'ele? ¿Me yu'un mu xa xana'bun li jvocolcutique? ¿Me yu'un ilaj xa li slequil avo'nton ta jtojolcutique?

¹⁶ Vo'ot no'ox li mero jtototcutique. Li jmoltotcutic Abrahame muc xa xiyotquinuncutic; li Israele muc xa xiyiluncutic. Pero li vo'ote Muc'ul Dios, vo'ot no'ox jtototcutic o; albil ac'oplal ti vo'ot Jpojvanejot o cu'uncutique.

¹⁷ Muc'ul Dios, ¿c'u yu'un ti laj avac' ch'aycuncutic ta be avu'une? ¿C'u yu'un ti laj atsatsubtasbun co'ntoncutic ta avich'el ta muq'ue? Sutan tal ta jtojolcutic ta sventa ti lec ac'anoj li avajtuneltaque, xchi'uc ta sventa li jaychop avu'untac avic'oj o ta atojole.

¹⁸ Yu'un mu'yuc jal laj yu'unin yosilalic li ach'ulnich'nabe; li j'uts'intavanejetique laj xa xpech'ilanic ta teq'uel li ch'ulna avu'une.

¹⁹ Xco'laj xchi'uc mu'yuc aventainojuncutic ta q'uelel; xco'laj xchi'uc mu'yuc bu jcuchojcutic abi yilel.