Isaías 61 - Bible in Tzotzil de Chenalhó with Deuterocanon

I'albat sc'oplal ti chcol li Israele

¹ Li espíritu yu'un Cajvaltic Diose li' oy ta jtojol; laj yac'bun svu'el yu'un jech voc'bil licom ta sventa yabtel. Ja' yu'un la stacun tal sventa tal calbe ya'yic lequil a'yej li boch'otic abul sbaique; la stacun tal sventa tal jcolta li boch'otic oy svocolique, sventa tal calbe ti xu' chcolic li boch'otic mozoinbilique, xchi'uc ti xu' chloq'uic ta chuquel li boch'otic ochemic ta chuquele.

² Tal calbe ya'yic ti ja' xa sjabilal li c'uxubinel yu'un Diose, xchi'uc c'usi ora tspacbe sutel li cajcontratique. Jech noxtoc tacbilun tal ta spatbel yo'nton li boch'otic chat yo'ntonique.

³ Li boch'otic te oyic ta Sione, tal jc'atajesbe ta scoronaic li tan chac' ta sjolique; tal jc'atajesbe ta muil poxil sventa xcuxet no'ox yo'ntonic li at-o'nton cha'yique. Tal jc'atajesbe ta lequil natil c'u'il li svocol yo'ntonique, jech chlic albatuc sc'oplalic: “muc'tiquil tsatsal te' ti lec tuq'uique”, xi sc'oplalic, yu'un ja' sts'unben stuc li Muc'ul Diose; ja' sventa ac'o vinajuc li smuc'ul stsatsale.

⁴ Ta to xlic yich' cha'va'anel li poco' coraltonetique; ta xlic yich' cha'va'anel li naetic ti vo'one xa sjinele; ta xlic yich' cha'meltsanel li lumetic ti vuq'uesbilique.

⁵ Yanlum cristianoetic chlic ochuc ta jchabichij avu'unic; muc avinquilalicuc chlic yaq'uintaboxuc li ts'usubaltic avu'unique.

⁶ Li vo'oxuque cha'albat ac'oplalic ti vo'oxuc paleoxuc yu'un Muc'ul Diose; ja' yajtuneltac Dios cu'untic, xi ac'oplalic. Ta to xac'upinbeic sc'ulejal li yantic banamiletique; ta to xac'ac'umtas lec aba achi'uquic li sc'ulejalique.

⁷ Ta melel toj ep laj yich'ic vocol li cu'untaque; toj ep laj yich'ic na'leel xchi'uc chopolc'optael. Ja' yu'un ep ta xich'ic sc'ulejalic noxtoc te ta yosilalic; ta staic xcuxetel yo'ntonic o sbatel osil.

⁸ Yu'un vu'un li Muc'ul Diosune ja' jc'anoj o li c'usitic tuq'ue; ja' contra chquil li boch'o chlo'lavan, li boch'o ch-elc'aje. Ja' yu'un jun co'nton ta xcac'be stojol yabtelic li cu'untaque; oy c'usi lec ta jchapan, te chcom o ta stojolic sbatel osil.

⁹ Li smomnich'nabtaquique ta xpuc lec sc'oplalic ta yantic banamil; scotol li boch'otic chilique chlic sna'ic ti ja' jun lum ac'bil ep bendición cu'une.

¹⁰ Toj xcuxet no'ox co'nton ta stojol li Muc'ul Diose; toj jun no'ox co'nton ta stojol li Dios cu'une, yu'un laj yac'bun li coltael yu'une, laj yac'bun jpas ta canal scotol. La smeltsanun lec jech chac c'u cha'al jun querem ti ta xa xnupine; la sc'ac'ubtasun lec jech chac c'u cha'al jun tseb ti sc'ac'ubtasoj xa lec sba xchi'uc c'usitic oy yu'une.

¹¹ Li Muc'ul Diose laj xa yac' ch'iuc, laj xa yac' javuc li' ta banamil li tuq'uil chapanel yu'une, jech chac c'u cha'al chjav ts'i'laletic ta banamil, jech chac c'u cha'al chjulij loq'uel tal sq'uelum c'usitic ts'unubil. Jech ch-albat slequilal ta scotol li jujun banamile.